Ezekiyɛle 10
10
GALA ná-lɛbiyai zeɠe vai sei ʋɛlɛi ʋa
1Gè wɛlɛni geei ɠaaʋɛ seeluɓɛinti tɔungi maazuʋɛ. Anii ta ɠɛni ná eɠɛ kɔtu zɔngɔ ɓaagi daa ga safiilegi, é ɠɛni ti maazuʋɛ, kulaai ga masa kpɔkpɔgi. 2Ɠɔoɠɔ GALAGI ɠɛni zunui ma, nii maaɠilini ga geze zeɠei: «Lɔ seeluɓɛinti kɔɠɔ ɠiliɠiligiti zɔɠɔzu, yeelaave ga abulekai, è seɠe seeluɓɛinti saama, è li, è faza taai ma.»
Zunui liini gàazu, é naa ɠɛ. 3Tama seeluɓɛinti ti ɠɛni loni GALA sei ʋɛlɛi yeezazuʋɛ, siɛgi zu zunui liai ma ti ʋɔ pelei. Pɛlɛ ɠoozuʋɛ pɛ daaveni ga tonaɓiingi. 4Naa ʋolu GALAGI ná-lɛbiyai wuzeɠeni, é zeɠe seeluɓɛinti maazu niiti ti zɛlɛni minazeɠe kesui ma lakulugi maazuʋɛ, é li GALA sei ʋɛlɛi laaʋɛ. Tonaɓiingi ʋaani, é GALA sei ʋɛlɛi wuulaave eyɛsu eteaʋɛ pɛ ge ɗa volo ga Ɠɔoɠɔ GALAGI ná-lɛbiyai. 5Seeluɓɛinti koʋegi lugi ɠɛni mɛnisu eyɛsu etea ʋelei koi ʋoluʋɛ, eɠɛ GALA gooi, Zɛbɛi-Pɛ-Maliɠii, siɛgi zu é ɓɔɛzu la.
6Zunui maaɠilini ga geze zeɠei, é ɠɛni loni ma ɠɔɠɔ ɠiliɠiligi gila kobaʋɛ nɔ, siɛgi zu GALA ge devei veeni la zea ga é li, é abui zeɠe ma ɠɔɠɔ ɠiliɠiligiti zɔɠɔzu, seeluɓɛinti saama. 7Seeluɓɛinti taɠila ge yeemaaleni abui ma, nii maaɓuɠaai ba. É ma lekaiti kula, é zunui yeelaave da, nii maaɠilini ga geze zeɠei, naa ɠula, é li ga tiye. 8Nu ɠɛni nuɓusɛi yeei ma zii ɠaazu seeluɓɛinti koʋegi wu.
9Gè pɛtɛni ga ma ɠɔɠɔ ɠiliɠili naanigɔ ɠɛni ná, gilagila ge seeluɓɛin ɠilagilagi ɠobaʋɛ. Naama ɠɔɠɔ ɠiliɠiligiti ti ɠɛni volozu eɠɛ kɔtu zɔngɔ ɓaagi. 10Ti naanigɔ pɛ ti ɠaazuʋɛti ti ɠulani ga ʋe, eɠɛ ti pɛ ta lɔ ɓɔɠɔ zu, ti ɠilagilagi pɛ. 11Ta la ɠɛna ziaa, ta la zoo liizu lɛkpɛma naanigɔiti pɛ, ʋɛ ná nɛai ti ʋɛ, miná ʋele ɠa ti ɠɛni liizu la, ti ɓɛdɛ la ba ga ti ʋa lati. Ʋɛ ʋelei nɔ seeluɓɛinti tɔungi a lati ná, miná ʋele nɔ ɠa ti ɓena li ná, ti li, ti lati faa la ba. 12Seeluɓɛinti gaazuɠɛzɛiti ti ɠɛni ti-ɓusɛi ʋa ná pɛ, ti-ʋoluʋɛ, ti-yeeiti, ti-ɠoʋegiti, ta ma ɠɔɠɔ ɠiliɠili naanigɔiti pɛ. 13Gè mɛnini, ti daaseigi ʋɛɛni ma ɠɔɠɔ ɠiliɠiligiti ba ga «tɔngɔlɔ fiilɛi». 14Seeluɓɛinti pɛ ti-ɠaazuʋɛ ɠɛni ti ʋa ga naaninaani, gaazu mɔungi ɠɛni eɠɛ seeluɓɛin ɠaazuʋɛ, gaazuʋɛ velesiɛi ɠɛni eɠɛ zunui ɠaazuʋɛ, gaazuʋɛ zaʋasiɛi ɠɛni eɠɛ zalai ɠaazuʋɛ, gaazuʋɛ naanisiɛi ɠɛni eɠɛ koɠɛi ɠaazuʋɛ.
15Seeluɓɛinti ti wuzeɠeni. Ti ɠɛni ga zɛnvu aniiti nɔ gè ti ɠaani ziɛ wolai Keɓaal laaʋɛ. 16Siɛgi zu seeluɓɛinti ta la ɠɛna ziaa la, ti-ɠɔɠɔ ɠiliɠiligiti ti ɠɛni latisu ti ɠoba. Siɛgi zu ti wuzeɠezu la zooi ma ga ti-ɠoʋe, ma ɠɔɠɔ ɠiliɠiligiti ti la ɠɛni ɠulazu ti ʋa. 17Siɛgi zu ti losu da, naati ɓalaa ti lo, ni ta wuzeɠena zooi ma, naati ti wuzeɠe ɠana nɔ, mazɔlɔɔ zɛnvui é ɠɛni zɛnvu aniiti su, naa nɔ ɠa é ɠɛni ma ɠɔɠɔ ɠiliɠiligiti su.
18Ɠɔoɠɔ GALAGI ná-lɛbiyai é volozu, naa zeɠeni GALA sei ʋɛlɛi laaʋɛ, é li, é zɛlɛ seeluɓɛinti maazu. 19Seeluɓɛinti ti ɠoʋe fai lɔɔzeini, ti wuzeɠe zooi ma gàazu, tiya-o, ti-ɠɔɠɔ ɠiliɠiligiti-yo ʋɔɔma. Ti loni Ɠɔoɠɔ GALAGI zei ʋɛlɛi laaʋɛ folo ɠulazu ʋelei. Izilayɛle ná-GALAGI ná-lɛbiyai é volozu, naa ɠɛni ti ʋa, é zɛlɛni maazu. 20Zɛnvu ani naanigɔiti kɛni de, gè ti ɠaani Izilayɛle nà-GALAGI ɠɔɠɔwu, ziɛ wolai Keɓaal ɠobaʋɛ. Gè kwɛɛni ga seeluɓɛinti kɛni de. 21Ti ɠilagilagi pɛ gaazuʋɛ ɠɛni naani, koʋe naanigɔ, nuɓusɛi yeei ma zii ɠɛni ti ʋa ti-ɠoʋegiti bu. 22Ti-ɠaazuʋɛti ti ɠulani ga zɛnvu anii naati gaazuʋɛ, niiti gè ti ɠaani ziɛ wolai Keɓaal ɠobaʋɛ, tiya ɓɔɠɔi nɔ ɠɛni de. Ɛsɛ ge ɠɛni zɔlesu, é ɗa li ga ɠakala ʋelei nɔ.
Currently Selected:
Ezekiyɛle 10: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
