Matayo 18
18
Ma kyedre ndra mï damöku 'ba komorïyë
1Mï kadra nani vo lö'bö ayinnï zi Yësu ako'jonnï henye, “Ëyï ra na kyedre ndra mï damöku 'ba komorïyë?” 2Mo ako'jo wisi tisi ï'dï mo tɔrɔ mï kutë zë. 3Mo iya henye: “Ma yada zi 'e tïnyö, nje ëzë ofɔ ree ayi 'e kaa gisi ma sisi, ödu 'e dë mï damöku 'ba komorïyë. 4Hereene, mo mati aya'ba rë nï kaa wisi nenye ëdï kyedre ndra mï damöku 'ba komorïyë.
Kö'du yɔnzɔ zi ko'dɔ kö'du kyënyë
5“Mo mati ïrï wisi tisi ne kalakyedre aba kaa ma nenye mï ru ma, ïrï ma ra kalakyedre aba. 6Mora ëzë vïdï ma o'dɔ ma kölö 'ba ma sisi nenyee mati omannï mï ma zi ko'dɔ kö'du kyënyë, ëdï na laka kö'du mo zi tëdï yïtö kyedre aba na kove toko gu nï zi ku'du mo mï bi yöndu 'ba ranga.
7“Bu'bu zi damöku ga kö'du 'ba wa mati ëdï ko'dɔ vïdï zi ko'dɔ kö'du kyënyë! Wa ma here ne atayi, mora bu'bu zi vïdï mati kpuru kazi mo zë ayinnï! 8Ëzë kala yï mandere ndï yï o'dɔ yï zi ko'dɔ kö'du kyënyë, ikye kyiko u'du 'de. Ëdï na laka kö'du yï zi tödu mï dïdï kazi kala, mandere ndï keŋe ta da tëdï kala aba rïyö, mandere ndï aba rïyö zi ku'du mï wa'do ma ŋburu. 9Ëzë kyele komo yï o'dɔ yï zi ko'dɔ kö'du kyënyë, otɔ yaga u'du 'de. Ëdï na laka kö'du yï zi tödu mï dïdï kyele komo kölö aba ta da tëdï kyele komo aba rïyö zi ku'du mï wa'do 'ba gehena.
Mala tölu 'ba tïmëlë
10-11“Ongɔ 'e bi dë kaŋo da ma kölö 'ba ma sisi nenyee. Kö'du ma yada zi 'e henye, malayika 'bëzë mï komorïyë 'duwï ëdïnnï kongɔ komo 'ba 'Bu ma mï komorïyë. 12A'di ra asösu 'e? Ëzë kora ëdï tïmëlë aba lami kölö, ma kölö tëmï zë ölu, mo akila ma 'butë madɔmosowɔ dɔmo madɔmosowɔ ne dë da lutu tï'bë zi koma bi kö'du ma kölö mati ölu ne? 13Ëzë mo i'ja, ma yada zi 'e tïnyö, mo ëdï na rakyenyi ndra kö'du tïmëlë kölö mati ölu ta da ma 'butë madɔmosowɔ dɔmo madɔmosowɔ mati ölunnï dë. 14Mï gërï kölö ne 'Bu 'e mï komorïyë omba dë ma sisi nenyee ma kölö zi tölu.
Öndu ma o'dɔ kö'du kyënyë rë yï
15“Ëzë öndu yï o'dɔ kö'du kyënyë rë yï, ï'bë ayada zi mo kö'du kyënyë 'bɔmo ne, nje mï kutë 'e rïyö. Ëzë mo owo kö'du 'bëyï, a'da öndu yï ku. 16Ëzë mo owo dë, oba kölö mandere rïyö vïdï agamo'e yï aba, here biya kö'du ëdï kɔ'jɔ ga kö'du 'ba vo kiya rïyö mandere wota. 17Ëzë mo omba dë zi kowo kö'du 'bëzë, ayada zi kenisa, ëzë mo omba dë zi kowo gbï le zi kenisa, o'dɔ mo kaa vïdï ma anza korisitɔ mandere vo koze 'be'bele.
