Matayo 8
8
Kora vo mönyu
1Mati mo ayi kaŋo ta dakapa döku, kyedre vïdï kayo usunnï gɔ mo. 2Kora vo mönyu ayi alɔdrɔ kaŋo komo mo iya henye, “Yere, ëzë omba, atɔ'bɔ ko'dɔ ma ŋbala.”
3Yësu iza yaga kala nï ise ra kora ne. Mo iya henye, “Momba ku. Ëdï ŋbala!” Kandi akɔ'jɔ mo kazi mönyu 'bɔmo ne. 4Yësu iya zi mo henye, “Ongɔ te ayada dë zi vïdï maako. Mora ï'bë, ayada rë yï zi vo karasa ï'dï wakï'dï mati Mosa ï'dï kö'du mo na wayada zi zë.”
Koma 'ba kyedre 'ba vo kanya
5Mati Yësu ödu mï Kaparanamo, kyedre 'ba vo kanya ayi zi mo, ako'jo kö'du wakɔnyi. 6Mo iya henye, “Yere, vo ko'dɔ lɔɔ 'bama ëdï ko'do liŋɔ na keŋe mï riti kyënyë.”
7Yësu iya zi mo henye, “Ma tï'bë kɔ'jɔ mo.”
8Kyedre 'ba vo kanya aya'ba henye, “Yere, mɔ'bɔ dë komba zi yï tayi hu lembe 'bama. Mora iya nje me'do, vo lïtu 'bama akakɔ'jɔ. 9Kö'du ma na bi da ma kora hu kalakonda, vo kanya'e aba hu ma. Ma yada zi ma nenye, ‘Ï'bë’ mo ï'bë, ma nani, ‘Ayi,’ mo ayi. Miya zi vo lïtu 'bama, ‘O'dɔ nenye,’ mo o'dɔ.”
10Mati Yësu owo nenye, mo na rakaga iya zi zë mati ëdïnnï kusu gë nï ne henye, “Ma yada zi 'e tïnyö, mi'ja vïdï maako dë gba henye mï Yiserele kyedre koma ma here ne aba. 11Miya zi 'e henye na kayo atayi ta humïrë, damïrë akïrï bi lima 'bënnï mï karama Abarayama aba, Yisika ehe Yakoba mï damöku 'ba komorïyë. 12Mora zë 'ba damöku aku'du yaga mï mandölu, bi mati ani kudu ëdï konyo 'ba yingɔ ha aba.”
13Neene Yësu iya zi kyedre 'ba vo kanya ne, “Ï'bë! Ako'dɔ rë nï te kaa mati oma ako'dɔ rë nï.” Vo ko'dɔ lɔɔ 'bɔmo akɔ'jɔ mï kadra nani.
Yësu akɔ'jɔ vïdï kayo
14Mati Yësu ayi liŋɔ 'ba Petero, mo ongɔ wese 'ba Petero o'ba rë nï mï sora zöyï aba. 15Mo ise kala mo zöyï ne ila mo gbɔ, mo ënyï rïyë ayeto lïtu zi mo.
16Mati hutaga ayi, zë mati na kayo ëdïnnï dayimona aba ika zi mo, mo ore yaga lawo me'do aba, akɔ'jɔ vo rakɔɔ ti'de. 17Nenye ëdï zi kinde wa mati ame'do kpuru nëbï Yesaya aba:
“Mo oba rïyë rakɔɔ 'beze
ïnjë kɔɔ 'beze.”
Riti 'ba kusu ga Yësu
18Mati Yësu ongɔ vïdï kayo toko rë nï, mo ï'dï kö'du zi kumu kapa 'ba föfö agamo. 19Neene vo komoyandi 'ba kö'dukï'dï ayi zi mo iya henye, “Vo komoyandi, ma kusu gë yï bi ma ï'bë.”
20Yësu aya'ba henye, “Uhavödö ëdïnnï ogo aba, ali 'ba mï buluku ëdïnnï loko ali aba, mora Wisi 'ba Vïdï anza dë bi aba zi dë nï yako.”
21Vo lö'bö ma vere iya zi mo, “Yere, dagba ï'dï mï'bë kusu 'bu ma.”
22Mora Yësu ayada zi mo henye, “Usu ga ma, ila yökuwë musu yöku 'bënnï.”
Yësu adɔrɔ buluku da wini
23Neene mo ëkyï mï töŋbö vo lö'bö 'bɔmo usunnï gɔ mo. 24Kazi yada komo, buluku kyënyë ayi rïyë da föfö, here wini kagba akyitɔ bi rïyë da töŋbö. Mora Yësu ëdï ko'do. 25Vo lö'bö'e ï'bënnï alironnï mo, iyannï henye, “Yere, ayɔmɔ ze! Dëdï tï'bë zi koli!”
26Mo aya'ba henye, “'E 'ba koma tisi, kö'du a'di 'e na tere?” Neene mo ënyï rïyë amo da buluku ne, wini kagba aba bi gbɔ liwo.
27Neene vïdï ëdïnnï na rakaga ako'jonnï henye, “Kyïnë 'ba vïdï a'di ra ëdï nenye? Gbï le buluku wini kagba aba oronnï mo!”
Kɔ'jɔ 'ba kora rïyö dayimona aba
28Mati mo ɔkɔ kapa agamo mï dakaŋo 'ba Gadarene, vïdï kora rïyö dayimona aba ëdïnnï tayi ta da wogo andɔsi dë nnï mo aba. Zë na nganga vïdï ako ɔ'bɔ dë laga ta gërï nani. 29Zë agbögbö hë nnï henye, “A'di ra omba ze aba, Wisi 'ba Wïrï? Ayi kinye ne zi yaza ze gba kazi kadra mo tɔkɔ?”
30Na kɔwɔ ta rë zë kyedre gɔli 'ba wa'do ëdïnnï wakonyo. 31Dayimona alenzennï Yësu iyannï henye, “Ëzë ore ze yaga, utu ze mï gɔli 'ba wa'do.” 32Mo iya zi zë henye, “Ï'bë 'e.” Here zë asinnï yaga ï'bënnï mï wa'do'e, biya gɔli ne aho kaŋo dakapa bi lunyï mï föfö olinnï mï wini. 33Vo yako 'ba wa'do ahonnï 'de, ï'bënnï mï gawo ayadannï biya nenye, 'dö wa mati o'dɔ rë nï zi kora'e ma dayimona aba. 34Neene vïdï ti'de 'ba mï gawo ï'bënnï yaga zi ki'ja Yësu. Mati zë ongɔnnï mo, zë alenzennï mo zi kila dakaŋo 'bënnï.
Currently Selected:
Matayo 8: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/