Matayo 9
9
Yësu akɔ'jɔ vo keŋe
1Yësu ëkyï mï töŋbö, umu kyëtï ayi zi gawo 'bënï. 2Kora maako'e ikannï zi mo vo keŋe, ëdï ko'do da gburuku. Mati Yësu ongɔ koma 'bëzë, mo iya zi vo keŋe ne henye, “Akyigɔ rë yï wisi, kö'du kyënyë 'bëyï ila ku.” 3Here kya 'ba vo komoyandi'e 'ba kö'dukï'dï iyannï na bi dë nnï henye, “Vere nenye ëdï ko'dɔ sawiya!” 4Ayɔlɔ kö'du sösu 'bëzë ne, Yësu iya henye, “Kö'du a'di ëdï 'e sösu kö'du kyënyë ma here ne mï di'di 'e? 5Ma vala ra ëdï tefe zi kiya, ‘Kö'du kyënyë 'bëyï ila ku,’ mandere zi kiya, ‘Ënyï rïyë alasi?’ 6Mora here akayɔlɔ 'e Wisi 'ba Vïdï ëdï kalakonda aba dakaŋo zi kila kö'du kyënyë. Neene mo iya zi vo keŋe ne, ‘Ënyï rïyë, oba gburuku 'bëyï ï'bë liŋɔ.’” 7Kora ne ënyï rïyë ï'bë gbɔ liŋɔ. 8Mati vïdï kayo ne ongɔ nenye, zë osonnï ndɔ na tere, zë ayetonnï Wïrï, mati ï'dï kalakonda ma here ne zi vïdï.
Yësu ako'jo Matayo
9Mati Yësu ï'bë dagba, mo ongɔ kora ru mo Matayo ëdï lima bi 'ba 'be'bele kö'du. Mo ayada zi mo, “Usu ga ma.” Matayo ënyï rïyë usu gɔ mo. 10Mati Yësu ëdï konyo, wakonyo 'ba kadra kutë liŋɔ 'ba Matayo, vo 'be'bele kö'du kayo vo “kö'du kyënyëë” ayinnï onyonnï wa mo aba, vo lö'bö 'bɔmo ëtï. 11Mati Farasi'e ongɔnnï nenye, zë ako'jonnï ha vo lö'bö'e 'bɔmo, “Kö'du a'di vo komoyandi 'bee onyo wa vo 'be'bele kö'du ëtï ehe vo 'kö'du kyënyë?” 12Mati Yësu owo kö'du nenye, iya henye, “Anza dë vo ra laka'e ra ombannï dukuturu, mora vo rakɔɔ. 13Mora ï'bë ayandi 'e wa nenye mï mo a'di: ‘Momba mïkyëyï, anza wakumu.’ Kö'du mayi dë zi ko'jo vo tëdïja'e, mora vo kö'du kyënyëë.”
Ako'jo ha Yësu kö'du 'ba hakoro
14Neene vo lö'bö'e 'ba Yowani ayi ako'jonnï hɔ mo, “Hala ze Farasi'e ëtï dëdï he ze koro, mora vo lö'bö 'bëyï 'e oro hë nnï dë?” 15Yësu aya'ba henye, Hala yingɔ'e 'ba vo 'bïyësï atɔ'bɔnnï ko'dɔ lu'bë ëzë mo ëdï zë aba? Here kadra mo atayi mati akoba 'bïyësï kazi zë, neene zë akoro hë nnï 'da. 16“Vïdï maako uru bɔngɔ ma kyïyï dë ra bɔngɔ ma kɔɔ, kö'du bɔngɔ ma kyïyï akotɔ 'de kazi bɔngɔ, ako'dɔ bi mati aliza ne ndra na kyënyë. 17Mandere vïdï ope a'ji ma kyïyï dë mï giriba 'ba a'ji ma kɔɔ. Ëzë zë o'dɔnnï here, giriba akaliha, a'ji ataho yaga, giriba 'ba a'ji akayaŋa rë nï. 'E 'e, zë opennï a'ji ma kyïyï mï giriba 'ba a'ji ma kyïyï, 'dö rïyö atëdïnnï na laka.”
