Ezekiyɛle 19
19
Maawɔin wuyei
1«Ɗa ʋe, maawɔin wuyei loo Izilayɛle ɠundiɠiiti ma. 2Ɗa ɠɛ ti ma:
‹Wo-lee ɠɛni ga zala zaai.
É ʋɛɛni sakpamaalegai zala zinɛiti saama,
zala yiʋoiti saama é ná-ziʋoiti kulazu su ná.
3É ná-ziʋoi taɠila maaɠoloni,
naa ɠɛni ga zala ɓokpagi.
É zooni daamianigi zosu,
é ɗa nuiti suʋaliʋali.
4Zii ɠiligiti ti maawooi mɛnini.
Ti soni ga ta-ʋalii,
ti kalagi lɔ sokpayeɠei zu.
Ti liini la Ezipete yooi zu.
5Siɛgi zu zala zaai kaani la ga
ná-maaɓɔungi zuɠooza wafuun,
kitosuʋɛ ɠoloɠologa.
É ná-ziʋoi taɠili seɠeni,
é kpɛtɛ ga zala ɓokpagi.
6É ɠɛni leʋeteʋesu zalaiti saama,
é ɠɛni ga zala ɓokpagi.
É zooni daamianigi zosu,
é ɗa nuiti suʋaliʋali.
7É ta-masa pɛlɛi woloni,
é ta-laa wolai ɠoloɠolo.
Zooi ta gaa nuɓusɛiti ti luani
sikɔ lugi ʋa ti mɛnini.
8Zii ɠiligiti ti maaɠoolii zu,
ti wuzeɠeni daalɔɠɔma.
Ti maaɠoolini ga ta-lumɔiti,
ti soni ga ta-ʋaliiti.
9Ti kalagi ʋilini sokpa zu,
ti pili sasa goi zu kɛai eɠɛ sekagi.
Ti liini la Ɓaɓilɔne masagi ʋɔ.
Ti pilini kasoi ɠa, nu a ʋa goomɛni,
é ɗa zikɔ Izilayɛle ɠizeiti ma.› »
Dɔɔɓɔi gului ta ma ɓekegiti
10« ‹Wo-lee ɠɛni eɠɛ leezɛn ansaɠɔgi siingai ziɛlaʋɛ.
Ma waaiti ti ɠɛni ga ta gaalaagiti,
ziɛi zaɓu zu é ɠɛni sɔlɔɔsu.
11Ma ɓekegiti ti ɠɛ ba, ti maayikiai,
naati ti ɠɛɛni ga masa tukpɔiti.
É loni gulu wolaiti maazu.
Gaaɠooza ʋelei ta ma ɓekegiti mɔin ʋelei
ɛsɛ pɛ ge ɠɛni kaazu.
12Kɛlɛ tɔɔɠulani ga ziiɠaawanai,
é ʋili ya zooi ma.
Folo ɠulazu ʋele viilɛi fɔɔni ta ma waaiti,
naati ti looni bu.
Ma ɓekegiti ti maayikini, ti vɔɔni,
abui ti ɠalani.
13Leezɛn ansaɠɔgi tɛi siinga ɠɛni de teʋebai zu,
zou vɔɔi zu, ziɛ la ná.
14Abui ɠulani ma lɔkulugi zu,
é ma ɓekegiti ta ma waaiti koloɠolo.
Ma ɓeke maayikia la mɔ ba,
nii a ɠɛ ga masa tukpɔi.› »
Maawɔin wuyei ɠana, maanɛai é loo ɠana.
Currently Selected:
Ezekiyɛle 19: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
