Ezekiyɛle 11
11
Zeluzalɛme lukpɔɠaa ɠa leʋe ná-ɲama ʋuu vai zu
1Zɛnvui bùzeɠeni zooi ma, é li ga ze Ɠɔoɠɔ GALAGI zei ʋɛlɛi laaʋɛ folo ɠulazu ʋelei. Nu lɛɛzuʋɛ siɠidaʋɛ, gè zunu ʋuufelegɔ maazu lɔɔlugɔ (25) ɠaani. Gè nu felegɔ ɠwɛɛni ti zaama, ti ɠɛni ga nuɓusɛiti ta-ɠundiɠiiti, Azuul ná-doun zunui Yaazania, ta Ɓenaya ná-doun zunui Pelatiya. 2Ɠɔoɠɔ GALAGI ɠɛni mà: «Ɗa ʋe, zunui, zunuiti ka, ti faa ɲɔi ɠɛɛzu, ti ɗa tɛnɛ ɲɔiti bo taai tɛi su. 3Ti ɗa ɠɛ ma: ‹Eyɛsu yeeɠɛɠala zeeli, ade la dɛ pɛlɛa loga ʋɛ. Taa ɠɛɛʋɛ eɠɛ kɔlu liɠii, ade ɠɛ ʋuuni su eɠɛ suai.› 4Naa ɠa é ba, GALA gooi wo ti laalɔɠɔma, GALA gooi wo, ɗa ʋe, zunui!»
5Názu ɠa Ɠɔoɠɔ GALAGI ná-Zɛnvui ʋaani pɔ̀. É ɠɛ mà: «Ɗa ɠɛ ma: ‹Ɠɔoɠɔ GALAGI wooi ɠaa: Gè naa ɠwɛɛga, nii wo bosu, Izilayɛle nuiti! Kisiɛi é lɔɔzu wo-yiimaʋɛ, gè naa ɠwɛɛ. 6Wo nu ʋaai wola ɠɛa taai tɛi su, wo koi yɔɠɔzu ʋeleiti pɛ sulaavega ga nu ʋoomaiti. 7Naa ɠa é ba, Maliɠii Ɠɔoɠɔ GALAGI wooi ɠaa: Taai ɠɛa ga kɔlu liɠii, kɛlɛ suai ɠa ga niiti wo ti ʋaai. Kɛlɛ wɔun, nà wo ɓɛɛzu, wo ɠula ná ʋa. 8Wa luazu kɔɔi ʋa ɓaa? Tama, nà kɔɔi leʋesu wo ma,› Maliɠii Ɠɔoɠɔ GALAGI wooi ɠana. 9‹Nà wo ɓɛɛzu, wo ɠula taai ʋa, gè wo lɔ wɛɛinti zeezu, gè nà-tukpɔi loo wo ma. 10Nà wo lukpɔ Izilayɛle zooi ɠoozuʋɛ, wa za kɔɔi zu ga boɠa zɔkpɔi, wa suɠwɛɛ naazu ga nà ɠa gè ga Ɠɔoɠɔ GALAGI. 11Taai tɛi ge la ɠɛa wo ʋɛ ga kɔlu liɠii, wo ʋa ɠɛ ga suai é makɛsu su, kɛlɛ nà wo lukpɔzu Izilayɛle yooi ɠoozuʋɛ. 12Wa suɠwɛɛ naazu ga nà ɠa gè ga Ɠɔoɠɔ GALAGI, zɔi wo la ná-tɔgiti soni, wo la ziɛni ga ná-deveiti, tɔɔzei wo ziɛni nɔ ga zii ɠiligiti siɛ ʋelei, ti wo-maaɠoolii zu.› »
13Gè yɛni nɔ GALA gooi wosu, Ɓenaya ná-doun zunui Pelatiya za. Gè looni zooi ma, gè laaʋɛɛ, gè kpeei loo, gè ɠɛ ma: «Ee, Maliɠii Ɠɔoɠɔ GALAGI! Ɗa ɠa è Izilayɛle nui mɔtai ma zuwu ɠaaleʋezu!»
