Matayo 6
6
Wakï'dï zi vïdï
1“Andi ree laka anza dë zi 'e ko'dɔ tëdïja 'bee komo vïdï, zi zë kongɔ. Ëzë o'dɔ 'e here, atanza 'e dë biriti aba kazi 'Bu 'e mï komorïyë.
2“Ëzë ï'dï wa zi vïdï ayöyö kö'du dë more kome aba, kaa vo komokandi'e ëdïnnï ko'dɔ mï bi mötu 'ba Yuda'e, da gërï zi vïdï koronnï. Ma yada zi 'e tïnyö, zë ïrïnnï biriti 'bënnï ku ndɔ. 3Mora ëzë ï'dï wa zi vïdï, ï'dï kala yï ma gali ma yɔlɔ dë wa mati kala yï ma tïrï ëdï ko'dɔ, 4here wakï'dï 'bëyï ne 'bëdï na liwo. Neene 'Bu yï, ongɔ wa mati o'dɔ liwo ne, akï'dï biriti zi yï.
Mötu ko'dɔ
5“Ëzë ëdï 'e mötu, anza 'e dë kaa vo komokandi'e, kö'du zë ɔwɔnnï zi mötu ta bi tɔrɔ mï bi mötu 'ba Yuda'e, bi golo'bɔ 'ba gërï zi vïdï kongɔ. Ma yada zi 'e tïnyö, zë ïrïnnï biriti 'bënnï ku ndɔ. 6Mora ëzë omba mötu, ï'bë mï loko 'bëyï, isi ha loko amötu zi 'Bu yï, mati ongɔ dë ne. Neene 'Bu yï, ongɔ wa mati o'dɔ liwo ne, akï'dï biriti zi yï. 7Ëzë ëdï 'e mötu adelee mï me'do dë kaa vïdï ma ayɔlɔnnï Wïrï dë, kö'du zë asösu 'bënnï akowonnï ga kö'du 'ba me'do kayo 'bënnï ne. 8Anza 'e dë kaa zë, kö'du 'Bu 'e ayɔlɔ wa mati omba 'e ne ku gba kazi ako'jo 'e mo dë.
9“Nenye ëdï hala zi 'e mötu:
‘'Bu ze mï komorïyë,
ru yï 'bëdï na koro,
10damöku 'bëyï 'bayi,
kö'du 'bëyï 'bo'dɔ rë nï mï dakaŋo kaa mati ëdï mï komorïyë.
11Ï'dï zi ze ndenye wakonyo 'beze ma 'duwï.
12Ila ze ga kö'du kyënyë 'beze, kaa ze kpa dila oka zee.
13Ika ze dë mï wayɔnzɔ, mora akɔnyi ze kazi Satani.’
14Kö'du ëzë ila 'e vïdï mati zë o'dɔnnï kö'du kyënyë ree, 'Bu 'e komorïyë akila 'e kpa. 15Mora ëzë ila 'e vïdï dë ga kö'du kyënyë 'bëzë, 'Bu 'e ila kö'du kyënyë 'bee dë.
Hakoro
16“Ëzë ëdï hee koro, ayaŋa da komo 'e dë kaa vo komokandi'e ëdïnnï ko'dɔ, kö'du zë uwï komo nnï zi yada zi vïdï nëdï hë nnï koro. Ma yada zi 'e tïnyö, zë ïrïnnï biriti 'bënnï ku ndɔ. 17Mora ëzë ëdï 'e hee koro, ï'dï 'e yënï dee, akaka komo 'e, 18here kazi ëdï na yɔlɔ zi vïdï ëdï 'e hee koro, mora nje zi 'Bu 'e mati ongɔ dë, 'Bu 'e mati ongɔ wa mati o'dɔ 'e liwo, akï'dï biriti zi ye.
Wakulu mï komorïyë
19“Ulu 'e ha wa dë zi 'e dakaŋo, bi mati malödö wa lëndrë aba ayaŋa, bi mati vo logo'e ödunnï mï loko alogonnï. 20Mora ulu 'e rïyë kö'du 'e wakulu mï komorïyë, ga bi mati malödö wa lëndrë aba ayaŋa dë, vo logo'e ödunnï dë mï loko wa logo. 21Kö'du bi mati wakulu 'bëyï ëdï, ani di'di yï atëdï kpa.
22“Kyele komo ra ëdï na lamba 'ba ida ra. Ëzë kyele komo yï ëdïnnï na laka, ida rë yï biya atëdï ndɔ na bikanyi. 23Mora ëzë kyele komo yï ëdïnnï na kyënyë, ida rë yï biya atëdï ndɔ na mandölu. Ëzë bikanyi mï yï ëdï na mandölu, hala kyedre ëdï mandölu nani!
Wïrï dakaŋo aba
24“Vïdï maako ɔ'bɔ dë lïtu zi kyedre rïyö. Mo akiyi ma kölö atɔwɔ agamo, mandere mo akï'dï rë nï zi ma kölö akongɔ bi kaŋo da agamo. Ɔ'bɔ dë lïtu 'dö zi Wïrï kɔhi aba.
25“Ma yada zi ye, asösu 'e kö'du 'ba dïdï 'e dë, wa mati akonyo 'e mandere akuwë 'e, mandere kö'du ida ree, wa mati akusu 'e. Dïdï ra anza dë ndra na laka ta da wakonyo, ida ra ndra na laka ta da bɔngɔ'e? 26Ongɔ 'e bi te da ali'e 'ba mï buluku, zë ïyïnnï wa dë, mandere kumu mandere kï'dï mï lɔ'bi, 'Bu 'e komorïyë ulu zë. Anza 'e dë ndra na laka ta dë zë? 27Ëyï ra tëmï 'e kö'du sösu aba atɔ'bɔ dö'du kadra kölö zi dïdï 'bënï?
28“Kö'du a'di ëdï 'e sösu kö'du bɔngɔ'e? Ongɔ 'e te hala döru'e 'ba möku övu. Zë o'dɔnnï lɔɔ dë mandere kuru. 29Ma yada zi 'e henye, gbï le Solomono mï wadakayo ti'de 'bënï aba usu bɔngɔ dë kaa ma kölö 'ba ma nenyee. 30Ëzë nani ëdï hala Wïrï usu bɔngɔ ra loma'e 'ba möku, mati ëdï kinye ndenye mïndö aba u'du mï wa'do, mo anza dë ndra kusu ree, akɔ, 'e 'ba koma tisi ra? 31Asösu 'e kö'du dë, kiya mo aba henye, ‘A'di ra da konyo ze?’ mandere ‘A'di ra da kuwë ze?’ mandere ‘A'di ra da kusu ze?’ 32Kö'du vïdï ma kazi yɔlɔ Wïrï aho ga wa biya nenyee, 'Bu 'e komorïyë ayɔlɔ henye, omba 'e zë. 33Mora oma 'e dagba damöku 'bɔmo tëdïja 'bɔmo, wa biya nenyee akï'dï kpa zi ye. 34Hereene asösu 'e kö'du 'ba mïndö dë, kö'du mïndö akasösu kö'du 'ba rë nï. Ko'do kölö ëdï kyɔ riti 'bënï aba.”
Currently Selected:
Matayo 6: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/