Matayo 11
11
Yësu nnï Yowani Bapatisi aba
1Tapëtï Yësu inde kira ga kö'du zi vo lö'bö 'bënï 'butë dɔmo rïyö ne, mo ï'bë dagba ta bi nani zi yandi kö'du yëtï kö'du aba mï gawo'e 'ba Galilaya. 2Mati Yowani owo mï kamba wa mati Kurïsïtö ëdï ko'dɔ, mo utu vo lö'bö 'bënï 'e 3zi ko'jo hɔ mo, “Yï ra mo mati ëdï zi tayi, mandere disi ze bi vïdï maako?”
4Yësu aya'ba henye, “Ï'bë 'e hulëhu ayada 'e zi Yowani wa mati owo 'e, ongɔ 'e aba: 5Vo komoköndu ongɔ bi, vo ka'bo alasi, zë mati ëdïnnï mönyu aba akɔ'jɔ, vo mbilikïsï owo kö'du, yöku ïnjë, kö'du yöyö laka ëdï yëtï zi vo leri. 6Ya'da ëdï vïdï mati alëpï dë 'de dalïkö aba ga kö'du 'bama.”
7Mati vo lö'bö 'ba Yowani ëdïnnï tï'bë, Yësu ayeto me'do zi vïdï kayo kö'du 'ba Yowani: “A'di ra ï'bë 'e yaga mï dalïpï zi kongɔ? Mbili loma ra ëdï kɔhɔ rë nï mï buluku? 8Ëzë anza dë here, a'di ra ï'bë 'e yaga zi kongɔ? Kora ra usu rë nï mï bɔngɔ'e ma laka? 'E 'e, zë mati usunnï bɔngɔ'e ma laka ëdïnnï mï liŋɔ 'ba vo damöku. 9Neene a'di ra ï'bë 'e yaga zi kongɔ? Nëbï ra? Ɔɔ, ma yada zi ye, ma ndra ta da nëbï. 10Nenye ëdï mo mati ayöru wa kö'du mo: ‘Ma kutu vo lïtu 'bama dagba komo yï, mo akakɔ'jɔ gërï 'bëyï dagba ta komo yï.’ 11Ma yada zi 'e tïnyö: Mï kutë zë mati o'jo mbara aba ani asi dë vïdï maako kyedre ta da Yowani Bapatisi; here mo mati ëdï tisiwa aba mï damöku 'ba komorïyë ëdï kyedre ta dɔ mo. 12Mï ko'do 'ba Yowani Bapatisi le yaanya aba, damöku 'ba komorïyë o'dɔ ku na wehe zi tï'bë dagba, vïdï vo wehe ïrïnnï na kyigɔ. 13Kö'du nëbï biya Kö'dukï'dï umë le mï tayi 'ba Yowani. 14Ëzë ëdï 'e da kö'du komba aba zi komba, mo ra ëdï Eliya mati ëdï zi tayi. 15Mo mati ëdï mbili aba mo mowo.
16“Zi a'di ra ma tɔ'bɔ yeri kofo vïdï nenye? Zë ëdïnnï kaa gisi mati ëdïnnï lima mï bi 'ba wakogo wa ko'jo yaga zi agamo'e:
17‘Dome wudë kö'du 'e,
ɔlɔ 'e dë,
Da ya'bi ngala 'ba da koli,
ï'dï 'e lu'bë dë.’
18Kö'du Yowani ayi, onyo wa dë mandere wakuwë, zë iyannï, ‘Mo ëdï dayimona aba.’ 19Mati Wisi 'ba Vïdï ayi, wakonyo wakuwë aba, zë iyannï, ‘Kinye ëdï vo wakonyo mbëmbë vo kuwë a'ji aba, aboka 'ba vo kɔhi kosee vo kö'du kyënyë ëtï.’ Mora kö'du yɔlɔ ayada tïnyö kö'du ko'dɔ 'bɔmo aba.”
Bu'bu zi gawokyedree ma kazi kotɔ dë nnï
20Neene Yësu ayeto zi yöyö gawokyedree mati mï mo kö'du kyedre koro'e 'bënï o'dɔ, ga kö'du zë otɔ dë nnï dë. 21“Bu'bu zi yï, Korazini! Bu'bu zi yï, Beteseyida! Ëzë kö'du koro'e mati o'dɔ mï 'e ne, o'dɔ mï Tora Sidɔni aba, zë otɔ dë nnï ku kyere mï bɔngɔ sowali yïku aba. 22Mora ma yada zi ye, atëdï ndra na laka kö'du Tora Sidɔni aba mï ko'do 'ba vurë ta dee. 23Yï, Kaparanamo, akïnjë yï rïyë zi fɔli? 'E 'e, atï'bë kaŋo zi bi yöndu. Ëzë kö'du koro'e mati o'dɔ mï yï ne o'dɔ mï Sɔdɔmo, akalima zi ko'do ndenye. 24Mora ma yada zi 'e henye atëdï ndra na laka kö'du Sɔdɔmo mï ko'do 'ba vurë ta dë yï.”
Lawo tëmï riti
25Mï kadra nani Yësu iya henye, “Ma yeto yï, 'Bu, Yere 'ba komorïyë dakaŋo aba ga kö'du oho wa nenyee kazi vo kö'du yɔlɔ, ma ayandi komo mo aba, alaya zë zi gisi ma sisi. 26Ɔɔ, 'Bu, kö'du nenye ëdï rakyenyi laka 'bëyï. 27“Biya wa ï'dï ku zi ma 'Bu ma aba. Vïdï maako ayɔlɔ Wisi dë nje 'Bu, vïdï maako ayɔlɔ 'Bu dë nje Wisi, zë mati Wisi ajeli zi yada mo.
28“Ayi 'e zi ma, biya 'e mati na riti kazi wayeto, ma kï'dï 'e lawo. 29Oba 'e kɔ'di ha isa 'bama dee ayandi 'e kazi ma, kö'du ma liyaa na raya'ba mï di'di, aki'ja 'e lawo kö'du lawo 'e. 30Kö'du kɔ'di ha isa 'bama ëdï kazi kyigɔ, wayeto 'bama ëdï pëlë.”
Currently Selected:
Matayo 11: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/