Matayo 13
13
Mala 'ba vo kofo kïlï
1Mï ko'do kölö nani Yësu ï'bë yaga ta liŋɔ alima dakapa föfö. 2Here vïdï kayo atɔtɔ rë nnï toko rɔ mo, mo ëkyï mï töŋbö alima mï mo, vïdï biya ɔrɔnnï da götï. 3Neene mo ayada zi zë kö'du kayo mï mala, iya henye: “Vo kisi yaka ï'bë yaga zi kïlï kofo 'bënï. 4Mati mo ëdï kïlï kofo, kya mo alëpï da gërï, ali ayinnï onyonnï 'de. 5Kya mo alëpï mï bi ma da ṛï'dï, anza dë kaŋo aba kyɔ. Ötu rïyë kandi, ga kö'du kaŋo ne alo dë. 6Mora mati kadra ayi rïyë, wevo ne alɔ'bɔ, zë akyïtrunnï ga kö'du anzannï dë ngara'da aba. 7Kofo agamo alëpï mï kutë kono, mati övu rïyë ofo wevo ne. 8Nduwë kofo agamo alëpï dakaŋo ma laka, ana dalɔgɔ ï'jö lami kölö, 'butë modaka, mandere 'butë da wota wa mati ïlï. 9Mo mati ëdï mbili aba, mo mowo.”
Mï ï'jö 'ba mala
10Vo lö'bö ayinnï zi mo ako'jonnï henye, “Kö'du a'di ame'do zi vïdï tëmï mala?” 11Mo aya'ba henye, “Kö'du yɔlɔ liwo 'ba damöku 'ba komorïyë ï'dï ku zi ye, mora anza dë zi zë. 12Mo mati ëdï mo aba akï'dï ndra, mo atëdï mo aba kyɔ. Mo mati anza mo aba, gbï le wa mati mo ëdï mo aba akoba kazi mo. 13Nenye ra ëdï kö'du mati ma me'do zi zë mï mala:
‘“Zë ongɔnnï bi le, ongɔnnï dë,
le kowo, zë owonnï dë mandere ï'jö kö'du yɔlɔ.”
14Mï zë ëdï kö'du kumë 'ba Yesaya:
‘“Akowo 'e mora kazi ï'jö kö'du yɔlɔ,
Akongɔ 'e mora ongɔ 'e dë.”
15Kö'du di'di 'ba vïdï nenye ayi ku na kyigɔ,
zë na kyigɔ kowo mbili nnï aba, zë idi kyele komo nnï ku.
Here zë akongɔnnï kyele komo nnï aba,
kowo mbili nnï aba,
ï'jö kö'du yɔlɔ di'di nnï aba, kopi da, ma kakɔ'jɔ zë.’
16“Mora ya'da ëdï kyele komo 'e ga kö'du zë ongɔnnï bi, mbili 'e ga kö'du zë owonnï kö'du. 17Kö'du ma yada zi 'e tïnyö, nëbï kayo vïdï tëdïja kyere ombannï zi kongɔ wa mati ongɔ 'e ne, mora ongɔnnï dë, zi kowo wa mati owo 'e ne, mora owonnï dë.
Yësu ayada mï mala 'ba vo kofo kïlï
18“Owo 'e a'di ra mï mala 'ba vo kofo kïlï. 19Ëzë vïdï maako owo kö'du kise 'ba damöku ayɔlɔ dë, Satani ayi oba 'de wa mati ïyï mï di'di mo. Nenye ëdï kofo mati ïlï da gërï. 20Mo mati ïrï kofo mati alëpï bi ma ṛï'dï aba, ëdï vïdï mati owo me'do ne kandi ïrï lɔŋɔ aba. 21Mora mo anza dë ngara'da aba, mo alima nje kadra kudu aba. Ëzë riti mandere wayaza ayi ga kö'du 'ba me'do ne, mo kandi alëpï 'de. 22Mo mati ïrï kofo mati alëpï mï kutë kono ne, ëdï vïdï mati owo me'do ne, mora kö'du sösu 'ba lima nenye wako'ba 'ba wadakayo akɔhɔ, o'dɔ kazi tana lɔgɔ. 23Mora mo mati ïrï kofo mati alëpï dakaŋo ma laka ëdï vïdï mati owo me'do ne ayɔlɔ. Mo ana lɔgɔ, ana lami kölö, 'butë modaka mandere 'butë da wota wa mati ïyï.”
Mala 'ba nyangölu
24Yësu ayada zi zë mala agamo: “Damöku 'ba Wïrï ëdï kaa vïdï mati ïlï kofo ma laka mï yaka 'bënï. 25Mora mati vïdï biya ëdï ko'do, vo wehe 'bɔmo ayi ïlï nyangölu mï kutë wana, ï'bë 'de. 26Mati wana ötu ï'dï dë nnï, nyangölu alaya kpa.
27“Vo ko'dɔ lɔɔ 'ba vo kyeti yaka ayinnï zi mo iyannï henye, ‘Kyedre, ïlï dë kofo ma laka ra mï yaka 'bëyï? Here ne nyangölu ne ayi ta kila?’
28“Mo aya'ba henye, ‘Vo wehe ra o'dɔ nenye.’ Vo ko'dɔ lɔɔ ako'jonnï hɔ mo, ‘Omba zi ze tï'bë kotɔ zë 'de yaga?’ 29Mo aya'ba henye, ‘'E 'e, ga kö'du ëzë ëdï 'e kotɔ nyangölu, akotɔ 'e ngara'da wana zë aba. 30Ila 'e 'dö rïyö mövunnï bi kölö le kadra 'ba wakumu. Mï kadra nani ma kayada zi vo wakumu'e: “Dagba ma kö'du nnï nyangölu kida zë na moti zi ko'bɔ, neene tɔtɔ da wana kika mo mï lɔ'bi 'bama.”’”
