Matayo 3
3
Yowani Bapatisi akɔ'jɔ gërï
1Mï ko'do nani'e Yowani Bapatisi ayi, yëtï kö'du mï dalïpï 'ba Yuda, 2iya henye, “Otɔ dee tëmï kö'du kyënyë, ga kö'du damöku 'ba komorïyë ëdï kara.” 3Nenye ëdï mo mati ëdï me'do kö'du mo kpuru nëbï Yesaya:
“Gu 'ba vïdï ëdï wa ko'jo mï dalïpï,
'Akɔ'jɔ 'e gërï zi Yere,
o'dɔ 'e gërï mbïyï kö'du mo.”
4Bɔngɔ 'ba Yowani o'dɔ tëmï yövu 'ba jemele, mo ëdï gasi wana aba toko götö nï. Wakonyo 'bɔmo ëdï wömï yazi 'ba möku aba. 5Vïdï ï'bënnï yaga zi mo ta Yerusalema, ti'de ta Yuda, ehe biya ta dakaŋo 'ba Yeredene. 6Zë odrɔ hë nnï ga kö'du kyënyë 'bënnï, mo abapatisi zë mï Ranga Yeredene.
7Mora mati mo ongɔ Farasi kayo, Sadeke ëtï tayinnï bi mati mo ëdï kï'dï bapatisi ne, mo iya zi zë, “'E gisi 'ba wiri kalabete! Ëyï ra ayada komo 'e zi taho kazi kamo ma atayi ne? 8Ana 'e lɔgɔ mï sesi 'ba dakotɔ aba. 9Asösu 'e dë atɔ'bɔ 'e kiya zi 'e na bi dee, ‘Dëdï Abarayama aba na 'bu ze.’ Ma yada zi 'e henye, yaga tëmï yïtö nenyee Wïrï atɔ'bɔ kïnjë rïyë gisi ga kö'du Abarayama. 10Lɔgɔ ëdï nzɔ hu ngara'da 'ba kaga'e, biya kaga mati ana lɔgɔ ma laka dë akiga kaŋo aku'du mï wa'do.
11“Ma bapatisi 'e wini aba ga kö'du dakotɔ. Mora tapëtï ma atayi vïdï mati ëdï ndra na kyigɔ ta da ma, kamoka 'bɔmo mɔ'bɔ dë zi kïnjë. Mo akabapatisi 'e Lawo Kölö Laka aba ehe wa'do. 12Sërï 'bɔmo ëdï mï kala mo, mo akakyitɔ dakaŋo 'ba ku'bö nyenyo 'bënï, akatɔtɔ nyenyo 'bënï mï lɔ'bi, ako'bɔ turu mo yaga mï wa'do ma kazi tölu.”
Bapatisi 'ba Yësu
13Yësu ayi ta Galilaya Yeredene zi Yowani nï bapatisi. 14Mora Yowani ayɔnzɔ zi yata mo, iya henye, “Momba yï ra zi bapatisi ma, mora ayi rï zi ma?” 15Yësu aya'ba henye, “Ï'dï 'bëdï here yaanya aba, ëdï na laka zi ze ko'dɔ nenye zi kinde ti'de tëdïja.” Neene Yowani omba dɔ mo gbɔ. 16Mati kandi abapatisi Yësu, mo ï'bë yaga tëmï wini. Mï kadra nani komorïyë ayëhu rënï, mo ongɔ Lawo 'ba Wïrï ëdï tayi kaa atu'bu loso dë nï. 17Gu ta komorïyë iya henye, “Nenye Wisi 'bama, mati mɔwɔ, mo aba ma na rakyenyi.”
Currently Selected:
Matayo 3: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/