Matayo 20
20
Mala 'ba vo ko'dɔ lɔɔ mï yaka
1“Kö'du damöku 'ba komorïyë ëdï kaa vo kyeti dakaŋo mo ï'bë yaga 'do ŋbɔ mï damïndö zi koma vïdï 'ba lɔɔ zi ko'dɔ lɔɔ mï yaka 'bënï. 2Mo ida kö'du zi kopi zi zë dinara mï ko'do kölö utu zë gbɔ mï yaka 'bënï.”
3“Mï kadra ma wota, mo ï'bë yaga ongɔ agamo'e ëdïnnï tɔrɔ mï bi 'ba wakogo o'dɔnnï wa dë. 4Mo ayada zi zë henye, ‘Ï'bë 'e kpa ko'dɔ lɔɔ mï yaka 'bama, ma kopi kɔhi zi 'e na laka.’ 5Here zë ï'bënnï gbɔ.
“Mo ï'bë yaga löhu kadra modaka, kadra madɔmosowɔ o'dɔ kpa kö'du kölö. 6Kadra 'butë dɔmo kölö mo ï'bë yaga i'ja agamo'e gba tɔrɔnnï toko. Mo ako'jo hë zë, ‘Kö'du a'di ëdï 'e tɔrɔ kinye biya ta ga ko'do konda kazi ko'dɔ wa maako?’
7“Zë aya'bannï henye, ‘Ga kö'du vïdï maako ï'dï lɔɔ dë zi ze.’ Mo iya zi zë henye, ‘Ï'bë 'e kpa ko'dɔ lɔɔ mï yaka 'bama.’
8“Mati hutaga ayi, vo kyeti yaka iya zi vo kongɔ ga lɔɔ 'bënï henye, ‘Ako'jo vo ko'dɔ lɔɔ opi zi zë kɔhi 'bëzë, ayeto ma da hulëhu aba tï'bë zi ma dagba.’
9“Vo lɔɔ mati o'dɔnnï lɔɔ kadra 'butë dɔmo kölö ayinnï ma kölö ïrï dinara kölö. 10Here zë mati o'dɔnnï lɔɔ dagba ayinnï, zë asösu 'bënnï zi kïrï ndra. Mora ma kölö 'bëzë ïrï kpa dinara kölö. 11Mati zë ïrïnnï, zë ayetonnï tënyï köyö vo kyeti kaŋo aba. 12Zë iyannï henye, ‘Kora nenyee mati ika zë ndundu ne o'dɔnnï lɔɔ nje kadra kölö, o'dɔ zë kölö ze aba, ze mati di'ja yeto 'ba lɔɔ ne da kadra kyïtu 'ba ko'do nenye.’
13“Mora mo aya'ba zi ma kölö 'bëzë henye, ‘Aboka, ma 'bölu 'e dë. Ida 'e kö'du dë zi ko'dɔ lɔɔ kö'du dinara kölö? 14Oba 'e kɔhi 'bee ne ï'bë 'e. Momba zi kï'dï zi kora mati ika ndundu ne kpa te kaa mï'dï zi ye. 15Here manza dë dangölö aba zi ko'dɔ wa mati momba kɔhi 'bama aba? Mandere 'e na mïkumbë ga kö'du ma vïdï laka?’
16“Here ma hulëhu atëdï dagba, ma dagba atëdï hulëhu.”
Yësu ame'do löhu kö'du koli 'bënï
17Yaanya aba mati Yësu ëdï tï'bë Yerusalema, mo oba vo lö'bö 'butë dɔmo rïyö dakapa iya zi zë henye, 18“Dëdï tï'bë le Yerusalema, Wisi 'ba Vïdï akogo da kɔhi zi kyedre 'ba vo karasa'e vo komoyandi 'ba kö'dukï'dï ëtï. Zë akikyennï vurë rɔ mo zi kofo 19akï'dï mo zi vo Mënzëë zë ako'dɔnnï sawiya rɔ mo, aku'bö mo akatötö. Mï ko'do wota aba akïnjë mo zi dïdï!”
Kö'du ko'jo 'ba ma
20Ma 'ba gisi kora 'ba Zebedeyo ayi zi Yësu gisi kora 'bënï ëtï, alɔmvɔ kaŋo, ako'jo kö'du laka 'bɔmo. 21Mo ako'jo henye, “A'di ra omba?”
Mo iya henye, “Ï'dï ma kölö 'ba gisi kora rïyö 'bama nenyee ma kölö 'balima da kala yï ma tïrï agamo da kala yï ma gali mï damöku 'bëyï.”
22Yësu iya zi zë henye, “Ayɔlɔ 'e dë wa mati ëdï 'e ko'jo ne. Atɔ'bɔ kuwë 'e sikɔ mati mëdï tï'bë zi kuwë ne?”
Zë aya'bannï henye, “Da tɔ'bɔ.”
23Yësu iya zi zë henye, “'E tïnyö akuwë 'e tëmï sikɔ 'bama, mora zi lima da kala ma, ma tïrï mandere ma gali anza dë ma ra zi komba. Bi nenyee kö'du zë mati 'Bu ma akɔ'jɔ kö'du zë.”
24Mati vo lö'bö 'butë owonnï kö'du nenye, zë na kamo gisi öndu rïyö ne aba. 25Yësu ako'jo zë bi kölö iya henye, “Ayɔlɔ 'e henye, vo dagba'e 'ba vo Mënzëë yere dë zë, vo mï turu 'bëzë ma rïyë ëdïnnï kalakonda aba dë zë. 26Anza here 'e aba. Tagɔmo, mo mati omba zi tayi kyedre mï kutë 'e 'bëdï na vo lïtu 'bee, 27mo mati omba zi tëdï dagba 'bëdï vo kalima 'bee 28te kaa Wisi 'ba Vïdï ayi dë zi lïtu zi mo, mora zi lïtu zi vïdï, zi kï'dï dïdï nï na wakutrë kö'du vïdï kayo.”
Kora vo komoköndu rïyö ongɔnnï bi
29Mati Yësu vo lö'bö 'bënï ëtï ëdïnnï kila Yërïkö, vïdï kayo usunnï gɔ mo. 30Kora vo komoköndu rïyö ëdï limannï dakapa gërï, mati zë owonnï henye Yësu ëdï tï'bë ta dakapa, zë agbögbö hë nnï, “Yere, Wisi 'ba Dawidi, ëdï mïkyëyï aba re ze!” 31Here vïdï kayo ne amo zë aba ayada zi zë, zi tëdï ti, mora zë agbögbö hë nnï biya rïyë, “Yere, Wisi 'ba Dawidi, ëdï mïkyëyï aba re ze!”
32Yësu ɔrɔ ako'jo zë. Mo ako'jo henye, “A'di ra omba 'e ma zi ko'dɔ zi ye?” 33Zë aya'bannï henye, “Yere, domba komo ze.”
34Yësu ëdï mïkyëyï aba rë zë ise kyele komo zë. Kandi zë ongɔnnï bi usunnï gɔ mo.
Currently Selected:
Matayo 20: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/