Mala 'ba kofo masatada langa aba
31Mo ayada zi zë mala agamo: “Damöku 'ba komorïyë ëdï kaa kofo masatada, kora maako oba ïyï mï yaka 'bënï. 32Neene ëdï le na tisi 'ba biya kofo 'bëyï, ëzë övu, ëdï na kyedre ndra wevo 'ba yaka ayi na kaga, here ali 'ba mï buluku ayi övunnï loko 'bënnï mï ngora 'bɔmo.”
Mala kö'du 'ba langa
33Mo ayada zi zë nduwë mala agamo: “Damöku 'ba komorïyë ëdï kaa langa mati mbara oba asusë mï kyedre 'ba lunzu le o'dɔ lɔɔ biya kpuru mï mama'da.” 34Yësu ame'do biya kö'du nenyee zi vïdï kayo mï mala, mo iya wa maako dë zi zë kazi ko'dɔ mala. 35Here ëdï na rë nï kinde wa mati ame'do kpuru nëbï: “Ma kayëhu ha ma mï mala, ma kiya wa mati oho kyere kï'dï 'ba damöku aba.”
Mala 'ba nyangölu aka'da mï mo
36Neene mo ila vïdï kayo ne ï'bë mï loko. Vo lö'bö 'bɔmo ayinnï zi mo iyannï henye, “Aka'da zi ze mala 'ba nyangölu mï yaka?” 37Mo aya'ba henye, “Mo mati ïlï kofo ma laka ne ëdï Wisi 'ba Vïdï. 38Yaka ëdï damöku, kofo ma laka ɔrɔ kö'du gisi 'ba damöku. Nyangölu ëdï gisi 'ba Satani, 39vo wehe mati ïlï zë ra ëdï Satani. Wakumu ëdï ndundu 'ba damöku, vo wakumu ra malayika'e.”
40“Ëzë nyangölu otɔ o'bɔ mï wa'do, here atëdï mï ndundu 'ba damöku. 41Wisi 'ba Vïdï akutu yaga malayika'e 'bënï, zë akotɔnnï yaga tëmï damöku 'bënï ti'de wa mati ëdï kika kö'du kyënyë biya ma o'dɔ kö'du kyënyë aba. 42Zë aku'dunnï zë mï wa'do kyedre, ani bi mati kudu atëdï kyïrï konyo aba. 43Neene vo tëdïja atanyi kaa kadra mï damöku 'ba 'Bu nnï. Mo mati ëdï mbili aba, mo mowo.”
Mala 'ba koho wakulu
44“Damöku 'ba komorïyë ëdï kaa wakulu koho mï yaka. Ëzë vïdï maaako i'ja, mo oho löhu, mï lɔŋɔ 'bɔmo ï'bë ogo yaga biya wa mati mo ëdï mo aba ogo yaka nani.
45“Löhu damöku 'ba komorïyë ëdï kaa börösö ëdï koma bi kö'du daabo ma laka. 46Mati mo i'ja kölö ma kyedre na laka, mo ï'bë 'de ogo yaga biya wa mati nëdï mo aba ehe ogo.
Mala 'ba öndu
47“Kpa löhu, damöku 'ba komorïyë ëdï kaa öndu mati o'ba kaŋo mï föfö ïrï biya kyïnë 'ba kyenze. 48Mati ëdï ku ndɔ, vo kïrï kyenze otɔnnï rïyë da götï. Neene zë alimannï kaŋo akö'dunnï kyenze ma laka ne mï baga, mora u'dunnï ma kyënyë ne 'de. 49Nenye atëdï mï ndundu 'ba damöku. Malayika'e atayinnï akinyennï ma kyënyë ta ra ma tëdïja, 50ku'du zë mï wa'do kyedre, ani bi mati kudu atëdï kyïrï konyo aba.”
51Yësu ako'jo henye, “Ayɔlɔ 'e wa nenyee ku ti'de?” Zë aya'bannï henye, “Ɔɔ.” 52Mo iya zi zë henye, “Hereene biya vo komoyandi 'ba kö'dukï'dï mati ayandi kö'du damöku 'ba komorïyë ëdï kaa vo kyeti loko mati ika yaga tëmï lɔ'bi 'bënï wakulu ma kyï kpa kaa ma kɔɔ.”
Nëbï kazi koro
53Mati Yësu inde mala nenyee ku, mo ï'bë dagba ta bi nani. 54Ayi zi gawo liŋɔ 'bënï, mo ayeto yandi vïdï mï bi mötu 'bëzë 'ba Yuda'e, zë na rakaga. Zë ako'jonnï henye, “Ta kila kora nenye i'ja kö'du yɔlɔ nenye kö'du koro kyigɔ nenyee aba?” 55“Nenye anza dë wisi 'ba vo kagakïsë? Anza dë ma mo ra ru mo Mariya, öndu 'bɔmo'e ra dë Yakoba, Yosepa, Simona nnï Yuda aba? 56Anza dë biya ëmï 'bɔmo'e ra ze aba ne? Ta kila kora nenye i'ja biya wa nenyee?”
57Zë na kamo mo aba. Mora Yësu iya zi zë henye, “Nje mï gawo liŋɔ 'bɔmo, mï liŋɔ 'bɔmo aba ra nëbï ëdï kazi wakoro.” 58Mo o'dɔ kö'du koro kayo dë ani ga kö'du 'ba kazi koma 'bëzë.
Currently Selected:
Matayo 13: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/