Matayo 10
10
Yësu utu yaga vo lö'bö 'butë dɔmo rïyö
1Mo ako'jo vo lö'bö 'bënï 'e 'butë dɔmo rïyö zi nï, ï'dï zi zë kalakonda zi kore yaga lawo kyënyë, zi kɔ'jɔ biya kɔɔ, rakɔɔ aba. 2Nenyee ru 'ba vo lïtu'ë 'butë dɔmo rïyö ne: ma dagba Simona, mati ako'jo Petero, öndu mo Anderiya, Yakoba wisi 'ba Zebedayo, öndu mo Yowani; 3Pilipo, Balatolomoya, Toma, Matayo vo 'be'bele kö'du, Yakoba wisi 'ba Alipaya, Tadayo; 4Simona ma oma nje mï dakaŋo 'bënï ehe Yuda Sikereto ma ogo mo.
Lɔɔ 'ba vo lö'bö 'butë dɔmo rïyö
5Vo lïtu 'butë dɔmo rïyö nenyee Yësu utu yaga kö'du kira aba henye, “Ï'bë 'e dë mï kutë vo Mënzëë mandere tödu mï gawo 'ba Samariya. 6Ï'bë 'e zi tïmëlë tölu 'ba Yiserele. 7Ëzë ï'bë 'e, ayëtï 'e kö'du kise nenye, ‘Damöku 'ba komorïyë ëdï kara.’ 8Akɔ'jɔ 'e vo rakɔɔ, ïnjë 'e yöku, akyitɔ 'e ŋbala zë mati ëdïnnï mönyu aba, ore 'e yaga dayimona. Ïrï 'e na mbiya, ï'dï 'e kpa na mbiya. 9Oba 'e daabo dë mandere mbamba mandere kɔpa mï kɔ'di gee, 10oba 'e aŋboro dë kö'du 'ba lasi, mandere kya bɔngɔ, mandere kamoka'e, mandere përï 'ba lasi, kö'du vo ko'dɔ lɔɔ akï'dï zi mo wa mati mo omba.
11“Ëzë gawo mandere daliŋɔ mati ödu 'e mï mo, oma 'e bi kö'du vïdï ma laka ani alima 'e liŋɔ 'bɔmo le tënyï 'bee. 12Ëzë ödu 'e liŋɔ, ï'dï 'e wamëtë 'bee. 13Ëzë liŋɔ ne ɔ'bɔ, 'bï'dï rakyëyï 'bee ma lawo dɔ mo, ëzë anza dë here, 'bï'dï rakyëyï 'bee ma'ba zi ye. 14Ëzë vïdï maako omba dë kïrï 'e kalakyedre aba mandere zi kowo me'do 'bee, akyitɔ 'e turufu 'de ta ndï 'e, ëzë ila 'e liŋɔ nani mandere gawo. 15Ma yada zi 'e tïnyö, atëdï ndra na laka kö'du Sɔdɔmo Gɔmora aba mï ko'do 'ba vurë ta da gawo nani.
Yësu ame'do kö'du 'ba riti
16“Mëdï kutu 'e yaga kaa tïmëlë mï kutë wölïwölï. Hereene ëdï 'e kö'du yɔlɔ aba kaa wiri'e na liyaa kaa atu'bu'e. 17“Ongɔ 'e ree laka kö'du 'ba vïdï, zë akï'dï 'e zi kanisala akakpökyï 'e mï bi mötu 'bënnï 'ba Yuda'e 18kö'du ma. Akika 'e komo gɔvona'e vo damöku ëtï na vo kiya zi zë, zi vo Mënzëë. 19Mora ëzë zë ïrïnnï 'e, asösu 'e dë a'di ra zi kiya, mandere hala zi kiya mo. Mï kadra nani akï'dï zi 'e a'di ra zi kiya, 20kö'du atanza dë 'e ra zi me'do, mora Lawo 'ba 'Bu 'e ra ame'do kpuru 'e.
