Daniyɛle 4
4
1Nà Neɓukadenɛzaal, gè ɠɛni zeini kpɛ ziilɛigi zu nà-masa pɛlɛi wu, kòozunɛai nà-kpɛtɛi zu. 2Kpidii ta, gè ɠɛni laani nà-betei zu, gè segi ta woni nii é kpɔ̀lɔni, tɔɔzei nii gè kaani, naa ɠa é màaluani. 3Gè devei veeni ga ti Ɓaɓilɔne ɠima nuiti kpein gaalɛ ba pɔ̀ bɛ, naa ɠa a kɛ ti segi naa ʋoluʋɛ lɛ ga ze. 4Siɛgi zu molikula nuiti ti ʋaani la, ta kpaamaazu zoɠoiti, ta adɔɓɛɛ nuiti, ta somideɠa adɔɓɛɛ nuiti, gè nà-segi woni ti ma, kɛlɛ ti tanɔpɛ ge la zooni é ʋa poluʋɛ wo mà. 5Ná tago kɛai ma, Daniyɛle ɓalaagi ʋaani pɔ̀ bɛ. Zunui niigi daasei pɛai ga Ɓɛlɛtasaal, nii kulaai nà-galagi laaseigi zu, nii gala ɲadegaiti ta-yɛnvui su. Gè nà-segi zuɠulani ma, gè ɠɛ ma: 6«Ɓɛlɛtasaal, molikula nuiti ta-ɠundiɠii, gè kwɛni ga gala ɲadegaiti ta-yɛnvui ɠa è zu. Naa ɠa é ba, dɔɔɠuzu vaa nɔpɛ ge la ɓaani è ya. Nii gè kaai segi zu, naa ʋoluʋɛ wo mà. 7Siɛgi zu gè ɠɛni laani la nà-betei zu, pɛtɛ nii gè kaani:
Gulu wolai ta ɠɛni loni zou zaamaʋɛ, gola ɠoozaai.
8Gului naa ɠaaɠoozani, é wɔɔlɔ,
ma ɓeke koozagiti ti ɠɛni vɔɔɠuzu geeɠɔlɔgi ʋa.
É ɠɛni ɠaazu eteai zu ná pɛ.
9Gaalaagi ʋani, gaawaai wola mɔinni,
anii kpein ge ɠɛni ɠɔnɔgi zɔlɔɔsu zea.
Dɔɓɔ zuaiti ti ɠɛni lɔɔɠuzu ma niinigi wu,
wɔniiti ti ɠɛni laɠagiti tosu ma ɓekegiti su.
Kpɛtɛani ɠilagilagi pɛ ge ɠɛni ɠɔnɔgi zɔlɔɔsu zea.
10«Gè yɛni nɔ dɛ laani nà-betei zu, gè geezuɠeelai ta ɠaani mɔnɔ, é ɗa yei, é zeɠe geezuʋɛ. 11É ɓainni ga woo wola, é ɠɛ ma:
‹À gului nii ʋɔ, wo ma ɓekegiti teʋe ga,
wo gaalaagiti folo ga, wo ma waaiti suvaza!
Suaiti ti ɠula bu, ti ʋela, ti maaɠooza ba,
ta wɔniiti ti ɠula ma ɓekegiti ga.
12Kɛlɛ à ma unkpulugi ta ma zapeiti zɛ zooi wu,
tufai zaama dɔɓɔi zu,
wo kɔlu yɔlɔɠɔi velevele ma ta kɔlu ɓɔi yɔlɔɠɔi.
É yɛɓɛ ga geezu nɔɗagi,
ta é laami ga tufai ga suaiti kɛʋele.
13Ná-nuɓusɛ ɠigi ɠa valibo,
sua ɠigi ɠa ve zea,
é yɛ naama yai zu kona dɔfela laawu.
