Ezekiyɛle 26
26
Tiil nuiti daalɔɠɔma
1Kona puugɔ maazu ɠilasiɛi (11), ma alugi ma volo mɔungi, Ɠɔoɠɔ GALAGI ɓɔɛni pɔ̀, é ɠɛ mà: 2«Ɗa ʋe, zunui, tɔɔzei Tiil nuiti ti ɲɛɛɠulani Zeluzalɛme zu, ti ɗa ɠɛ ma: ‹A kela-o! É ɠoloɠologa, taa wolai ɛsɛ pɛ ge ɠɛni liizu pɔ! Tosuʋɛ ɠa ve niina gi ya, gá ɓɛtɛ niinɛ ʋolu, Zeluzalɛme zuwoga!› 3Tama, Maliɠii Ɠɔoɠɔ GALAGI wooi ɠaa: ‹Nà ʋaazu wuzeɠezu è laalɔɠɔma, Tiil taa wolai. Nà nuɓusɛ ʋɛbɛi wuzeɠezu è laalɔɠɔma eɠɛʋelei kpoloɗɛi a ɗa ma lakpatakpagiti buzeɠe la. 4Ta Tiil ziɠigiti golo, ti ná-pɛlɛ ɠaaɠoozagi toka. Nà ma vufiligiti pɛ kpale, gè ná-kɔtui maaɲakai yɛ de. 5Toɠa ɠɛ niina ga ziɛ zaama yooi nɔ, ʋɛ kale ɓɛɛ nuiti ta ɠɛ ta-lumɔiti fɔɔzu ná, mazɔlɔɔ nà ɠa gè boga,› » Maliɠii Ɠɔoɠɔ GALAGI wooi ɠana. « ‹Zii ɠiligiti ta ʋa, ti loo taai zu. 6Taa wolai niiti ti è-maaɠoolii zu, ti logai ziɛlaʋɛ, toɠa naati su nuɓusɛiti paa. Ta suɠwɛɛ naazu ga nà ɠa gè ga Ɠɔoɠɔ GALAGI.
7« ‹Maliɠii Ɠɔoɠɔ GALAGI wooi ɠaa: Nà ʋaazu ga Ɓaɓilɔne masagi Neɓukadenɛzaal, Tiil taai laalɔɠɔma, masagi ná-zobogi wɔɔlɔai masagiti ta-zobogi ʋa, gè zeɠe la lɛkpɛmaʋɛ nu ɠɔʋɛzu ʋelei. Toɠa ʋa, é laalɛ è wu ga sooiti ta kɔɔɠɔ wotoloiti, ta soo ɓizɛ zalaʋusuiti, ta salaʋusu ɓulugiti. 8Taa wolai niiti ti è-maaɠoolii zu, ti logai ziɛlaʋɛ, toɠa naati su nuɓusɛiti paa, é kɔɔɠɔ yeɠeiti bɔ è laalɔɠɔma. Toɠa kɔɔɠɔ ziɠigiti kpɛtɛ ta é kɔɔɠɔ ɠɔlu zɛpɛgiti to ga siɠigi è laalɔɠɔma. 9Ta ɗa-ziɠigiti golo ga ta-ɠɔɔɠɔ zɔɔlaiti, ta ɗa-ʋɛlɛ ɠaaɠoozagiti toka ga ta-ʋekasiiti. 10Ná-soo ɓulugiti ta-vufili buzeɠeai ɠa ʋɛɛ è unga, é è maaɓɔle, soo ɓulu kɛɛ nuiti ta kɔɔɠɔ wotoloiti su lugi ɠa ɗa-ziɠigiti ɲiikpi, siɛgi zu ti lɛɛzu la ɗa-ziɠidaʋɛti, eɠɛʋelei nu a taai zei la kɛlɛ su é zeɠe wɔ siɠigi ʋa, é leʋe su é ɗa lɛ taai zu. 11Ta ziɛ ga ta-zooiti ɗa-laazuʋɛ ná pɛ, ta ɗa-nuɓusɛiti paa ga boɠa zɔkpɔi, ɗa-ɠɔtu ziɠigiti ti loni ga ɗa-zobogi ma ʋoogi, ta naati suvaza zooi ma. 12Ta ɗa-naavoloiti seɠe, ti loo è-ɠɔligiti su, ti siɠigiti golo ɗa-laaiti ma, ti ɗa-ʋɛlɛ ʋagɔiti golo, ta ɗa-ɠɔtuiti pili ya kpoloɗɛi wu, ta ɗa-wulu zɛʋɛiti, ta ɗa-vufiligiti. 13Nà è ɓesu ɗa-wuye loo vaiti ba, nu la mɔ ɗa-ɠɔni goomɛniga. 14Nà è ɠɛ ga kɔtui maaɲakai, nii kale ɓɛɛ nuiti ta ɠɛ ta-lumɔiti fɔɔzu maazu, è la mɔ loga ʋolu eyɛsu pɛ. Mazɔlɔɔ nà, Ɠɔoɠɔ GALAGI, nà ɠa gè boni,› » Maliɠii Ɠɔoɠɔ GALAGI wooi ɠana.
