Matayo 22
22
Mala karama 'ba oze
1Yësu ame'do zi zë löhu mï mala iya henye, 2“Damöku 'ba komorïyë ëdï kaa vo damöku akɔ'jɔ karama 'ba oze kö'du wisi 'bënï. 3Mo utu vo ko'dɔ lɔɔ 'bënï 'e zi zë mati ise zi karama zi yada zi zë zi tayi, mora zë ombannï dë zi tayi.”
4“Neene mo utu kya vo ko'dɔ lɔɔ maako'e iya henye, ‘Ayada 'e zi zë mati ise ne, “Ma kɔ'jɔ wakonyo 'bama 'ba kadra kutë ku: Isa lïmu 'bama isa ma tɔnɔ aba umu ku, wa biya ëdï nzɔ. Ayi 'e zi karama 'ba oze.”’ 5Mora zë owonnï dë, ma kölö ï'bë wënï mï yaka 'bënï, agamo mï lɔɔ 'bënï. 6Kɔsɔ mo ïrïnnï vo ko'dɔ lɔɔ 'bɔmo 'e, o'dɔ zë na kyënyë ofo zë. 7Vo damöku na kamo. Mo utu vo kanya'e 'bënï ayaŋa zë vo wakofo nee, o'bɔ gawokyedre 'bëzë ne.
8“Neene mo iya zi vo ko'dɔ lɔɔ 'bënï 'e henye, ‘Karama ëdï ku nzɔ, mora zë mati mise ɔ'bɔnnï dë tayi. 9Ï'bë 'e bi golo'bɔ 'ba da gërï ise 'e mï karama vïdï mati i'ja 'e.’ 10Here vo ko'dɔ lɔɔ ï'bënnï yaga mï da gëri atɔtɔnnï biya vïdï mati zë atɔ'bɔnnï ki'ja, 'dö ma laka ma kyënyë aba, loko 'ba oze oso ndɔ yingɔ aba.
11“Mora mati vo damöku ayi loko zi kongɔ yingɔ, mo ongɔ kora maako ani mo usu bɔngɔ 'ba oze dë. 12Mo ako'jo henye, ‘Aboka, hala ayi loko kinye kazi bɔngɔ 'ba oze?’ Kora ne ame'do dë.
13“Neene vo damöku ayada zi vo ko'dɔ lɔɔ henye, ‘Ida 'e kala mo, ndï mo aba u'du 'e mo yaga, mï mandölu, bi mati kudu ëdï kyïrï konyo aba.’ 14Kö'du na kayo ise, mora gbɔngo ajeli.”
Kopi 'be'bele zi Kayisara
15Neene Farasi'e ï'bënnï yaga o'dɔnnï mala zi kuyï mo mï me'do 'bɔmo. 16Zë utunnï vo lö'bö 'bënnï zi mo Herodiya ëtï. Zë iyannï henye, “Vo komoyandi, da yɔlɔ yï vo kö'du tïnyö, ayandi wa mï gërï 'ba Wïrï te mï kö'du tïnyö. Ere dë kazi vïdï, ga kö'du owo kö'du 'bëzë dë, zë ëyï ra. 17Ayada zi ze, kö'du sösu 'bëyï a'di? Ëdï laka zi kopi 'be'bele zi Kayisara mandere anza here dë?”
18Mora Yësu ayɔlɔ kö'du sösu kyënyë 'bëzë ne, iya henye, “'E vo komokandi kyënyë nee, kö'du a'di ëdï 'e yɔnzɔ zi kuyï ma? 19Ayada 'e zi ma kɔhi mati ëdï kopi 'be'bele ne.” Zë ikannï zi mo dinara, 20mo ako'jo hë zë, “Kyïnë ëyï ra nenye, wa mati ayöru dɔ mo nenye aba?”
21Zë aya'bannï henye, 'ba “Kayisara” Neene mo iya zi zë, “Ï'dï 'e zi Kayisara wa mati ëdï 'ba Kayisara, zi Wïrï wa mati ëdï 'ba Wïrï.” 22Mati zë owonnï nenye, zë na rakaga. Here zë ilannï mo ï'bë wënnï 'de.
