Matayo 5
5
Kö'du yëtï da döku
1Yaanya aba mati mo ongɔ vïdï kayo, mo ï'bë rïyë dakapa döku alima kaŋo. Vo lö'bö'e 'bɔmo ayinnï zi mo, 2mo ayeto yandi zë iya henye:
3Vïdï 'ba ya'da'e ra na leri mï lawo, kö'du 'bëzë ëdï damöku 'ba komorïyë.
4Vïdï 'ba ya'da'e ra na lu'bë, kö'du akayëyï zë.
5Vïdï 'ba ya'da'e ra dakumbë aba,
kö'du zë akïrïnnï wapëtïkala 'ba dakaŋo.
6Vïdï 'ba ya'da'e ra vïdï ma na o'bo, na kɔdrɔ
kö'du tëdïja, kö'du akoso zë.
7Vïdï 'ba ya'da'e ra vïdï ma mïkyëyï kyedre aba,
kö'du akayada zi zë mïkyëyï.
8Vïdï 'ba ya'da'e ra ëdïnnï kyeli mï di'di,
kö'du zë akongɔnnï Wïrï.
9Vïdï 'ba ya'da'e ra vo ko'dɔ kö'du rakyëyï, kö'du akako'jo zë gisi 'ba Wïrï.
10Vïdï 'ba ya'da'e ra mati ayaza zë ga kö'du tëdïja,
kö'du 'bëzë ëdï damöku 'ba komorïyë.
11Vïdï 'ba ya'da'e ra 'e mati vïdï alidi 'e, yaza 'e ndɔndɔ kiya biya kyïnë 'ba kö'du kyënyë aba ree ga kö'du ma. 12Alɔŋɔ 'e, ëdï 'e rakyenyi aba, ga kö'du kyedre biriti 'bee ëdï mï komorïyë, kö'du mï gërï kölö ne, zë ayazannï nëbï'e mati dagba ta komo 'e ne.
Yɔ'dɔ bikanyi aba
13'E ra yɔ'dɔ 'ba dakaŋo. Mora ëzë yɔ'dɔ ayaŋa yɔkɔ nï ku, hala atɔ'bɔ ko'dɔ yɔkɔ löhu? Anza dekpe na laka kö'du wa maako, nje zi ku'du yaga zi vïdï kutu dɔ mo.
14'E ra bikanyi 'ba damöku. Gawokyedre da lutu ɔ'bɔ dë zi koho. 15Vïdï owi lamba dë kï'dï mo hu sikɔ. Tagɔmo zë ï'dïnnï da watɔrɔ 'bɔmo, zi kï'dï bikanyi zi vïdï biya 'ba mï loko ne. 16Mï gërï kölö ne, ï'dï bikanyi 'bee 'bayanyi ga bi komo vïdï, here zë 'bongɔnnï ko'dɔ kö'du laka 'bee ne zi yeto 'Bu 'e mï komorïyë.
Kinde 'ba kö'dukï'dï
17Asösu 'e dë henye, mayi zi kila kö'dukï'dï mandere nëbï'e, mayi dë zi kila zë, mora zi kinde zë. 18Ma yada zi 'e tïnyo, le komorïyë dakaŋo aba alaya dë, anza dë ï'jö waraga ma tisi, le wayöru tisi 'ba galama, mï gërï maako akalaya dë tëmï kö'dukï'dï le ëzë wa ti'de inde ku. 19Vïdï ma apere kölö 'ba wa ma tisi 'ba kö'dukï'dï nenyee, ayandi agamo'e zi ko'dɔ te here, akako'jo tisiwa aba mï damöku 'ba komorïyë. Mora mo mati ayɔnzɔgɔmo ayandi kö'dukï'dï nenyee, akako'jo kyedre mï damöku 'ba komorïyë. 20Kö'du ma yada zi 'e henye, nje ëzë tëdïja 'bee ëdï na laka ta da Farasi'e, vo komoyandi'e 'ba kö'dukï'dï, ödu 'e dë mï damöku 'ba komorïyë.
Kofo vïdï
21Owo 'e ku henye, iya zi vïdï ma kyere nani, “Ofo vïdï dë, vïdï mati ofo vïdï, akika mo mï vurë.” 22Mora ma yada zi 'e henye, vïdï mati ëdï na kamo öndu nï aba akika mo mï vurë. Löhu, vïdï mati iya zi öndu nï, “Yï wayawa ra,” akika mo mï vurë ma kyedre 'ba Yuda'e. Mora vïdï mati iya henye, “Yï vo lumë,” atëdï mï riti 'ba wa'do 'ba gehena.