Minazeɠegi é woni kula zou ʋa nuiti bɛ
14Ɠɔoɠɔ GALAGI ɓɔɛni pɔ̀, é ɠɛ mà: 15«Ɗa ʋe, zunui, niiti ti ga è-ma ziiti, è-ɠɛɛlointi, ti ga ɗa-nuiti, Izilayɛle nuɓusɛi niiti pɛ ti ti ɠulaai zou ʋa, naati ka Zeluzalɛme taaʋeaiti ti ɠɛɛzu ti ma: ‹À yɛ ɠoozama, wo maaɠooza Ɠɔoɠɔ GALAGI ʋa, mazɔlɔɔ giya ɠa zooi tɛi feai gi ya ga gɔnɔ!› 16Naa ɠa é ba, ɗa ɠɛ ti ma: ‹Maliɠii Ɠɔoɠɔ GALAGI wooi ɠaa: Anɛɛ ni gè ti maaɠoozani, ti li zii ɠiligiti saama, gè ti vazani zou ɠiligiti su, kɛlɛ nà ɠɛɛzu ti zaama miná yeeɠɛɠalai tanigaa laawu eɠɛ ada ɲadegai naama yooiti su, ʋɛti ti náti.› 17Naa ɠa é ba, ɗa ɠɛ ti ma: ‹Maliɠii Ɠɔoɠɔ GALAGI wooi ɠaa: Nà wo ɠaalɛɛzu ba, wo ɠula nuɓusɛiti saama, gè wo zuzo, wo ɠula zooiti su wo vazagai ti zu, nà Izilayɛle yooi ve wo ʋɛ.› 18Ta ʋaana, ti zeɠe miná, ta kɔɔɠɔ gani kɔɔ vaiti pɛ seɠe ga, ta kɔzɔba vaiti pɛ. 19Nà wo pɛ wo ɓɔ ɠi gilagi ma, gè zɛnvu niinɛ ɠilagi ve wo pɛ zea. Wo-ɠigi kpaai eɠɛ kɔtui, gè naa ɠula wo ɠoozu, gè maavalibo ga faaɠaaɠaa ɠigi, 20naa ɠa a kɛ wo ziɛ ga nà-deveiti, wo woilo nà-tɔgiti ma, wo ti zo, wo ziɛ ga tiye, wo ɠɛ ga nà-nuɓusɛiti, gè ɠɛ ga wa-ƓALAGI. 21Kɛlɛ zɔiti ti-yii ɠatagai kɔɔɠɔ gani kɔɔ vaiti ba ta kɔzɔba vaiti, nà ti-ziɛ ʋelei ma ɠasɔi la ti unma,» Maliɠii Ɠɔoɠɔ GALAGI wooi ɠana.
GALA ná-lɛbiyai zeɠe vai Zeluzalɛme ʋa
22Seeluɓɛinti ti koʋegi lɔɔzeini, ma ɠɔɠɔ ɠiliɠiligiti ti ɗa lati ti ʋɔ, Izilayɛle ná-GALAGI ná-lɛbiyai é volozu, naa ɠɛni ti maazuʋɛ. 23Ɠɔoɠɔ GALAGI ná-lɛbiyai wuzeɠeni taa zaamaʋɛ, é li, é lo gizei maazu, é Zeluzalɛme folo ɠulazu ʋelei. 24Zɛnvui ʋuuni bù, é li ga ze Ɓaɓilɔne kula zou ʋa nuiti pɔ bɛ. Naa ɠɛɛni kulakɛlɛmai zu GALA Zɛnvui feeni. Kulakɛlɛmai gè kaani, naa zeɠeni pòlu niina. 25Nii kpein Ɠɔoɠɔ GALAGI dɛɛni ga ze, gè naati pɛ dɛɛni ga kula zou ʋa nuiti.
Currently Selected:
Ezekiyɛle 11: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