Ziɛ zaama yooiti ta ɓali
15«Maliɠii Ɠɔoɠɔ GALAGI wooi ɠaa Tiil taa wolai ma: ‹È loo lugi a ɠɛna ɠulaa, siɛgi zu nuiti ti saamaaɠɔgi wosu da, siɛgi zu nu ʋaai ɠɛɛzu la taa zaamaʋɛ, ziɛ zaama yooiti ta kpoloɗɛi laaʋɛ yooiti ti la ɲiikpiga ɓaa? 16Kpoloɗɛlaʋɛ masagiti kpein ti ʋilɛ, ti zeɠe ta-masa kpɔkpɔgiti ga, ti ta-zeɠeungiti kula ɠɔba, ti ɠula ta-zeɠe ɠɔsuʋugiti su, ti ɓɔɠɔ maaɠili ga dualuagi, ti zei zooi ma, yeeɠɛɠalai pɛ su ti zasu ɗa ɓali, ti lua ʋelei ma ɗa-vaa zu. 17Ta maawɔin wuyei nii loo è ma, ti ɠɛ ma:
Ee, tooʋɛ bu ɠale,
ɗɛi kpoloɗɛi ɠaa leʋe bo nuiti ti ɠɛni è maamɔinzu,
tɔɠɔɠula taa wolai, ná-zobogi ɠɛni kpoloɗɛi ɠa,
ta ná-nuɓusɛiti,
nii ɠɛni maaɠoolii zu nuiti sasuɓalizu!
18Ziɛ zaama yooiti sasu ɠa ɓali niina,
naama voloi è ɠoloɠolosu da.
Kpoloɗɛi zaamaʋɛ yooiti ta lua gola
yeei ɗa-vaiti ti ɓesu da.
19« ‹Maliɠii Ɠɔoɠɔ GALAGI wooi ɠaa: Siɛgi zu gè è ɠɛɛzu la ga taa wolai koloɠologai, eɠɛ taa wolai naati nu la mɔ ti zu, siɛgi zu gè è lɔɔɠuzu la pali ɓomaʋɛ, ziɛ wolaiti ti è maaɓɔle, 20nà yeizu ga ɗe naati pɔ bɛ, niiti ti yeiɗai zeɠezaɠai zu, wɔlɔwɔlɔ nuɓusɛiti pɔ bɛ, ɗa yɛ zeini zooi wu eɠɛ puulega ɠɔtu wɔlɔwɔlɔgiti ti zooi wu, wo ɠɛ ʋa wa gɔvɛiti ti liini è luɠɔ. È la mɔ ɠɛa ga taa nu a zei su, è la mɔ ʋuuzu zɔlɔɔga nu vuluiti ta-yooi ɠa. 21Ɗa-vai ɠa nuɓusɛi pɛ maalua, mazɔlɔɔ ɗa ɠoloɠolo mɛtu. Nuiti ta è ɠaiziɛ, kɛlɛ ti la è ɠa mɔnɔ pɛ,› » Maliɠii Ɠɔoɠɔ GALAGI wooi ɠana.
Currently Selected:
Ezekiyɛle 26: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
