Matayo 12
12
Yere 'ba Sabata
1Mï kadra nani Yësu tï'bë kpuru tëmï yaka 'ba nyenyo mï ko'do 'ba Sabata. Vo lö'bö 'bɔmo 'e na o'bo, ayetonnï kozi kya ï'jö 'ba nyenyo konyo zë. 2Mati Farasi'e ongɔnnï nenye, zë iyannï zi mo, “Ongɔ te! Vo lö'bö 'bëyï 'e ëdïnnï ko'dɔ wa mati anza dë mï kö'dukï'dï mï ko'do 'ba Sabata.” 3Mo aya'ba henye, “Ako'jo 'e dë wa mati Dawidi o'dɔ mati mo aboka 'bënï ëtï na o'bo? 4Mo ödu mï loko 'ba Wïrï, mo aboka 'bënï ëtï onyonnï mangɔlɔ'bɔ koro mati anza dë mï kö'dukï'dï kö'du zë zi ko'dɔ, mora nje kö'du vo karasa'e. 5Mandere ako'jo 'e dë mï kö'dukï'dï henye, mï ko'do 'ba Sabata vo karasa'e mï yëkëlu oronnï ko'do ne dë, here ne anzannï dë na kö'du kyënyë? 6Ma yada zi 'e ma kyedre ta da yëkëlu ma ëdï kinye. 7Ëzë ayɔlɔ 'e a'di ra mï me'do nenyee, momba mïkyëyï anza wakumu, o'dɔ 'e vurë dë ra vïdï ma kazi kö'du kyënyë. 8Kö'du Wisi 'ba Vïdï ëdï Yere 'ba Sabata.”
Kora vo kala keŋe
9Tï'bë dagba ta bi nani, mo ï'bë mï bi mötu 'bëzë 'ba Yuda'e, 10kora kala keŋe aba ëdï ani. Ëdïnnï koma gërï ma zi susu Yësu, zë ako'jonnï hɔ mo, “Ëdï mï kö'dukï'dï zi kɔ'jɔ vïdï mï ko'do 'ba Sabata?” 11Mo iya zi zë, “Ëzë vïdï maako tëmï 'e ëdï tïmëlë aba alëpï mï wogo mï ko'do 'ba Sabata, akoba dë kotɔ mo yaga? 12Hala ndra vïdï ëdï na laka ta da tïmëlë! Hereene, ëdï mï kö'dukï'dï zi ko'dɔ kö'du laka mï ko'do 'ba Sabata.”
13Neene mo iya zi kora ne, “Iza yaga kala yï.” Here mo iza gɔ mo yaga a'ba gbɔ na laka löhu, te na laka kaa agamo. 14Mora Farasi'e ï'bënnï yaga o'dɔnnï mala hala zë akofonnï Yësu.
Vo ko'dɔ lɔɔ kinzi 'ba Wïrï
15Mati ayɔlɔ nenye, Yësu ï'bë 'de ta bi nani. Vïdï kayo usunnï gɔ mo, mo akɔ'jɔ biya kɔɔ 'bëzë, 16ayada komo zë anza dë zi yada ëyï ra nï. 17Nenye ëdï zi kinde wa mati ame'do kpuru nëbï Yesaya:
18“Kinye ëdï vo ko'dɔ lɔɔ 'bama mati minzi,
Mo mati mɔvɔ,
mï mo ma na rakyenyi,
ma kï'dï Lawo 'bama dɔ mo,
mo akayöyö kö'du ma na laka nje zi vïdï.
19Mo akatamo dë mandere kudu yaga,
vïdï maako akowo gu mo dë da gërï.
20Loma ma ïdë rë nï mo akowe dë,
ayölu lamba ma ëdï lëru dë,
le mo ako'dɔ vurë ma laka ma na laka nje zi ta'da.
21Mï ru mo vïdï akï'dï komokï'dï 'bënnï.”
Yësu nnï Belezububu aba
22Neene zë ikannï zi mo kora dayimona aba, mo na vo komoköndu ame'do dë, Yësu akɔ'jɔ mo, here mo ɔ'bɔ 'dö zi me'do bi kongɔ aba. 23Vïdï ti'de na rakaga iyannï henye, “Nenye atëdï Wisi 'ba Dawidi?”
24Mora mati Farasi'e owonnï nenye, zë iyannï henye, “Ëdï nje Belezububu aba, wisi 'ba vo damöku 'ba dayimona, mati vere nenye ore yaga dayimona.”
25Yësu ayɔlɔ kö'du sösu 'bëzë ne iya zi zë henye, “Damöku biya mati inye rë nï akpa rë nï akayaŋa, biya gawokyedre mandere dakota mati inye rë nï akpa rë nï ɔrɔ dë. 26Ëzë Satani ore yaga Satani, mo ëdï kinye rë nï akpa rë nï. Hala damöku 'bɔmo atɔ'bɔ tɔrɔ? 27Ëzë more yaga dayimona Belezububu aba, ëyï aba ra vïdï 'bee ore zë yaga? Here zë atëdïnnï na vo vurë 'bee. 28Mora ëzë more yaga dayimona Lawo 'ba Wïrï aba, damöku 'ba Wïrï ayi ku dee.