Yöku wu'jë nnï mbara vo rakɔɔ aba
18Mati mo ëdï kiya nenye, vo da vïdï maako ayi alɔmvɔ komo mo iya henye, “Wu'jë 'bama oli ku. Mora ayi ï'dï kala yï dɔ mo, mo akadïdï.” 19Yësu ënyï rïyë ï'bënnï mo aba, vo lö'bö 'bɔmo o'dɔnnï kpa here. 20Here mbara maako ëdï na riti, kö'du yama ëdï taho ta rɔ mo kɔɔ 'butë dɔmo rïyö aba, ayi ta kafo mo ise da ha bɔngɔ 'bɔmo. 21Mo iya na bi dë nï henye, “Ëzë mise gbï le nje ra 'bɔngɔ 'bɔmo, akakɔ'jɔ ma.” 22Yësu opi rë nï ongɔ mo, mo iya henye, “Ëdï na kyigɔ wu'jë, Koma 'bëyï akɔ'jɔ yï ku.” Here mbara ne akɔ'jɔ tëmï kadra nani. 23Mati Yësu ödu mï loko 'ba vo da vïdï ne i'ja vo kome këzu kpɔrɔ gu vïdï kayo aba, 24mo iya henye, “Ï'bë 'e 'de. Wu'jë ne oli dë mora ëdï ko'do.” Mora zë ogonnï mo. 25Tapëtï ayasi vïdï kayo ku yaga, mo ï'bë loko ïrï wu'jë ne kala aba, mo ënyï rïyë. 26Kö'du yöyö nenye apere rë nï kpuru biya tëmï dakaŋo nani.
Yësu akɔ'jɔ vo komoköndu rïyö
27Mati Yësu ï'bë dagba ta nani, vo komoköndu rïyö usunnï gɔ mo, ako'jonnï kö'du yaga henye, “Ëdï mïkyëyï aba re ze, Wisi 'ba Dawidi!” 28Mati mo ï'bë loko, kora vo komoköndu ne ayinnï zi mo, mo ako'jo hë zë, “Oma 'e ma tɔ'bɔ zi ko'dɔ nenye?” Zë aya'bannï henye, “Ɔɔ Yere.” 29Neene mo ise kyele komo zë iya henye, “Te zi koma 'bee mo'dɔ rë nï zi ye,” 30komo zë akɔ'jɔ rë nï. Yësu ayada komo zë kazi mïkyëyï iya henye, “Ongɔ 'e te, vïdï maako ma yɔlɔ kö'du nenye dë.” 31Mora zë ï'bënnï yaga aperennï kö'du yöyö kö'du mo biya mï dakaŋo nani.
Yësu akɔ'jɔ kora ma ɔ'bɔ dë zi me'do
32Mati zë ëdïnnï tï'bë yaga, kora mati ëdï dayimona aba ɔ'bɔ dë zi me'do ne ika zi Yësu. 33Mati dayimona ne ore yaga, kora mati ame'do dë ne ame'do gbɔ. Vïdï kayo ne ëdïnnï na rakaga iyannï henye, “Wa maako kaa nenye gba ongɔ dë mï Yiserele.” 34Mora Farasi'e iyannï henye, “Ëdï wisi 'ba vo damöku 'ba dayimona aba ra mo ore dayimona yaga.”
Vo ko'dɔ lɔɔ ëdï gbɔngo
35Yësu ï'bë kpuru biya tëmï gawo daliŋɔ aba, yandi kö'du mï bi mötu 'bëzë 'ba Yuda'e, yëtï kö'du yöyö laka 'ba damöku, kɔ'jɔ biya kyïnë kɔɔ, rakɔɔ aba. 36Mati mo ongɔ vïdï kayo ne, mo ëdï kö'du sösu aba kö'du zë, ga kö'du zë ëdïnnï na riti kazi wakɔnyi, kaa tïmëlë ma kazi vo yako. 37Neene mo iya zi vo lö'bö 'bënï 'e henye, “Wa mï yaka ëdï kyɔ, mora vo ko'dɔ lɔɔ ëdïnnï gbɔngo. 38Ako'jo 'e Yere vo kyeti 'ba wakumu, zi kutu yaga vo ko'dɔ lɔɔ mï yaka wakumu 'bënï.”
Currently Selected:
Matayo 9: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/