Ezekiyɛle 25
25
Zii Ɠiligiti Tukpɔɠaaleʋe Vai, Niiti Ti Izilayɛle Maaɠoolizu
(25:1—32:32)
Amɔn nuiti daalɔɠɔma
1Ɠɔoɠɔ GALAGI ɓɔɛni pɔ̀, é ɠɛ mà: 2«Ɗa ʋe, zunui, ɠaaʋote Amɔn nuiti pɔ pelei, è GALA gooi wo ti laalɔɠɔma. 3Bo Amɔn nuiti ma: ‹À woilo Maliɠii Ɠɔoɠɔ GALAGI wooi ma: Wo ɲɛɛi woni, siɛgi zu sèizu ɲadegai ɠɔzɔni la, siɛgi zu Izilayɛle yooi zuwoni da, ti ɗa li ga Zuda nuiti Ɓaɓilɔne. 4Naa maaʋele ma, nà ɓesu folo ɠulazu ʋele nuiti ba, ti ɗa-yooi zeɠe ga tɔnɔ, ta ta-ɠɔɔlaaɠai ʋu ɗa-yooi ɠa, ta ta-zeɠe ɠotaiti to ná. Tiya ɠa ta ɗa-yooi ma lɔnɔgi pɛ mi, nɔnɔiti ti ga ɗɔnɔiti, ti naati kpɔle. 5Nà wa-laa wolai Laɓa ɠɛ ga ɲɔmɛiti daamiizuʋɛ, Amɔn nuiti ta-yooi pɛ ge ɠɛ ga baala sasai. Wa suɠwɛɛ naazu ga nà ɠa gè ga Ɠɔoɠɔ GALAGI. 6Mazɔlɔɔ Maliɠii Ɠɔoɠɔ GALAGI wooi ɠaa: Wo yealoɠani, wo ɠɔkɔ ga koozunɛɛi Izilayɛle ná-maanɔɠɔi vaa zu. Ʋele ɠana wo wa-wɔinzeɠemai ɠulaai la kɛlɛma é lo nà-nuɓusɛi Izilayɛle ʋa. 7Naa ma, nà zobogi ɠulazu kɛlɛma wo laalɔɠɔma, gè wo lɔ zii ɠiligiti zeezu, ti wo yeavoo. Nà wo ɠoloɠolo mɛtu, wa ɲɛɛlɛ nuɓusɛiti saama, zou la mɔ ɠɛa wo ʋɛ. Wa suɠwɛɛ naazu ga nà ɠa gè ga Ɠɔoɠɔ GALAGI.› »
Moaɓe nuiti daalɔɠɔma
8«Maliɠii Ɠɔoɠɔ GALAGI wooi ɠaa Moaɓe nuiti ta Seyiil nuiti daalɔɠɔma, niiti ti ɠɛni: ‹Zuda ʋɛlɛyeɠei ɠa ga nuɓusɛi, ga zii ɠiligiti kɛʋele.› 9Naa ɠa é ba, nà Moaɓe laalaosu ná-taa wolaiti pɔ pelei, ta ná-kwɛpelemaʋɛ, ti pɛ ti ɠoloɠolo, anɛɛ niiti ti wola ʋagai, eɠɛʋelei Ɓɛte-Yesimɔte la, ta Ɓaale-Meyon, ta Kiliyatayime. 10Nà daalaosu folo ɠulazu ʋele nuiti tuɠɔ, ti Moaɓe zeɠe ga tɔnɔ, eɠɛʋelei ti Amɔn zeɠeni la. Naazu ʋelela ʋelei nu nɔpɛ ge la mɔ ɠizɛga Amɔn zu. 11Nà-tukpɔi ɠa loo Moaɓe nuiti ma, ta suɠwɛɛ naazu ga nà ɠa gè ga Ɠɔoɠɔ GALAGI.»
Edɔme nuiti daalɔɠɔma
12«Maliɠii Ɠɔoɠɔ GALAGI wooi ɠaa: ‹Edɔme nuiti ti potokula ɲɔu ɠɛɛni Zuda nuɓusɛiti daalɔɠɔma, naa ɠa é ti ɠɛɛni ga sɔba nuiti. 13Naa ɠa é ba, Maliɠii Ɠɔoɠɔ GALAGI wooi ɠaa: Nà yeewuzeɠezu Edɔme laalɔɠɔma, nà nuiti ma zuwu ɠaaleʋezu ma yooi zu ta suaiti, gè ná valibo, é ɠɛ ga teʋebai zu, é zo Teman taa wolai ma, é zeeli Dedan, ná-nuɓusɛiti pɛ ta za kɔɔi zu. 14Nà naa ɠaliva nà-nuɓusɛiti ma, Izilayɛle nuiti, ga ti nɔ̀nɔ ʋotokula Edɔme nuiti ma. Izilayɛle nuiti ta ti zo eɠɛʋelei nà-ziiɠaawanai ta nà-ziiɠulagi ti levezu la, ti ti ɠala ga nu a ɓaaɠona mà, ʋelei a ɗa zale la.› » Maliɠii Ɠɔoɠɔ GALAGI wooi ɠana.
Filisiti nuiti daalɔɠɔma
15«Maliɠii Ɠɔoɠɔ GALAGI wooi ɠaa: ‹Filisiti nuiti ti kɛɛʋɛ ga potokulai, ti tɔnɔi ʋotokula ti zili nu wɔlɔmaiti ma ga wɔinzeɠema wolai, ti naati suwuɠaaleʋe. 16Naa maaʋele ma, Maliɠii Ɠɔoɠɔ GALAGI wooi ɠaa: Nà yeeʋɛɛzu Filisiti nuiti ma. Zɔiti ti ʋaai, ti zeɠe Kelɛte, nà ti pɛ koloɠolosu, mɔtaiti ti zeini kpoloɗɛi laaʋɛ, nà naati pɛ undaaʋili. 17Nà-potokulai ta nà-doɠaiti ta ɲɔu ti ma. Siɛgi zu naati ti zeelizu la ti ma, ta suɠwɛɛ ga nà ɠa gè ga Maliɠii Ɠɔoɠɔ GALAGI.› »
Currently Selected:
Ezekiyɛle 25: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