14« ‹Devei nii ɠulaʋɛ geezuɠeelaiti zea, fuluanii niiti ti ɠaazua yeenɔpɛ, naa ɠa a kɛ nii kpein é vulua, naati ti kwɛɛ ga GALA nii é Anii-Pɛ-Unda, nuɓusɛiti ta masadaiti maliɠii ʋe. Toɠa masadai ve naa ya, nii é pɔ, toɠa zoo nɛi é ɓɔɠɔmaayei nui unbuzeɠe nuiti saama.›
15«Segi ɠana gè boni, nɔ̀un nà, masagi Neɓukadenɛzaal. Ɗɛi è ga Ɓɛlɛtasaal, soma è poluʋɛ lɛ ga ze. Nà-masadai zu ɠima nuiti ti taɠila kpalaa ge la zooni è ʋa bo mà, kɛlɛ ɗɔun ɗa zoo, mazɔlɔɔ galagiti ti ɲadegai, naati ta-yɛnvui ɠa é è zu.»
Daniyɛle masagi ná-segi ʋoluʋɛ wo fai
16Daniyɛle nii é lolisu ga Ɓɛlɛtasaal sasuɓalini, é lua ɠite ná-kisiɛiti su, eyɛsu ná tago kɛ sɛ. Masagi ɠɛ ma: «Ɓɛlɛtasaal, segi nii ta poluʋɛ mina è maalua.» Ɓɛlɛtasaal gooɠaaʋoteni, é ɠɛ ma: «Màliɠii, toɠa nɛɛ bɛ̀ ga segi nii ɠɛ ga è zili nuiti tɔnɔ, ta poluʋɛ ɠɛ ga è-ɓɔɛɲɔɠɔiti tɔnɔ! 17Gulu wolai naa è kaai, gaaɠoozaai ta bɔɔlɔai, ma ɓekegi vɔɔɠuzu geei ʋa, ta é ɠɛni ɠaazu eteai zu ná pɛ, 18gulu wolai naa, nii gaalaagi ʋani ta gaawaai wola mɔinni, ɛsɛ pɛ kɔnɔgi ɠɛni zea, dɔɓɔ zuaiti ti ɠɛni lɔɔɠuzu bu, ta wɔniiti ti ɠɛni laɠagiti tosu ma ɓekegiti su, 19ee, masagi, ɗa ɠa è ɓaɠoai, è yeeɠaaɓa, ɗa-ɓaɠoi ɠɛ é zei geei ʋa, ta ɗa-zobodai lia eyɛsu é zeeli zou ɓela ga. 20Naa ʋolu è geezuɠeelai ta ɠaani, é ɗa yei, é zeɠe geezuʋɛ, é devei ve ga: ‹À gulu wolai ʋɔ, wo koloɠolo! Kɛlɛ à ma unkpulugi yɛ ná ta ma zapeiti, tufai zaama dɔɓɔi zu, wo maavelevele ga kɔlu yɔlɔɠɔi ta kɔlu ɓɔi yɔlɔɠɔi. É yɛɓɛ ga geezu nɔɗagi, ti ɓɔ tufai ma ta dɔɓɔ zuaiti kona dɔfela laawu.› 21Poluʋɛ ʋɛtɛ, ee, masagi: GALA nii é Anii-Pɛ-Unda, naa ná-devei ɠa é lo ɗa màliɠii masagi. 22Ta è ɓɛ nuiti saama, ɗa zei dɔɓɔ zuaiti saama, è ɗa tufai mi ga nikɛiti kɛʋele, ɗa yɛɓɛ ga geezu nɔɗagi. Ɗa yɛ naama yai zu eyɛsu kona dɔfela ɓudɛ è maazu, eyɛsu è kwɛɛ ga GALAGI nii é Anii-Pɛ-Unda, nuiti ta-masadaiti maliɠii ʋe, toɠa ɗa masadai ve naama nui ya, nii tɔun ge pɔ. 23Devei bogai ga gulu wolai ma unkpulugi ta ma zapeiti ti yɛ ná, naa ʋoluʋɛ ɠa ga ɗa-masadai ɠa ve è ya, siɛgi zu ɗa kwɛɛna da ga geeɠɔlɔgi zu ƓALAGI ɠa é ga fai pɛ maliɠii. 24Naa ɠa é ba, ee, masagi, yeezei nà-tɛnɛ gooi wu ga pagɔ: Ɓeteʋe ɗa-ɠotoiti ba ta ɗa-vaaɠaazagiti, telebodai ɠɛ, ɠɛ ga nu ʋagɔ maanɔɠɔ nuiti bɛ, tanisu ɗa-undaanɛ voloi zu ɠa ɠooza.»
