Matayo 19
19
Rayëyï
1Mati Yësu inde kiya kö'du nenyee, mo ila Galilaya ï'bë mï dakaŋo 'ba Yudayi kapa 'ba Yeredene. 2Vïdï kayo usunnï gɔ mo, mo akɔ'jɔ zë ani.
3Kya 'ba Farasi'e ayinnï zi mo zi yɔnzɔ mo. Zë ako'jonnï henye, “Ëdï mï kö'dukï'dï kö'du kora zi yëyï mbara 'bënï mï kö'du yawa maako?” 4Mo aya'ba henye, “Ako'jo 'e dë mï biyeto aba, vo Ko'dɔ o'dɔ zë kora mbara aba 5iya henye, ‘Ga kö'du nenye kora akila 'bu nï, ma nï akida rë nï zi mbara 'bënï, rïyö ne atayi ida ra kölö?’ 6Here zë anzannï dekpe rïyö, mora kölö. Hereene wa mati Wïrï adrɔko ku bi kölö, mï'dï vïdï minye dë.”
7Zë ako'jonnï henye, “Kö'du a'di Mosa ï'dï kö'du zi kora zi kï'dï zi mbara 'bënï waraga 'ba rayëyï kutu mo 'de?”
8Yësu aya'ba henye, “Mosa omba dɔ mo zi 'e yëyï mbara 'bee ga kö'du di'di 'e na kyigɔ. Mora anza dë here mï gërï nenye tëmï biyeto. 9Ma yada zi 'e henye vïdï mati ayëyï mbara 'bënï, anza dë kö'du 'ba ndoro, oze mbara agamo o'dɔ ndoro.”
10Vo lö'bö iyannï zi mo henye, “Ëzë nenye ëdï kö'du mati mï kutë o'di mbara aba, ëdï na laka anza dë zi rakoze.”
11Yësu aya'ba henye, “Anza vïdï biya atɔ'bɔ komba da me'do nenye, mora nje zi zë mati ï'dï ku. 12Kö'du maako'e ëdïnnï na lïmu ga kö'du o'jo zë mï gërï nani; agamo'e vïdï ra o'dɔ zë mï gërï nani, agamo'e ombannï rakoze dë ga kö'du 'ba damöku 'ba komorïyë. Mo mati ɔ'bɔ komba dɔ mo nenye momba.”
Yësu ï'dï ya'da zi gisi ma sisi
13Neene gisi ma sisi ika zi Yësu kö'du mo zi kï'dï kala nï dë zë mötu kö'du zë. Mora vo lö'bö awasannï zë mati ikannï zë ne.
14Yësu iya henye, “Ila 'e gisi ma sisi 'bayinnï zi ma, ayata 'e zë dë, kö'du damöku 'ba komorïyë ëdï kö'du zë kaa ma nenyee.” 15Mati mo ï'dï kala nï dë zë, mo ï'bë dagba ta nani.
Kora ɔbi vo wadakayo
16Yaanya aba kora maako ayi zi Yësu ako'jo henye, “Vo komoyandi, wa laka a'di ra ma ko'dɔ zi ki'ja dïdï ma ŋburu?”
17Yësu aya'ba henye, “Kö'du a'di ako'jo ma kö'du wa mati ëdï na laka? Ani ëdï nje Kölö mo mati ëdï na laka. Ëzë omba zi tödu mï dïdï, oro kö'dukï'dï.” 18Kora ne ako'jo henye, “Ma vala ra?”
Yësu aya'ba henye, “Ofo vïdï dë, o'dɔ ndoro dë, alogo dë, iga ndɔndɔ dë, 19oro 'bu yï ma yï aba, ɔwɔ vo haliŋɔ oka 'bëyï kaa rë yï.”
20Kora ɔbi ne aya'ba henye, “Biya nenyee ma sesi ku. A'di ra gba momba?”
21Yësu aya'ba henye, “Ëzë omba zi yï tëdï kazi kö'du, ï'bë ogo yaga wa 'bëyï ï'dï zi vo leri, atëdï wakulu aba mï komorïyë. Neene ayi, usu ga ma.” 22Mati kora ɔbi ne owo nenye, mo ï'bë na rasösu, ga kö'du mo ëdï kyedre wadakayo aba.
23Neene Yësu iya zi vo lö'bö 'bënï 'e henye, “Ma yada zi 'e tïnyö, ëdï na kyigɔ kö'du vo wadakayo zi tödu damöku 'ba komorïyë. 24Löhu ma yada zi ye, akyigɔ dë kö'du jemele zi tï'bë kpuru ta kyele komo 'ba ibira ta da kora vo wadakayo zi tödu damöku 'ba Wïrï.”
25Mati vo lö'bö owonnï nenye, zë rakaga kyedre aba ako'jonnï henye, “Ëyï ra atɔ'bɔ yɔmɔ?” 26Yësu ongɔ bi dë zë iya henye, “Vïdï aba nenye o'dɔ rë nï dë, mora Wïrï aba wa biya ako'dɔ rë nï.”
27Petero aya'ba zi mo henye, “Dila wa ku ti'de zi kusu gë yï! A'di ra atëdï ani kö'du ze?”
28Yësu iya zi zë henye, “Ma yada zi 'e tïnyö, mï kadra 'ba wa kɔ'jɔ biya löhu na kyïyï, ëzë Wisi 'ba Vïdï alima da kyïtï tëdïkyedre 'bënï, 'e mati usu 'e ga ma akalima 'e kpa da kyïtï 'butë dɔmo rïyö ko'dɔ vurë 'ba kofo 'butë dɔmo rïyö 'ba Yiserele. 29Vïdï mati ila loko'e mandere öndu'e mandere ëmï'e mandere 'bu mandere ma mandere gisi mandere yaka'e ga kö'du ma akïrï lami kölö da kyɔ atëdïnnï wa pëtï kala 'ba dïdï ŋburu aba. 30Mora zë mati ëdïnnï na kayo dagba atëdïnnï hulëhu, zë mati na kayo hulëhu atëdïnnï dagba.”
Currently Selected:
Matayo 19: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/