Rakoze tapëtï tënyï tëmï koli
23Mï ko'do kölö nani Sadekee, mati iyannï tënyï tëmï koli anza ne, ayinnï zi mo kö'du ko'jo aba henye, 24Zë iyannï henye, “Vo komoyandi, Mosa ayada zi ze henye, ‘Ëzë kora oli kazi gisi, öndu mo 'boze mbara lu'bë ne zi tëdï wisi aba kö'du mo.’ 25Yaanya aba gisi öndu ëdïnnï madɔmorïyö mï kutë ze. Ma dagba oze oli, mo anza dë gisi aba, mo ila mbara 'bënï zi öndu nï. 26Kö'du kölö ne o'dɔ rë nï kpa here zi ma rïyö, öndu ma wota, nduwë dagba kaŋo zi madɔmorïyö. 27Ndundu mo mbara ne oli. 28Yaanya aba, mï tënyï tëmï koli, mo atëdï 'bënï mbara 'bëyï tëmï madɔmorïyö ne, mati zë biya ozennï mo?”
29Yësu aya'ba henye, “Alïtë'e ku, ga kö'du ayɔlɔ'e Wayöru dë mandere kyigɔ 'ba Wïrï. 30Mï kadra tënyï tëmï koli vïdï oze ra dë mandere kï'dï mï rakoze, zë atëdïnnï kaa malayika'e mï komorïyë. 31Mora kö'du tënyï 'ba yöku, gba ako'jo 'e dë wa mati Wïrï iya zi ye, 32‘Ma ra Wïrï 'ba Abarayama, Wïrï 'ba Yisika Wïrï 'ba Yakoba?’ Mo anza dë Wïrï 'ba yöku mora 'ba dïdï.” 33Mati vïdï kayo owonnï nenye, zë na rakaga mï wayandi 'bɔmo.
Kö'dukï'dï ma kyedre
34Mati owo Yësu ayata Sadekee, Farasi'e atɔtɔ rë nnï bi kölö. 35Ma kölö tëmï zë, vo kö'du yɔlɔ mï kö'dukï'dï, ayɔnzɔ mo kö'du ko'jo nenye aba: 36“Vo komoyandi, kö'dukï'dï ma vala ra ëdï kyedre mï kö'dukï'dï?” 37Yësu aya'ba henye, “Ɔwɔ Yere Wïrï 'bëyï biya di'di yï aba, biya lawo yï aba, biya dë yï aba. 38Nenye ëdï dagba kyedre ndra 'ba kö'dukï'dï. 39Ma rïyö ëdï kaa mo: Ɔwɔ vo haliŋɔ oka kaa rë yï. 40Ti'de kö'dukï'dï nëbï ëtï ɔrɔnnï da kö'dukï'dï rïyö nenye.”
Wisi 'bëyï ra Kurïsïtö
41Mati Farasi'e atɔtɔ rë nnï bi kölö, Yësu ako'jo hë zë henye, 42“A'di ra asösu 'e kö'du 'ba Kurïsïtö? Wisi 'bëyï ra mo?” Zë aya'bannï henye, “Wisi 'ba Dawidi.” 43Mo iya zi zë henye, “Hala Dawidi ame'do Lawo aba, ako'jo mo ‘Yere’? Kö'du mo iya henye,
44‘Yere iya zi Yere 'bama:
“Alima da kala ma, ma tïrï
le mï'dï vo wehee 'bëyï hu ndï yï.”’
45Ëzë Dawidi ako'jo mo ‘Yere,’ hala mo atëdï wisi 'bɔmo?” 46Vïdï maako ɔ'bɔ dë kiya me'do mï dɔ mo ya'ba, tëmï ko'do nani dagba ani vïdï maako omba dë zi ko'jo hɔ mo kö'du ko'jo maako aba.
Currently Selected:
Matayo 22: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/