Kö'du kida kö'du kinga aba
18“Ma yada zi 'e tïnyö, wa mati ida 'e dakaŋo akida mï komorïyë, wa mati inga 'e mï dakaŋo akinga mï komorïyë. 19Löhu, ma yada zi 'e henye, ëzë rïyö 'bee mï dakaŋo ida kö'du wa mati ako'jo 'e kö'du mo, ako'dɔ zi 'e 'Bu ma mï komorïyë aba. 20Kö'du ëzë vïdï rïyö mandere wota ayinnï bi kölö mï ru ma, ma mëdï zë aba.”
Mala 'ba vo ko'dɔ lɔɔ kazi mïkyëyï
21Petero ayi zi Yësu ako'jo henye, “Yere, da ndö ma kila öndu ma ëzë mo o'dɔ kö'du kyënyë ra ma? Le zi madɔmorïyö?”
22Yësu aya'ba henye, “Ma yada zi yï, anza madɔmorïyö, mora 'butë madɔmorïyö dɔmo madɔmorïyö.
23“Hereene, damöku 'ba komorïyë ëdï kaa vo damöku mati omba zi kɔ'jɔ me'do 'ba kɔhi vo ko'dɔ lɔɔ 'bënï ëtï. 24Mati mo ayeto kɔ'jɔ, kora mati oba kazi mo yöngu kpuluku 'butë ika zi mo. 25Here mo ɔ'bɔ dë zi kopi, kyedre ne ï'dï kö'du henye, mo, mbara 'bɔmo, gisi 'bɔmo, ti'de wa mati mo ëdï mo aba zi kogo yaga zi kopi yöngu ne.
26“Vo ko'dɔ lɔɔ ne alëpï domo nï aba komo mo. Mo alenze mo iya henye, ‘Uku mï yï ra ma, ma kopi hulëhu wa biya.’ 27Kyedre 'ba vo ko'dɔ lɔɔ ne ïrï mïkyëyï dɔ mo, ila yöngu ne ila mo tï'bë.
28“Mora mati vo ko'dɔ lɔɔ nani ï'bë yaga, mo i'ja kölö 'ba vo ko'dɔ lɔɔ oka 'bënï mati mo ï'dï zi mo lami kölö dinara. Mo ïrï mo ayeto zi kɔhɔ mo. Mo ako'jo henye, ‘Opi hulëhu wa mati ïrï kazi ma!’ 29Vo ko'dɔ lɔɔ oka mo ne alëpï domo nï aba alenze mo iya henye, ‘Uku mï yï ra ma, ma kopi zi yï hulëhu.’
30“Mora mo omba dë. Tagɔmo mo ï'bë u'du kora ne mï kamba le mo atɔ'bɔ kopi yöngu ne. 31Mati kya 'ba vo ko'dɔ lɔɔ ongɔnnï wa mati o'dɔ rë nï ne, zë kö'du sösu kyedre aba ï'bë ayadannï zi kyedre 'bënnï biya wa mati o'dɔ rë nï.
32“Neene kyedre ne ako'jo vo ko'dɔ lɔɔ ne loko. Mo iya henye, ‘Yï vo ko'dɔ lɔɔ kyënyë. Mila biya yöngu 'bëyï ga kö'du alenze ma. 33Here anza dë mïkyëyï aba ra vo ko'dɔ lɔɔ oka yï kaa mati mëdï mo aba rë yï?’ 34Mï kamo aba kyedre 'bɔmo ï'dï mo zi turu vo kamba zi kï'dï riti zi mo, le mo akopi hulëhu biya yöngu mati mo oba. 35Nenye ëdï hala 'Bu ma 'ba komorïyë ako'dɔ ma kölö 'bee le ëzë ila öndu yï tëmï di'di yï.”
Currently Selected:
Matayo 18: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/