21“Öndu akogo öndu zi koli, 'bu wisi 'bënï, gisi atënyïnnï kamo aba da vo ko'jo 'bënnï akï'dï zë zi koli. 22Vïdï biya akiyi 'e ga kö'du ma, mora mo mati ɔrɔ ŋbïrï mï ndundu mo akayɔmɔ. 23Ëzë ayaza 'e mï bi kölö, aho 'e zi ma vere. Ma yada zi 'e tïnyö, akindee dë tï'bë kpuru tëmï gawokyedree 'ba Yiserele gba kazi Wisi 'ba Vïdï tayi.
24“Vo kö'du ko'jo anza dë rïyë da vo komoyandi 'bënï, mandere vo lïtu anza dë rïyë da kyedre 'bënï. 25Here ëdï ndɔ kö'du vo ko'jo kö'du zi tëdï kaa vo komoyandi 'bënï, vo lïtu kaa kyedre 'bënï. Ëzë vo da dakota ako'jo Belezobubu, hala ndra vïdï 'ba dakota 'bɔmo!
Tere kazi ëyï
26“Here eree zë dë. Wa maako anza dë na ha 'ba'ba mati akayëhu dë, mandere na koho mati ako'dɔ dë na yɔlɔ. 27Wa mati ma yada zi 'e mï mandölu, ame'do 'e mï bikanyi, wa mati akali mï mbili 'e, ayëtï 'e ta komo lembee. 28Eree dë kazi zë mati ëdïnnï kofo ida ra mora ɔ'bɔnnï dë kofo lawo. Here eree kazi Mo mati ɔ'bɔ yaŋa 'dö lawo ida ra aba mï wa'do. 29Anza dë silɔ rïyö ogo yaga da tarifa kölö? Here ma kölö tëmï zë akalëpï dë dakaŋo dakapa kazi da kö'du komba 'ba 'Bu 'e. 30Gbï le yëvu 'ba dee ëdïnnï biya na kiti. 31Here eree dë, ëdï 'e ndra laka ta da silɔ kayo.
Kö'du kyënyë yasi Yësu komba dë aba
32“Here mo mati iya ma 'bënï komo vïdï kayo, ma kiya kö'du mo kpa komo 'Bu ma mï komorïyë. 33Mora mo mati omba ma dë komo vïdï kayo, ma komba mo kpa dë komo 'Bu ma mï komorïyë.
Anza rakyëyï ra dë wa ne kulu ra
34“Asösu 'e dë mayi zi kika rakyëyï zi dakaŋo. Mayi dë zi kika rakyëyï, mora kulu. 35Mayi zi kofɔ vïdï kora ra 'bu nï, wu'jë ra ma nï, mbara koze ra wese. 36Vo wehee 'ba vïdï atëdï akpa vïdï 'ba dakota 'bɔmo.
37“Vïdï mati ɔwɔ 'bu nï mandere ma nï ndra ta da ma, ɔ'bɔ dë zi tëdï na 'bama. Vïdï mati ɔwɔ wisi kora 'bënï mandere wisi wu'jë ndra ta da ma, ɔ'bɔ dë zi tëdï na 'bama. 38Vïdï mati oba taka 'bënï dë kusu ga ma ɔ'bɔ dë zi tëdï na 'bama. 39Vïdï mati i'ja dïdï nï akayölu, vïdï mati ayölu dïdï nï kö'du ma aki'ja.
Biriti
40“Mo mati ïrï 'e, ïrï ma, mo mati ïrï ma, ïrï mo mati utu ma. 41Vïdï ma ïrï nëbï ga kö'du mo nëbï akïrï biriti 'ba nëbï, mo mati ïrï kora tëdïja ga kö'du mo ëdï kora tëdïja akïrï biriti 'ba kora tëdïja. 42Ëzë vïdï mati ï'dï gbï le nje sikɔ 'ba wini kyëyï, zi ma sisi kölö nenyee ga kö'du mo vo lö'bö 'bama, ma yada zi 'e tïnyö, mo ayölu biriti 'bënï dë.”
Currently Selected:
Matayo 10: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/