Galaatiya'en 4

1Ko ngiɗmi vi'igo on nanndii e ɗu'um : to ɓiɗɗo donoowo jawdi baaba muuɗum e laatii pamaro tawo, walaa ko senndi mo e maccuɗo, koo nde laatii kanko jeyi jawdi ndiin. 2Ammaa o ɗowtanto reenooɓe mo e darvanooɓe jawdi ndi o ronata, faa wakkaci ɗum baaba ma'ako resi yottoo. 3Noon enen boo, wakkaci ko laatinooɗen kama bilki'en, en laatake maccuɓe baawɗeeji laamaniiɗi duuniyaaru. 4Ammaa nde wakkaci ɗum Allah resi heevi, o liloyii Ɓiyiiko. *Ɓiɗɗo oon danyaama e debbo, o jooɗii lees *Tawreeta, 5gam o rimɗina ɓeen wonɓe lees baawɗe Tawreeta, o laatina en ɓiɓɓe Allah. 6Daahir en ɓiɓɓe Allah, kanjum waɗi o liloyi Ruhu Ɓiyiiko nder ɓerɗe meeɗen. Ruhu oon gonɗo nder meeɗen e noddira Allah « Baaba ». 7Gam ma'ajum, jo'oni naa on maccuɓe, on ɓiɓɓe. Nde laatii on ɓiɓɓe, on ndoney ko Allah ronnata ɓiɓɓe muuɗum.

Waannaare Bulus dow ikiliisiya Galaatiya

8Ndeenno, nde on anndaano Allah, on ɗowtanake allaaji feere ɗi laataaki goonga. 9Ammaa jo'oni nde annduɗon Allah, koo boo mi vi'a Allah e anndi on, noye co''ortooɗon lees baawɗeeji laamaniiɗi duuniyaaru tampuɗi, mehereeji ? Na on ngiɗi so''itaago lees maccungaaku ma'aji kadimaa ? 10Eɗon teddina goɗɗe nyalɗe e goɗɗi lebbi e wakkaciiji goɗɗi e goɗɗi duuɓi. 11Emi hula to' kuugal ngal kuumi hakkunde mooɗon laato mehere.

12Banndiraaɓe am, emi toroo on : tokkee laawol ngol tokkumi, gam miin boo emi tokki laawol ngol tokkuɗon. On mbaɗaayno yam layfi fuu. 13Kiimtee, nyawu ngu nyawmi kam hokkii yam laawol wa'ajingo on *Habaru Belɗum arande. 14Nyawu am godake munyal mooɗon korey, ammaa e noon fuu on njavaaki yam, on nefaay yam boo. Ammaa on njaɓii yam kama malaa'ikaajo Allah, e kama no njaɓruɗon Yeesu *Almasiifu. 15To noon, toye velvelo ngo nannooɗon woni jo'oni ? Mi tabbitinii kul ɗum waɗotono, daa on ittiino gite mooɗon, on kokkii yam. 16Jo'oni mi laatake ganyo mooɗon gam goonga ka mbi'imi on naa ?

17Ɓen ɗoon yimɓe ɓe mbaɗii hakkiilooji maɓɓe fuu dow mooɗon gam ɓe mbaɗa tokkon ɓe. Ammaa ko ɓe ngiɗi waɗgo vooɗaa, eɓe ngiɗi senndugo on e am gam hakkiilo mooɗon leloroo to maɓɓe. 18Waɗgo ko nafata e ti'inaare dum no booɗɗum. E haani mbaɗon noon koo ndeye, naa sey to emi wondi e mooɗon tan. 19Onon ɓikkon am, emi ɗoon ɓesda yargo torraa gam mooɗon, kama no debbo torrortoo wakkaci ŋatawre#4.19 Ŋatawre woni luuve koo naakuda., gam faa gikku Almasiifu tabbita nder mooɗon. 20Daahir emi yiɗi tawee hannde emi wondi e mooɗon, gam mi annda no mboliraneymi on, sabu mi majjii no mba'adeymi e mooɗon.

Hajara e Saaratu

21Onon yiɗɓe tokkugo *Tawreeta, ngeccee yam : on nanaay ko Tawreeta kaan vi'i naa ? 22Ka vi'i : *Ibraahim e woodi ɓiɓɓe worɓe ɗiɗo. Go'oto o rimdii ɗum e korɗo ma'ako Hajara, go'oto boo e Saaratu dimo. 23Ɓii korɗo danyaama kama no koo moye danyiraa, ammaa ɓii dimo oon danyaama fodde alkawal Allah. 24Ɗu'um ɗum misaalu. Rewɓe ɗiɗo ɓeen e kolla alkawalji ɗiɗi. Go'otal ngal Hajara, kangal woni alkawal vaamnde *Sinaay, e ngal rima maccuɓe. 25Hajara ɗum misaalu vaamnde Sinaay wonnde lesdi Arabiya. Emo nanndi e si'ire *Urusaliima jo'oniire, gam emo nder maccungaaku, kanko e ɓiɓɓe ma'ako. 26Ammaa Urusaliima wonde toon dow asama no rimre, kayre woni inna meeɗen. 27Gam *Deftere Seniinde vi'i :

« Velveltu, aan dimaro mo meeɗaay danygo !

Wullu wullaandu velvelo, aan mo meeɗaay nango naawɗum ŋatawre,

gam ɓikkon boora no ɓurey

ɓikkon giɗaaɗo ɗuuɗgo. »#4.27 Ecaaya 54.1

28Ammaa onon banndiraaɓe am, on ɓiɓɓe *alkawal Allah kama Iciyaaku. 29Noon no danyaaɗo no koo moye danyiraa torrirnoo danyiraaɗo gada e *Ruhu Allah ndeenno, kama noon boo ɗum laatorii faa hannde. 30Ammaa ɗume Deftere vi'i ? Nde vi'i : « Laggu korɗo oon e ɓiyum, gam ɓii korɗo rondataa e ɓii dimo sam. »#4.30 Fuɗɗoode 21.10 31To noon banndiraaɓe, enen naa en ɓiɓɓe korɗo, ammaa en ɓiɓɓe dimo.

Currently Selected:

Galaatiya'en 4: fuq

Highlight

Copy

Compare