Matayo 7
7
Ko'dɔ vurë 'ba oka'e
1O'dɔ vurë dë, mandere yï kpa ako'dɔ vurë rë yï. 2Kö'du mï gërï kölö ne mati o'dɔ vurë 'ba oka'e, ako'dɔ vurë rë yï, wayeri mati o'dɔ, akayeri zi yï. 3“Kö'du a'di ongɔ bi da ngayo 'ba turufu mï kyele komo 'ba öndu yï ongɔ bi dë zi kulugbu kyedre mï kyele komo yï ne? 4Hala atɔ'bɔ kiya zi öndu yï, ‘Ï'dï moba ngayo ne yaga ta kyele komo yï,’ mati biya tëmï kadra ne kulugbu kyedre ëdï mï kyele komo yï? 5Yï vo komokandi kyënyë ne, dagba oba kulugbu ne yaga ta kyele komo yï, zi kongɔ bi na laka zi koba ngayo ne ta kyele komo öndu yï. 6“Ï'dï dë zi wïhï'e wa mati ëdï na koro, U'du jewele 'bëyï dë zi wa'do'e. Ëzë o'dɔ here, zë akutunnï dë zë hu ndï nnï, akopi akiza yï na nzoyi.
Ako'jo, oma, akökö
7“Ako'jo akï'dï zi yï, oma aki'ja, akökö, ha loko akayëhu zi yï. 8Kö'du vïdï biya mati ako'jo akïrï, mo mati oma aki'ja, zi mo mati akökö, ha loko akayëhu.
9“Ma vala tëmï 'e, ëzë wisi 'bɔmo ako'jo mangɔlɔ'bɔ, akï'dï zi mo yïtö? 10Mandere ëzë mo ako'jo kyenze, akï'dï zi mo wiri. 11Ëzë yï, ëdï le vo kö'du kyënyë, ayɔlɔ hala zi kï'dï, wakï'dï ma laka zi gisi 'bëyï, hala ndra 'Bu 'e mï komorïyë akï'dï, wakï'dï ma laka zi zë mati ako'jonnï hɔ mo! 12Here mï wa ti'de, o'dɔ zi oka'e wa mati omba zë zi ko'dɔ zi yï, kö'du nenye adrɔko kö'du kise 'ba kö'dukï'dï nëbï ëtï.
13“Ödu 'e kpuru ta ha resi ma tisi. Kö'du kyedre ëdï ha resi, kyedre ëdï gërï mati agaga zi wayaŋa, na kayo ödu kpuru 'dɔmo. 14Mora tisi ëdï ha resi, gërï 'bili ne agaga zi dïdï, nje tisiwa aba ra aki'ja.
Kaga lɔgɔ nï aba
15“Komo 'e 'bandi kö'du nëbï'e 'ba vo ndɔndɔ. Zë ayinnï zi 'e mï bɔngɔ 'ba tïmëlë, mora mï zë ëdïnnï tuku wölïwölï. 16Mora lɔgɔ 'bëzë aba akayɔlɔ 'e zë. Vïdï ëdïnnï ko'di lɔgɔ kazi kono möku, mandere kyëlu kazi oha? 17Mora kpa here biya kaga ma laka ana lɔgɔ ma laka, mora kaga ma kyënyë ana lɔgɔ ma kyënyë. 18Kaga ma laka ɔ'bɔ dë tana lɔgɔ ma kyënyë, kaga ma kyënyë ɔ'bɔ dë tana lɔgɔ ma laka. 19Biya kaga mati ana lɔgɔ ma laka dë akiga kaŋo aku'du mï wa'do. 20Here lɔgɔ 'bëzë aba akayɔlɔ zë.
21“Anza biya vïdï ma iya zi ma, ‘Yere, Yere,’ atödu mï damöku 'ba komorïyë, mora nje mo mati o'dɔ da kö'du komba 'ba 'Bu ma mati ëdï mï komorïyë. 22Na kayo akiya zi ma mï ko'do nani, ‘Yere, Yere, ze ra dë dumë kö'du mï ru yï, mï ru yï kore dayimona yaga, ko'dɔ kö'du koro kayo?’ 23Neene ma kayada zi zë huwë, ‘Ma yɔlɔ 'e dë. Ï'bë'e 'de ta ra ma, 'e vo ko'dɔ kö'du kyënyëë!’
Vo ko'ba loko rïyö
24“Hereene vïdï biya mati owo me'do 'bama nenyee ï'dï zë mï gɔmoyɔnzɔ, ëdï kaa kora vo kö'du yɔlɔ mati o'ba loko 'bënï da ṛï'dï. 25Mïrë ayi kaŋo, lili osonnï, buluku aluku otra rë nï ra loko nani, alöru dë, ga kö'du ëdï hu nï aba da ṛï'dï. 26Mora vïdï biya mati owo me'do 'bama nenyee ï'dï dë mï gɔmoyɔnzɔ ëdï kaa kora vo lumë mati o'ba loko 'bënï da yayi. 27Mïrë ayi kaŋo, lili osonnï, buluku aluku otra rë nï ra loko nani, alöru na löru kyënyë.”
28Mati Yësu inde kiya kö'du nenyee, vïdï kayo na rakaga mï kö'du yandi 'bɔmo, 29ga kö'du mo ayandi kö'du kaa vïdï ma ëdï kalakonda aba, anza dë kaa vo komoyandi'e 'bëzë 'ba kö'dukï'dï.
Currently Selected:
Matayo 7: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/