Matayo 21
21
Torombeta ödu mï Yerusalema
1Mati zë kara Yerusalema ayinnï zi Betehege da Döku 'ba Olivo, Yësu utu vo lö'bö rïyö, 2iya zi zë, “Ï'bë 'e zi daliŋɔ mati dagba komo 'e, kandi aki'ja 'e akakya na kida, wisi 'bënï aba dakapa nï. Inga 'e zë ika 'e zë zi ma. 3Ëzë vïdï maako iya kö'du maako zi ye, ayada 'e zi mo ‘Yere ra omba zë, mo akutu zë 'de kandi.’”
4Nenye o'dɔ rë nï zi kinde wa mati ame'do kpuru nëbï:
5“Iya zi Wu'jë 'ba Zayina,
‘Ongɔ 'e te, vo damöku 'bee ayi zi ye,
liyaa ëdï taho da akakya,
da wisi akakya, ëdï ɔbi 'ba akakya.’”
6Here vo lö'bö ï'bë o'dɔnnï te kaa mati Yësu ayada zi zë. 7Zë ikannï akakya ne wisi mo aba, o'bannï bɔngɔ 'bënnï dë zë, Yësu alima dë zë. 8Vïdï kyedre kayo o'bannï bɔngɔ 'bënnï da gërï, agamo'e ikyennï ngora'e 'ba kaga o'bannï zë da gërï. 9Vïdï kayo mati ï'bënnï dagba komo mo zë mati usunnï gɔ mo ha gbögbö aba henye,
“Hosana zi Wisi 'ba Dawidi!
Ya'da ëdï mo mati ayi mï ru 'ba Yere,
Hosana mï rïyë ndra!”
10Mati Yësu ödu mï Yerusalema, gawokyedre ne biya ëdï na da lïkö ako'jonnï henye, “Ëyï ra ëdï nenye?” 11Vïdï kayo ne aya'bannï henye, “Nenye ëdï Yësu, nëbï ta Nazereta mï Galilaya.”
Yësu mï Yëkëlu
12Yësu ödu mï yëkëlu ore yaga biya zë mati ëdïnnï kogo wa zi nnï, zë mati ëdïnnï kogo wa 'bënnï yaga ani ne ëtï. Mo adu'du da tarabiza 'ba vïdï 'ba kɔhi kutrë 'e gba'da 'ba zë mati ëdïnnï kogo tu'bu'e. 13Mo iya zi zë henye, “Ëdï na yöru, ‘Loko 'bama akako'jo loko 'ba mötu,’ mora ëdï 'e ko'dɔ na wöru 'ba vo wakolɔ'e.”
14Vo komoköndu, vo ka'bo ëtï ayinnï zi mo mï yëkëlu, mo akɔ'jɔ zë. 15Mora mati kyedre 'ba vo karasa, vo komoyandi 'ba kö'dukï'dï ëtï ongɔnnï wa rakaga mati mo o'dɔ gisi ëdï hë nnï gbögbö mï yëkëlu henye, “Hosana zi Wisi 'ba Dawidi,” zë na kamo. 16Zë ako'jonnï hɔ mo henye, “Owo ku wa mati gisi nenyee ëdïnnï kiya?”
Yësu aya'ba henye, “Ɔɔ. Ako'jo 'e dë gba, ‘Ta da mi'di 'ba ha gisi vïdï kyedree ëtï, ëdï 'e wayeto 'ba vo karasa aba?’” 17Mo ila zë ï'bë yaga 'ba gawokyedre zi Beteniya, bi mati mo o'do.
Yësu asënë kaga kyëlu
18Ŋbɔ mï damïndö, mati mo ëdï da gërï 'bënï hulëhu mï gawokyedre, mo na o'bo. 19Ongɔ kaga kyëlu dakapa gërï, mo ï'bë zi mo mora i'ja waako dë dɔ mo nje yëyu. Neene mo iya zi mo henye, “Ana lɔgɔ dekpe löhu!” Kandi kaga ne akyïtru. 20Mati vo lö'bö ongɔnnï nenye, zë na rakaga. Zë ako'jonnï henye, “Hala kaga kyëlu ne akyïtru kandi?” 21Yësu aya'ba henye, “Ma yada zi 'e tïnyö, ëzë ëdï 'e koma aba anza 'e dë na da jirijiri, anza dë nje atɔ'bɔ 'e ko'dɔ wa mati o'dɔ zi kaga kyëlu ne, mora atɔ'bɔ 'e kpa kiya zi döku nenye, ‘Ï'bë u'du rë yï mï ranga,’ ako'dɔ rë nï. 22Ëzë oma 'e, akïrï 'e wa mati ako'jo 'e kö'du mo mï mötu.”
Kala kalakonda 'ba Yësu ako'jo
23Yësu ödu mï yëkëlu bi 'ba vurë, mati mo ëdï yandi kö'du, kyedre 'ba vo karasa'e vo dagba'e 'ba vïdï ëtï ayinnï zi mo. Zë ako'jonnï henye, “Kalakonda 'ba a'di aba ra ëdï ko'dɔ wa nenyee?” “Ëyï ra ï'dï zi yï kalakonda nenye?”
