Matayo 4
4
Yɔnzɔ 'ba Yësu
1Neene Lawo agaga Yësu mï dalïpï zi Satani mo yɔnzɔ. 2Tapëtï hakoro ko'do 'butësowɔ, yɔndɔ 'butësowɔ, mo ëdï na o'bo. 3Vo wayɔnzɔ ayi zi mo iya henye, “Ëzë ëdï na Wisi 'ba Wïrï, ayada zi yïtö nenyee zi tayi na mangɔlɔ'bɔ.”
4Yësu aya'ba henye, “Ëdï na yöru: ‘Vïdï alima dë nje ra mangɔlɔ'bɔ, mora biya da me'do mati ayi ta ha Wïrï.’”
5Neene Satani oba mo zi gawokyedre koro ï'dï mo tɔrɔ le rïyë da tɔlɔ 'ba yëkëlu. 6Mo iya henye, “Ëzë ëdï na Wisi 'ba Wïrï, umë rë yï kaŋo. Kö'du ëdï na yöru: ‘Mo akï'dï kö'du zi malayika'e 'bënï kö'du yï, zë akïnjënnï yï rïyë mï kala nnï, here kazi otra ndï yï ra yïtö.’” 7Yësu aya'ba zi mo henye, “Ëdï kpa na yöru: ‘Ï'dï Yere Wïrï 'bëyï dë zi wayɔnzɔ.’”
8Löhu, Satani oba mo rïyë da döku konda ayada zi mo biya damöku'e 'ba damöku laka 'bëzë aba. 9Mo iya henye, “Biya nenye ma kï'dï zi yï, ëzë ïdë rë yï kaŋo mötu ma.” 10Yësu iya zi mo, “Ehe 'de ta ra ma, Satani! Kö'du ëdï na yöru: ‘Amötu Yere Wïrï 'bëyï, alïtu nje zi mo.’” 11Neene Satani ila mo, malayika'e ayinnï akɔnyinnï mo.
Yësu ayeto zi kö'du yëtï
12Mati Yësu owo ï'dï Yowani ku mï kamba, mo a'ba Galilaya. 13Ila Nazereta, mo ï'bë alima mï Kaparanamo, mati ëdï dakapa föfö mï bi 'ba Zebuluna, Napatali aba, 14zi kinde wa mati iya kpuru nëbï Yesaya.
15“Dakaŋo 'ba Zebuluna, dakaŋo 'ba Napatali aba, gërï ma zi ranga, dakapa Yeredene, Galilaya 'ba vo Mënzëë,
16vïdï ma ëdïnnï lima mï mandölu ongɔnnï bikanyi kyedre ku, zë mati ëdïnnï lima mï dakaŋo 'ba galïlï 'ba koli bikanyi anyi ku.”
17Tëmï kadra nani dagba ani, Yësu ayeto kö'du yëtï, iya henye, “Otɔ dee, ga kö'du damöku 'ba Wïrï ëdï kara.”
Ko'jo 'ba dagba vo lö'bö'e
18Mati Yësu ëdï lasi ta dakapa Ranga 'ba Galilaya, mo ongɔ öndu'e rïyö, Simona ma ako'jo Petero, öndu nï Anderiya aba. Zë ëdïnnï ku'du öndu mï föfö, kö'du zë kora 'ba vo kïrï kyenze. 19Yësu iya henye, “Ayi usu 'e ga ma, ma ko'dɔ 'e na vo kïrï 'ba vïdï.” 20Kandi zë ilannï öndu 'bënnï usunnï gɔ mo.
21Tï'bë dagba ta nani, mo ongɔ öndu rïyö agamo'e, Yakoba wisi 'ba Zebedeyo öndu nï Yowani aba. Zë ëdïnnï mï töŋbö 'bu nnï Zebedeyo ëtï, kɔ'jɔ öndu 'bënnï. Yësu ako'jo zë, 22kandi zë ilannï töŋbö, 'bu nnï, ehe usunnï gɔ mo.
Yësu akɔ'jɔ vo rakɔɔ
23Yësu ï'bë kpuru Galilaya, yandi kö'du mï bi mötu 'bëzë, yëtï kö'du yöyö laka 'ba damöku, akɔ'jɔ ti'de kyïnë kɔɔ, rakɔɔ mï kutë vïdï aba. 24Kö'du yöyö ga kö'du mo apere rë nï biya mï Siriya, vïdï ikannï zi mo ti'de zë mati na rakɔɔ kyïnë 'ba kɔɔ aba kutu kutu, zë mati na riti kazi watɔɔ, zë mati dayimona aba, zë mati limo aba, vo keŋe, mo akɔ'jɔ zë. 25Vïdï kayo ta Galilaya, Dekapoli, Yerusalema, Yuda bi mati kyëtï Yeredene usunnï gɔ mo.
Currently Selected:
Matayo 4: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/