Matayo 2
2
Tayi 'ba vo kö'du yɔlɔ
1Tapëtï ko'jo 'ba Yësu mï Beteleme mï Yuda, mï kadra 'ba Yere vo damöku Heroda, Vo kö'du yɔlɔ'e ta humïrë ayinnï Yerusalema, 2ako'jonnï henye, “Kila mo mati o'jo na yere vo damöku 'ba Yuda'e ne? Dongɔ kyëlu 'bɔmo mï humïrë dayi zi lëlu mo.” 3Mati Yere vo damöku Heroda owo nenye mo ëdï na mï kile, ti'de Yerusalema mo aba. 4Mati mo ako'jo biya vïdï kyedre 'ba vo da karasa'e ehe vo komoyandi'e 'ba kö'dukï'dï, mo ako'jo hë zë kila Kurïsïtö ne ako'jo.
5Zë aya'bannï henye, “Mï Beteleme mï Yuda, kö'du nenye ëdï wa mati nëbï ayöru:
6‘Mora yï Beteleme, mï dakaŋo 'ba Yuda,
anza dë tisi wa aba mï kutë vo dagba'e 'ba Yuda,
ga kö'du yaga tëmï 'e atayi vo dagba
mo atëdï na vo yako 'ba vïdï 'bama Yiserele.’”
7Neene Heroda ako'jo vo kö'du yɔlɔ'e na liwo ehe i'ja kazi zë te kadra 'ba kyëlu mati alaya. 8Mo utu zë Beteleme iya henye, “Ï'bë 'e oma 'e bi liyaa na laka kö'du wisi ne. Kandi ëzë i'ja 'e mo, ise 'e kö'du mo zi ma, zi ma kpa tï'bë mötu mo.”
9Tapëtï zë owonnï kö'du 'ba yere vo damöku, zë ï'bënnï dagba da gërï 'bënnï, kyëlu mati zë ongɔnnï ta humïrë ne ï'bë dagba da komo zë le ɔrɔ rïyë bi mati wisi ne ëdï. 10Mati zë ongɔnnï kyëlu ne, zë rakyenyi aba ndra. 11Tayi zi loko, zë ongɔnnï wisi ne ma mo Mariya aba, zë alɔmvɔnnï kaŋo amötunnï mo. Neene zë ayëhu ha aŋboro 'bënnï, ï'dïnnï zi mo wakï'dï 'ba daabo, wa këzïngutru, mayiri aba.
12Here ayada komo zë mï kisi wïrï anza dë zi tï'bë hulëhu zi Heroda, zë a'bannï zi dakaŋo 'bënnï gërï ma agamo aba.
Taho mï Ezipeto
13Mati zë ï'bënnï ku, malayika 'ba Yere alaya zi Yosepa mï kisi wïrï. Mo iya henye, “Ënyï rïyë, oba wisi ne ma mo aba aho Ezipeto. Alima ani le ma yada zi yï, ga kö'du Heroda ëdï tï'bë bi koma kö'du wisi ne zi kofo mo.”
14Here mo ënyï rïyë, oba wisi ne ma mo aba mï yɔndɔ ï'bë Ezipeto, 15mo alima ani le koli 'ba Heroda. Here o'dɔ rë nï kaa wa mati Yere iya kpuru nëbï. “Yaga ta Ezipeto ma ko'jo wisi ama.”
Kofo 'ba gisi kora mï Beteleme
16Mati Heroda ayɔlɔ vo kö'du yɔlɔ o'ba nï ku, mo na kamo, mo ï'dï kö'du zi kofo gisi kora biya mï Beteleme vo haliŋɔ oka mati ëdïnnï kɔɔ aba rïyö ehe lebi, te mï kadra mati mo ayandi kazi Vo kö'du yɔlɔ'e. 17Neene wa mati iya kpuru nëbï Yeremaya aba o'dɔ rë nï ku:
18“Gu owo mï Rahama,
kudu lu'bë kyedre aba,
Rayile ëdï kudu kö'du gisi 'bënï, omba dë zi dë nï lëlu,
ga kö'du zë anzannï kpe.”
Ta'ba zi Nazereta
19Tapëtï Heroda oli, malayika 'ba Yere alaya mï kisi wïrï zi Yosepa mï Ezipeto 20iya henye, “Ënyï rïyë, oba wisi ne ma mo aba ï'bë dakaŋo 'ba Yiserele, ga kö'du zë mati ëdïnnï yɔnzɔ zi koba dïdï 'ba wisi ne olinnï ku.”
21Here mo ënyï rïyë, oba wisi ne ma mo aba ï'bë dakaŋo 'ba Yiserele. 22Mora mati mo owo Arahesi ïrï bi mï Yuda mï bi pëtï 'bu nï Heroda, mo ëdï na tere zi tï'bë ani. Ayada komo mo mï kisi wïrï, mo ï'bë zi disitrikiti 'ba Galilaya, 23mo ï'bë alima mï gawo ako'jo Nazereta. Here o'dɔ rë nï kaa wa mati iya kpuru nëbï'e: “Akako'jo mo vïdï 'ba Nazereta.”
Currently Selected:
Matayo 2: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/