Matayo 15
15
Ŋbala ti'da aba
1Neene kya 'ba Farasi'e vo komoyandi 'ba kö'dukï'dï'e ayinnï zi Yësu ta Yerusalema ako'jonnï henye, 2“Kö'du a'di vo lö'bö 'bëyï owennï dalëtï 'ba kyedree? Zë akaka kala nnï dë gba kazi zë wakonyo!”
3Yësu aya'ba henye, “Kö'du a'di owe 'e kï'dï kö'du 'ba Wïrï kö'du 'ba dalëtï 'bee? 4Kö'du Wïrï iya henye, ‘Ɔwɔ 'bu yï ma yï aba, 'Vïdï mati asënë 'bu nï mandere ma nï akï'dï zi koli.’ 5Mora iya 'e henye, ëzë vïdï iya zi 'bu nï mandere ma nï, wa mati akɔnyi 'e, ïrï 'e kazi ma ëdï na wakï'dï koro zi Wïrï, 6mo anza dë zi koro 'bu nï mo aba. Here o'dɔ 'e me'do 'ba Wïrï na yawa kö'du 'ba dalëtï 'bee. 7'E vo komokandi kyënyë! Kö'du 'ba Yesaya ëdï tïnyö, mati mo umë kö'du, kö'du 'e:
8Vïdï nenyee oronnï ma dami'di hë nnï aba,
mora di'di zë na kɔwɔ ta ra ma.
9Zë amötunnï ma na mbiya;
kö'du yandi 'bëzë ëdï mora kö'du kira ma vïdï ra ayandi.”
Wa mati ëdï vïdï ko'dɔ na ti'da
10Yësu ako'jo vïdï kayo zi nï iya henye, “Owo 'e ï'jö kö'du yɔlɔ aba. 11Wa mati ï'bë mï ha vïdï o'dɔ mo dë na ti'da, mora wa mati ayi yaga ta hɔ mo, nani ëdï wa mati o'dɔ mo na ti'da.”
12Neene vo lö'bö ayinnï zi mo ako'jonnï henye, “Ayɔlɔ ku Farasi'e na kamo mati zë owonnï nenye?”
13Mo aya'ba henye, “Biya wevo mati 'bu ma komorïyë ra dë ïyï akotɔ yaga ta ngara'da mo.” 14“Ila zë; zë ëdïnnï vo dagba'e 'ba vo komoköndu. Ëzë vo komoköndu akɔkɔ vo komoköndu 'dö rïyö akalëpïnnï mï wogo.”
15Petero iya henye, “Aka'da mï mala ne zi ze.” 16Yësu ako'jo hë zë henye, “'E gba na vo kazi kö'du yɔlɔ? 17Ongɔ 'e dë wa mati ödu ha ï'bë mï asi yaga ta ida 'ba ra? 18Mora wa mati asi yaga ta ha ayi tëmï di'di, nenye o'dɔ vïdï na ti'da. 19Kö'du yaga tëmï di'di ayi kö'du sösu ma kyënyë, 'ba wakofo, ko'dɔ ndoro, ko'dɔ kö'du kyënyë, logo, ndɔndɔ kö'du kyënyë kiya ra oka aba. 20Nenyee ëdïnnï wa mati o'dɔ vïdï na ti'da, mora wakonyo kazi kala kaka, o'dɔ mo dë na ti'da.”
Koma 'ba mbara Kanaana
21Ila bi nani, Yësu ï'bë zi dakaŋo 'ba Tora Sidoni aba. 22Mbara Kanaana tëmï dakaŋo nani ayi zi mo, udu rïyë henye, “Yere, Wisi 'ba Dawidi, mï yï mëyï ra ma! Wu'jë 'bama ëdï na riti kazi dayimona.”
23Yësu aya'ba da me'do dë. Here vo lö'bö 'bɔmo ayinnï zi mo alenzennï mo iyannï henye, “Utu mo 'de, kö'du mo asesi kudu yaga ge ze.”
24Mo aya'ba henye, “Utu ma nje zi tïmëlë tölu 'ba Yiserele.”
25Mbara ne ayi alɔmvɔ domo nï aba komo mo. Mo iya henye, “Yere akɔnyi ma!” 26Mo aya'ba henye, “Anza dë na laka zi koba mangɔlɔ'bɔ 'ba gisi ku'du zi wïhï 'bëzë.” 27Mo iya henye, “Ɔɔ Yere. Mora gbï le wïhï onyonnï kɔsɔ wa mati alëpï ta da tarabiza 'ba kyedree 'bënnï.”
28Neene Yësu aya'ba henye, “Mbara, ëdï kyedre koma aba! Kö'du ko'jo 'bëyï omba dɔ mo ku.” Wu'jë 'bɔmo akɔ'jɔ tëmï kadra nani.
Yësu ï'dï wakonyo zi vïdï kpuluku sowɔ
29Yësu ila bi nani ï'bë na konda ta dakapa Ranga 'ba Galilaya. Neene mo ï'bë rïyë kapa da döku alima kaŋo. 30Kyedre vïdï kayo ayinnï zi mo, ikannï vo ka'bo, vo komoköndu, vo keŋe, vo kazi me'do agamo'e na kayo, o'bannï zë ndï mo, mo akɔ'jɔ zë. 31Vïdï na rakaga mati zë ongɔnnï vo kazi me'do ëdï me'do, vo keŋe o'dɔ na laka, vo ka'bo alasi, vo komoköndu ongɔ bi. Zë ayetonnï Wïrï 'ba Yiserele.
32Yësu ako'jo vo lö'bö 'bënï 'e zi nï iya henye, “Mëdï kö'du rasösu aba kö'du vïdï nenyee, zë ëdïnnï ma aba ko'do wota aba anzannï dë wa aba zi konyo. Momba dë zi kutu zë 'de na o'bo, mandere zë akalëpïnnï da gërï.” 33Vo lö'bö 'bɔmo aya'bannï henye, “Kila da katɔ'bɔ ki'ja ze mangɔlɔ'bɔ kyɔ mï möku nenye zi kï'dï zi vïdï kayo ma here ne?” 34Yësu ako'jo henye, “Ëdï 'e mangɔlɔ'bɔ aba ndö?” Zë aya'bannï henye, “Madɔmorïyö gbɔngo nzoyi kyenze sisi.”
35Mo ayada zi vïdï kayo ne zi lima kaŋo dakaŋo. 36Neene mo oba mangɔlɔ'bɔ modɔmorïyö kyenze ne aba, mati mo ï'dï öwö'dï ku, mo owe zë ï'dï zë zi vo lö'bö'e, zë ï'dïnnï gbɔ zi vïdï. 37Zë ti'de onyonnï ɔvɔnnï. Tapëtï mo vo lö'bö obannï baga madɔmorïyö ndɔndɔ 'ba nzoyi wa lowe mati ɔsɔ. 38Watiti 'ba zë mati onyonnï ëdï kpuluku sowɔ, kazi mbara'e gisi aba. 39Tapëtï Yësu utu vïdï kayo ne ku 'de, mo ëkyï mï töŋbö ï'bë zi dakaŋo 'ba Magadɔni.
Currently Selected:
Matayo 15: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/