29“Mandere löhu, hala vïdï maako atɔ'bɔ tödu mï loko 'ba kora vo kyigɔ kïnjë 'de wasisi 'bɔmo, nje ëzë mo ida kora kyigɔ ne dagba. Neene mo atɔ'bɔ kolɔ loko 'bɔmo.
30“Mo mati anza dë ma aba ëdï kö'du aba ra ma, mo mati atɔtɔ dë ma aba akapere. 31Here ma yada zi ye, biya kö'du kyënyë sawiya akila zi vïdï, mora sawiya ra Lawo ila dë. 32Vïdï mati ame'do me'do kyënyë ra Wisi 'ba Vïdï akila, mora vïdï mati ame'do me'do kyënyë ra Lawo Kölö Laka ila dë, mandere mï kɔɔ nenye mandere mï kɔɔ ma zi tayi.
Kaga lɔgɔ nï aba
33“Ko'dɔ kaga na laka lɔgɔ 'bɔmo atëdï na laka, mandere ko'dɔ kaga na kyënyë lɔgɔ 'bɔmo atëdï na kyënyë, kö'du kaga ëdï yɔlɔ ta ra lɔgɔ 'bɔmo. 34'E gisi wiri 'ba kala'bete, hala atɔ'bɔ 'e, 'e mati na vo kö'du kyënyë, kiya kö'du maako na laka? Ga kö'du wa mati oso yaga tëmï di'di ha ra ame'do. 35Vïdï ma laka ika wa ma laka yaga 'ba wa ma laka mati asesi rïyë mï nï, vïdï ma kyënyë ika wa ma kyënyë yaga 'ba wa kyënyë mati asesi rïyë mï nï. 36Mora ma yada zi 'e henye, mï kadra 'ba vurë akako'jo ha vïdï biya ga kö'du me'do yawa mati zë ame'donnï. 37Kö'du me'do 'bëyï aba ra ako'dɔ vurë mo aba rë yï, me'do 'bëyï aba ra akayasi yï na laka, me'do 'bëyï aba ra atëdï na vo kö'du kyënyë.”
Kyïnë 'ba Yona
38Neene kya 'ba Farasi'e, vo komoyandi 'ba kö'dukï'dï ëtï iyannï zi mo, “Vo komoyandi, domba zi kongɔ kyïnë 'ba kö'du koro kazi yï.” 39Mo aya'ba henye, “Vïdï kyënyë, kofo vïdï vo ndoro ako'jonnï kö'du 'ba kyïnë wakoro! Mora ma kölö akï'dï dë nje kyïnë 'ba nëbï Yona. 40Kaa mati Yona ëdï ko'do wota, yɔndɔ wota aba mï kyenze kyedre, here Wisi 'ba Vïdï atëdï ko'do wota, yɔndɔ wota aba mï di'di 'ba dakaŋo. 41Vïdï 'ba Nënëwë atɔrɔnnï rïyë mï kadra 'ba vurë kofo vïdï nenye ëtï sawiya mo, kö'du zë otɔ dë nnï ga kö'du yëtï 'ba Yona, yaanya aba ma kyedre ta da Yona ëdï kinye. 42Mbara vo damöku 'ba Dambaro atënyï mï kadra 'ba vurë kofo vïdï nenye ëtï sawiya mo, kö'du mo ayi tëmï ndundu 'ba dakaŋo zi kowo kö'du yɔlɔ 'ba Solomono, yaanya aba ma kyedre ta da Solomono ëdï kinye.
Ta'ba 'ba lawo kyënyë
43“Ëzë lawo kyënyë asi yaga ta ra vïdï, ï'bë kpuru bi mbiya koma bi ralawo, i'ja dë. 44Neene iya henye, ‘Ma kata'ba zi loko mati mila.’ Mati ɔkɔ, i'ja loko ne na mbiya, akyitɔ ŋbala ï'dï mï wakɔ'jɔ laka. 45Neene ï'bë oba nï aba lawo madɔmorïyö agamo ndra na kyënyë ta dë nï, zë ï'bënnï loko alimannï ani. Ndundu riti 'ba vïdï nani ëdï ndra na kyënyë ta da ma dagba. Nani ëdï hala atëdï kofo vïdï kyënyë nenye aba.”
Ma 'ba Yësu ehe öndu'e
46Mati Yësu ëdï gba me'do zi vïdï kayo ne, ma mo öndu mo ëtï ɔrɔnnï yaga, ombannï zi me'do zi mo. 47Vïdï maako ayada zi mo, “Ma yï, öndu yï ëtï ëdïnnï tɔrɔ yaga, ombannï zi me'do zi yï.” 48Mo aya'ba zi mo, “Ëyï ra ma ma, ëyï 'e ra öndu ma?” 49Ayada zi vo lö'bö 'bënï 'e iya henye, “Kinye ëdï ma ma, öndu ma ëtï. 50Kö'du vïdï mati o'dɔ kö'du 'ba 'Bu ma mï komorïyë ëdï öndu ma, ëmï ma ehe ma ma.”
Currently Selected:
Matayo 12: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/