23Hereene, ëzë ëdï kï'dï wakï'dï 'bëyï da karasa, asösu öndu yï ëdï kö'du aba rë yï, 24ila wakï'dï 'bëyï ne ani komo karasa. Dagba ï'bë odrɔ hë yï zi öndu yï, neene ayi ï'dï wakï'dï 'bëyï ne 'da. 25Inde kö'du 'bee ne kandi vïdï mati asusu yï aba, mati ëdï koba yï mï vurë. O'dɔ ëzë ëdï 'e gba mo aba da gërï, mandere mo akï'dï yï zi vo vurë, vo vurë akï'dï yï zi vo kyëlu, aku'du yï mï kamba. 26Ma yada zi yï tïnyö, ayasi yï dë yaga le ëzë opi ndundu 'ba kɔhi ne.
Ndoro
27Owo 'e ku iya henye, “O'dɔ ndoro dë.” 28Mora ma yada zi 'e henye, vïdï mati ongɔ bi da mbara zi tëdï na 'bënï o'dɔ ndoro ku nzɔ mo aba mï di'di nï. 29Ëzë kyele komo yï ma tïrï o'dɔ yï zi ko'dɔ kö'du kyënyë, oba yaga u'du 'de. Ëdï na laka kö'du zi yï yölu kapa ma kölö 'ba ida rë yï ta da ida rë yï biya zi ku'du mï gehena. 30Ëzë kala yï ma tïrï o'dɔ yï zi ko'dɔ kö'du kyënyë, ikye yaga u'du 'de. Ëdï na laka kö'du zi yï yölu kapa ma kölö 'ba ida rë yï ta da ida rë yï biya zi tï'bë mï gehena.
Mbara yëyï
31“Iya henye, 'Vïdï mati ayëyï mbara 'bënï mï'dï zi mo waraga 'ba rayëyï.” 32Mora ma yada zi 'e vïdï mati ayëyï mbara 'bënï, nje kö'du ma 'beri kazi koma, o'dɔ mo zi tayi na vo ndoro, vïdï mati oze mbara mati ayëyï ne o'dɔ ndoro.
Lömu
33“Löhu, owo 'e iya henye zi vïdï mati kyere nani, 'Owe lömu 'bëyï dë, mora asesi lömu 'bëyï mati o'dɔ ne zi Yere. 34Mora ma yada zi yï, alömu dë: komorïyë aba, kö'du ëdï kyïtï 'ba Wïrï, 35mandere dakaŋo aba, kö'du ëdï gba'da 'ba ndï mo, mandere Yerusalema, kö'du ëdï gawokyedre 'ba Kyedre vo damöku. 36Alömu dë ra dë yï, kö'du ɔ'bɔ dë ko'dɔ yëvu ma kölö na kanyi mandere na köndu. 37Here ï'dï 'Ɔɔ, 'bëyï 'bëdï 'Ɔɔ, hɔɔ 'bëyï 'bëdï hɔɔ, wa maako ndra ta kafo ma nenye, ayi kazi Satani.”
Kyele komo kyele komo aba
38“Owo 'e iya henye, ‘Kyele komo, kyele komo aba, yingɔ ha yingɔ ha aba.’ 39Mora ma yada zi yï, Aya'ba da kö'du kyënyë dë zi vïdï ma o'dɔ kö'du kyënyë. Ëzë vïdï maako isa lɔ'bɔ yï ma tïrï, opi zi mo kapa agamo kpa. 40Ëzë vïdï maako ïrï yï mï vurë omba zi gëmïsï 'bëyï koba, ï'dï mo 'boba jalabiya 'bëyï kpa.” 41Ëzë vïdï maako o'dɔ yï na wehe zi tï'bë wiṛi kölö, ï'bë 'e mo aba wiṛi rïyö. 42Ï'dï zi mo mati ako'jo hë yï, ofɔ gë yï dë zi mo mati omba koba wa tikɔ kazi yï.
Ɔwɔ vo wehee
43“Owo 'e iya henye, ‘Ɔwɔ vo haliŋɔ oka 'bëyï iyi vo wehe 'bëyï.’ 44Mora ma yada zi ye: Ɔwɔ vo wehee 'bee, amötu 'e kö'du zë mati ayaza 'e, 45here atëdï 'e na gisi 'ba 'Bu 'e mï komorïyë. Mo o'dɔ kadra 'bënï zi tasi da vïdï kyënyë ma laka aba, utu mïrë da vïdï ma tëdïja da vïdï ma kazi tëdïja aba. 46Ëzë ɔwɔ zë mati ɔwɔnnï yï, biriti a'di ra aki'ja? Gbï le vo kɔhi kozee o'dɔnnï dë here? 47Ëzë amëtë nje öndu'e 'bëyï, a'di ra ëdï ko'dɔ ndra ta da agamo'e? Gbï le vïdï ma kazi Wïrï yɔlɔ o'dɔnnï dë here? 48Ëdï 'e na koro kaa 'Bu 'bee komorïyë ëdï na koro.”
Currently Selected:
Matayo 5: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/