Matayo 14
14
Ikye da Yowani Bapatisi
1Mï kadra nani Heroda vo damöku owo kö'du Yësu, 2mo iya zi vïdï 'bënï ma atɔtɔ rë nnï ne henye, “Nenye ëdï Yowani Bapatisi, mo ënyï ku tëmï koli!” “Kö'du nere ra kö'du koro kyigɔ ëdï mï lɔɔ mï mo.”
3Yaanya aba Heroda ïrï Yowani ida mo ï'dï mo mï kamba ga kö'du 'ba Herodiyasi, mbara 'ba öndu mo Pilipo, 4kö'du Yowani ëdï kiya zi mo: “Anza dë mï kö'dukï'dï zi yï kïrï mo.” 5Heroda omba zi kofo Yowani, mora mo ëdï na tere kö'du 'ba vïdï, ga kö'du zë asösunnï mo nëbï ra. 6Mï ko'do ko'jo 'ba Heroda wu'jë 'ba Herodiyasi ɔlɔ zi zë, Heroda na rakyenyi ndra 7here mo alömu, zi kï'dï zi mo wa mati mo ako'jo kö'du mo. 8Here ga kö'du me'do 'ba ma mo, mo iya henye, “Ï'dï zi ma kinye da gbenje ne da Yowani Bapatisi.” 9Vo damöku kazi rakyenyi, mora ga kö'du lömu 'bɔmo yingɔ 'bënï ëtï bi 'ba wakonyo, mo ï'dï kö'du henye, kö'du ko'jo 'bɔmo ne zi dɔ mo komba 10ikye da Yowani mï kamba. 11Ika dɔ mo loko da gbenje ï'dï zi wu'jë ne, mo ïnjë zi ma nï. 12Vo lö'bö 'ba Yowani ayi ïnjënnï ida rɔ mo ne usunnï. Neene zë ï'bënnï ayadannï zi Yësu.
Yësu ï'dï wakonyo zi vïdï kpuluku muyï
13Mati Yësu owo kö'du mati o'dɔ rë nï, mo ï'bë töŋbö aba kutu nï aba zi bi mbiya. Mati vïdï kayo ne owonnï nenye, usunnï gɔ mo ndï aba tëmï gawo'e. 14Mati Yësu asi ongɔ vïdï kyedre kayo ne, mo di'di kyëyï aba kö'du zë akɔ'jɔ kɔɔ 'bëzë.
15Mati hutaga kara, vo lö'bö ayinnï zi mo iyannï henye, “Nenye ëdï möku ra, bi ëdï ku nzɔ zi töndu. Utu vïdï kayo ne 'de, here zë atɔ'bɔnnï tï'bë zi daliŋɔ zi kogo wakonyo zi nnï.”
16Yësu aya'ba henye, “Zë mï'bënnï dë. Ï'dï 'e zi zë wa zi konyo.”
17Zë aya'bannï henye, “Dëdï mo aba kinye nje mangɔlɔ'bɔ muyï kyenze rïyö.”
18Mo iya henye, “Ika 'e zë kinye zi ma.” 19Here mo ï'dï kö'du zi vïdï zi lima kaŋo da loma. Oba mangɔlɔ'bɔ muyï kyenze rïyö ne aba, ongɔ bi rïyë zi komorïyë, mo ï'dï öwö'dï, owe mangɔlɔ'bɔ ne. Neene mo ï'dï zë zi vo lö'bö'e, vo lö'bö'e ï'dï zë zi vïdï. 20Zë biya onyonnï ɔvɔnnï, vo lö'bö obannï baga 'butë dɔmo rïyö ndɔndɔ 'ba kɔsɔ nzoyi mo mati ɔsɔ. 21Watiti 'ba zë mati onyonnï ëdï kpuluku muyï kora'e, kazi mbara'e ehe gisi.
Yësu alasi ta da wini
22Kandi Yësu ï'dï vo lö'bö'e tëkyïnnï mï töŋbö tï'bënnï dagba komo nï zi kapa agamo, mati mo apere vïdï kayo ne ku. 23Tapëtï mo apere zë ku, mo ï'bë rïyë dakapa döku na bi dë nï zi mötu. Mati hutaga ayi, mo ëdï ani kutu nï aba, 24mora töŋbö ëdï ku nzɔ na kɔwɔ ta ra dakaŋo rë nï kɔhɔ kazi wini kagba, ga kö'du buluku ëdï luku kï'dï zi mo.
25Mï sowɔ 'ba bi kida 'ba yɔndɔ Yësu ï'bë yaga zi zë, ëdï lasi da föfö. 26Mati vo lö'bö'e ongɔnnï mo lasi ta da föfö, zë na tere. Zë iyannï henye, “Lawo 'ba yöku ra,” udunnï kazi tere. 27Mora Yësu kandi iya zi zë henye: “Uku mï 'e! Ma ra. Eree dë.”
28Petero aya'ba henye, “Yere ëzë ëdï yï ra, ayada zi ma tayi zi yï ta da wini.”
29Mo iya henye, “Ayi.”
Neene Petero asi kaŋo yaga tëmï töŋbö, lasi da wini tayi zi Yësu. 30Mora mati mo ongɔ buluku, mo na tere ayeto zi lëndï, udu rïyë, “Yere ayɔmɔ ma!”
31Kandi Yësu iza yaga kala nï akako mo. Mo iya henye, “Yï koma tisi aba, kö'du a'di dë yï jirijiri?”
32Mati zë ëkyïnnï mï töŋbö, buluku oli kaŋo. 33Neene zë mati ëdïnnï mï töŋbö amötunnï mo, iyannï henye, “Tïnyö yï Wisi 'ba Wïrï.”
Yësu akɔ'jɔ vo rakɔɔ mï Genesereta
34Mati zë umunnï kyëtï, zë ɔrɔnnï mï Genesereta. 35Mati vïdï 'ba bi nani ayɔlɔnnï Yësu, zë utunnï me'do zi bi mati toko ra dakaŋo ne biya. Vïdï ikannï vo rakɔɔ 'bënnï ti'de zi mo 36lenze mo zi kila vo rakɔɔ nje kise da ha bɔngɔ 'bɔmo, biya zë mati isennï rɔ mo akɔ'jɔ.
Currently Selected:
Matayo 14: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/