24Yësu aya'ba henye, “Ma kpa ma kako'jo hee kö'du ko'jo kölö aba. Ëzë aya'ba 'e zi ma, ma kayada zi 'e kalakonda 'ba a'di aba ra mëdï ko'dɔ wa nenyee. 25'Ba Yowani bapatisi ne ayi ta kila? Ëdï ta komorïyë, mandere kazi vïdï?” Zë ame'donnï tëmï kutë nnï na ga rë nnï, iyannï henye, “Ëzë diya ta komorïyë,” mo akako'jo henye, “Neene kö'du a'di oma 'e dë mï mo? 26Mora ëzë diya, kazi vïdï, ze na tere kazi vïdï, kö'du ze biya iyannï Yowani ne nëbï ra.” 27Here zë aya'bannï zi Yësu henye, “Da yɔlɔ ze dë.” Neene mo iya henye, “Ma yada dë zi 'e kalakonda 'ba a'di aba ra mëdï ko'dɔ wa nenyee.
Mala 'ba gisi kora rïyö
28“A'di ra asösu 'e? Kora maako ëdï gisi kora aba rïyö. Mo ï'bë zi ma dagba iya henye, ‘Wisi, ï'bë o'dɔ lɔɔ ndenye mï yaka.’ 29Mo aya'ba henye, ‘Momba dë,’ mora yaa mo opi kö'du sösu 'bënï ï'bë gbɔ.
30“Neene 'bu ï'bë zi wisi agamo iya kpa te kö'du kölö ne. Mo aya'ba henye, ‘Ma ko'dɔ kyedre,’ Mora mo ï'bë dë.
31“Ma vala ra tëmï kutë zë rïyö ne o'dɔ wa mati 'bu mo omba?”
Zë aya'bannï henye, “Ma dagba.”
Yësu iya zi zë henye, “Ma yada zi 'e tïnyö, vo 'be'bele kö'du, vo rönyïbiriti ëtï ëdï tödunnï damöku 'ba Wïrï dagba ta komo 'e. 32Kö'du Yowani ayi zi ye, zi yada zi 'e gërï 'ba tëdïja, oma 'e dë mï mo, mora vo 'be'bele kö'du vo rönyïbiriti ëtï omannï mï mo. Gbï le tapëtï ongɔ 'e nenye, otɔ dee dë koma mï mo.
Mala 'ba vo lɔɔ mï yaka
33“Oze mbili 'e zi mala agamo. Vo kyeti kaŋo mo ïyï veni mï yaka. Mo ï'dï täṛï kpo ta rɔ mo, ole wogo 'ba a'ji koto mï mo uvö lokolɔrɔ. Neene mo ï'dï yaka ne tikɔ da kɔhi zi kya vo kisi yaka'e ï'bë bi lasi. 34Mati kadra 'ba wa kumu kara, mo utu vo ko'dɔ lɔɔ 'bënï 'e zi vo ko'dɔ lɔɔ 'ba mï yaka'e zi kö'du lɔgɔ 'bënï.”
35“Vo ko'dɔ lɔɔ 'ba yaka'e ïrïnnï vo ko'dɔ lɔɔ 'bɔmo 'e, zë u'bönnï ma kölö, ofonnï agamo, u'dunnï ma wota yïtö aba. 36Neene mo utu vo ko'dɔ lɔɔ agamo'e zi zë, ndra ta da kadra ma dagba, vo ko'dɔ lɔɔ 'ba mï yaka o'dɔnnï zë kpa te mï gërï kölö. 37Ndundu mo aba, mo utu wisi 'bënï zi zë. Mo iya henye, ‘Zë akoronnï wisi 'bama.’
38“Mora mati vo ko'dɔ lɔɔ 'ba mï yaka ongɔnnï wisi ne, zë iyannï zi oka ma kölö henye, ‘Nenye wisi 'ba vo kyeti yaka ra: Ayi dofo 'e mo doba 'e wapëtïkala 'bɔmo.’ 39Here zë obannï mo u'dunnï mo yaga tëmï yaka ofonnï mo.”
40“Hereene, ëzë vo kyeti yaka ayi, a'di ra mo ako'dɔ zi vo ko'dɔ lɔɔ 'ba mï yaka nani'e?” 41Zë aya'bannï henye, “Mo akika vo wayaŋa nani'e zi ndundu 'ba wayaŋa, akï'dï yaka ne tikɔ da kɔhi zi vo ko'dɔ lɔɔ 'ba yaka agamo, zë akï'dïnnï zi mo mï 'bɔmo 'ba dalɔgɔ mï kadra 'ba wakumu.”
42Yësu iya zi zë henye,
“Ako'jo 'e dë gba mï Wayöru:
‘Yïtö mati vo wako'ba'e ombannï dë,
ayi ku na yïtö 'ba hu wako'ba yeto ta dɔ mo,
Yere ra o'dɔ nenye,
ëdï na rakaga mï kyele komo ze.’
43“Hereene ma yada zi 'e damöku 'ba Wïrï akoba 'de kazi ye akï'dï zi vïdï mati akatana lɔgɔ mo. 44Mo mati alëpï da yïtö nenye, akowe na nzoyi, mora mo mati alëpï dɔ mo atëdï rɔ'bo.” 45Mati kyedre 'ba vo karasa Farasi'e ëtï owonnï mala 'ba Yësu ne, zë ayɔlɔnnï mo ëdï me'do kö'du nnï. 46Zë omannï gërï zi kïrï mo, mora zë na tere kazi vïdï kayo ga kö'du vïdï iyannï mo nëbï ra.
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/