Segi ʋilɛ fai su
25Nii kpein é woni masagi Neɓukadenɛzaal ná-faa zu, naati ti ʋilɛni su. 26Kona gila teʋegai ma, é yɛni ziɛziɛsu masa pɛlɛi ɠɔmaʋɛ ná ɓɛtɛai ga dooɠo bosuʋɛ, Ɓaɓilɔne taazuʋɛ, 27é wooɠulani, é ɠɛ ma: «Ɓaɓilɔne taa wolai ʋɛtɛ, nii gè toga ga masa seizuʋɛ. Toɠa nà-zobogi wɔɔlɔ ʋelei lɛɛzu, ta sɛ̀bɛi maawui ʋelei.» 28Masagi yɛni nɔ naama ɓɔɛiti bosu, wooi ta zeɠe geezuʋɛ, é ɠɛ ma: «Masagi Neɓukadenɛzaal, woilo niima wooleʋegi ma: Ɗa-masadai ɠulaa è ya! 29Ɗa ɓɛɛzu, è ɠula nuiti saama. È zei dɔɓɔ zuaiti saama, è ɗa tufai mi ga nikɛiti kɛʋele. Ɗa yɛ naama yai zu kona dɔfela laawu, eyɛsu è kwɛɛ ga GALA nii é Anii-Pɛ-Unda, tɔ ɠa é ga nuɓusɛiti ta-masadaiti maliɠii, ta toɠa masadai ve naama nui ya, nii é pɔ.» 30Gaamago nɔ, naama ɓɔɛi ʋilɛni su. Neɓukadenɛzaal ɓɛɛni, é tɔɔzei ga tufai mia ga nikɛiti kɛʋele, é yɛɓɛ ga geezu nɔɗagi. Unma undeɠai ɠoozani eɠɛ koɠɛi ɠoʋe deɠaiti, ta saingiti ti ɠooza eɠɛ wɔni zaingaa.
Neɓukadenɛzaal ná-masadai zɔlɔɔ fai ʋolu
31«Kona dɔfelai ɓegai ma, nà Neɓukadenɛzaal gè ɠaazuloni geeɠɔlɔgi ʋa, faaɠaaɠaa ɠigi veeni bɛ̀. Gè GALA mamani, nii é Anii-Pɛ-Unda ta é vulua ɠɔoɠɔ. Gè tɔɔzeini ga gè ɗa maamusɛ ta gè ɗa ná-lɛbiyai lɛ: Ɓela ge la ná-zobodai ʋa, ta ná-masadai ɠa yɛ ná ɠɔ. 32Etea nuɓusɛiti mɔinʋɛ ʋele-o-ʋele, kɛlɛ ti la ga ani nɔpɛ gaazu, toɠa ɗa ti zo nɔ eɠɛʋelei nɛai la bɛ, é zo geezu aniiti ma, é li nuɓusɛiti pɔ. Nu nɔpɛ ge la loga daalɔɠɔma, ɓaa é ʋa zelilo ma, é ʋa ɠɛ ma: ‹Leeni ɠa è kɛɛzu?›
33«Faaɠaaɠaa ɠigi veeni bɛ̀ názuʋɛ. Nà-masadai ma lɛbiyai vaa zu, masadai ma losuʋɛ ta ma ɠaazu unfegi veeni zèa ɓalaagi. Nà-kundiɠiiti ta nà-botiɠɛ nu wolaiti ti ʋaani ga suvilɛ ti dàaɠomi. Ti sèi ʋolu nà-masadai zu, ta gè lɛbiyai zɔlɔɔni ʋolu, é leʋe ma mɔungi ʋa. 34Naa ɠa é ba niizu, nà Neɓukadenɛzaal, nà geeɠɔlɔgi ma Masagi maamusɛzu, gè guyei loo bɛ, gè dɛbi! Nii kpein é kɛɛzu, ta ga gaamai, ti zɔlegɛ. Zobogi ɠa bɛ é naati maayei, niiti ti ziɛzu wasogi zu.»
Currently Selected:
Daniyɛle 4: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
