Juan 17
17
Jesús ichi pari ɨtꞌaa tꞌɨ̃da
1Ma pedee jarapꞌeda, Jesupa ɨtꞌaa akꞌɨji mãikꞌaapa mãgaji:
—Akꞌõre, mɨ ewari pajida aji. Akꞌɨpíji mɨ wãara pɨchi Warra, mãgá mɨa akꞌɨpimerã pɨ wãara jõmaarã kꞌãyaara waibɨara bɨ. 2Pɨa eperãarã jõmaweda bɨji mɨ jua ekꞌari, chi mɨde ijãa pꞌanɨɨrã jõmaweda ichita pꞌanapataadamerã pɨ ome. 3Mãgá ichita pꞌanapataadaitꞌee pɨ ome, kꞌawaadakꞌãri pɨ aupaita wãara Tachi Akꞌõre mãikꞌaapa kꞌawaadakꞌãri mɨ, Jesucristo, pɨchia pëida eperãarã kꞌaripamerã.
4ʼNa pꞌekꞌau eujãde bɨ misa, mɨa akꞌɨpiji pɨ aupaita Tachi Akꞌõre, ookꞌãri pɨa mɨmaa oopidakꞌa. 5Ɨ̃rá Akꞌõre, akꞌɨpíji mɨ wãara pɨchi Warra. Mɨ atéeji pɨmaa bapariitꞌee pɨchi kꞌĩra wãreede, na pꞌekꞌau eujã bai naaweda badakꞌa.
Jesús ɨtꞌaa tꞌɨ̃da chi kꞌõpꞌãyoorã pari
6—Mɨa pɨ kꞌĩra unupipachi mɨ ome nipapatapꞌedaarãmaa, ma–itꞌee pɨa ãra jɨrɨtꞌera atada perã na pꞌekꞌau eujãdepemaarã tꞌãideepa. Përé paji mãikꞌaapa pɨa mɨchideerã papiji. Pɨ ũraade ijãa pꞌanɨpɨ. 7Ɨ̃rá ãrapa kꞌawa pꞌanɨ ne–inaa jõmaweda mɨa kꞌawa bɨ pɨata mɨmaa kꞌawapida. 8Mɨa jõma jarateeji pɨa jarapidakꞌa. Ãrapa ma pedee ijãajida, ijãa pꞌanadapꞌedaa perã wãara pɨata mɨ pëida.
9ʼMɨa chupɨria iidimaa bɨ ãra pari. Na pꞌekꞌau eujãdepemaarã jĩpꞌaarã pari chupɨria iidi–e bɨ. Pɨa jɨrɨtꞌeradaarã mɨde ijãadamerã, mãɨrã párita chupɨria iidimaa bɨ, ãra pɨchideerã perã. 10Mɨchideerã pɨchideerã aukꞌa. Ichiaba pɨchideerã mɨchideerã aukꞌa. Ãrapa ne–inaa oodakꞌãri mɨa oopi bɨkꞌa, akꞌɨpipata mɨ waibɨara bɨ apemaarã kꞌãyaara.
11ʼMɨ na pꞌekꞌau eujãde waa ba–e paitꞌee. Mamĩda ãra pꞌaneedaitꞌee, mɨ pɨ ome banaru misa. Mapa Akꞌõre, pɨ jõmaarã kꞌãyaara tꞌãri piara bairã, ãra akꞌɨ baparíiji pɨchi juapa pɨa mɨmaa teeda juapa, ãra tꞌãri a–ba, chikꞌinia pꞌanapataadamerã, pɨ mɨ ome baparikꞌa. 12Mɨ na pꞌekꞌau eujãde ãra ome bakꞌãri, ãra akꞌɨ bapachi pɨ kꞌapꞌɨa pari, apida atuanaadamerã. Aba chi atuaitꞌee bɨta atuaitꞌee, pꞌasamerã pɨ ũraa chonaarãweda pꞌãdade jaradakꞌa.
13ʼƗ̃rá mɨ wãitꞌee pɨmaa. Na pꞌekꞌau eujãde bɨde mɨa nãgɨ́ pedee jara bɨ, ãrapa o–ĩa ũridamerã mãikꞌaapa tꞌãri o–ĩadaidamerã, mɨ tꞌãri o–ĩa bɨkꞌa. 14Mɨa ãramaa pɨ ũraa jarateeji. Mɨde ijãadakꞌãri, na pꞌekꞌau eujãdepema ijãadakꞌaa beerãpa ãra kꞌĩra unuamaa iru pꞌaneejida, mɨkꞌa mãɨrã eere pꞌanɨ–e perã. 15Mɨa iidi–e bɨ pɨa ãra na pꞌekꞌau eujãdeepa uchia atamerã. Ma kꞌãyaara iidi bɨ ãra chi kꞌachia ooyaa bɨ juadeepa kꞌaripa atamerã. 16Mɨ mãgɨ́ jua ekꞌari bakꞌaakꞌa, ãra jida mãgɨ́ jua ekꞌari pꞌanada–e, iru eere pꞌanɨ–e perã. 17Mapa ãra awara bɨ́ji pɨ wãarata bɨde tꞌãri pia pꞌanapataadamerã pɨ baparikꞌa. Mãga pꞌanapataadai pɨ ũraa kꞌawaadakꞌãri, wãara bairã. 18Pɨa mɨ na pꞌekꞌau eujãdee pëidakꞌa, mãgá ichiaba mɨa ãra na pꞌekꞌau eujãdepemaarãmaa pëiji. 19Ãra kꞌaurepa mɨa ne–inaa jõma oopari pɨa oopi bɨkꞌa, mɨchi kꞌapꞌɨa piuru pɨjida mãga oo kꞌiniapa. Mɨa mãga oopari ãrapa pida aukꞌa wãara ne–inaa jõma pɨa oopi bɨkꞌa oopataadamerã.
Jesús ɨtꞌaa tꞌɨ̃da ichideerã jõmaarã pari
20—Ãra–itꞌee aupai mɨa iidi–e bɨda aji. Ichiaba iidimaa bɨ jõmaarã eperãarã pari, chi tꞌẽepai mɨde ijãadaitꞌeerã ãrapa jarateepata kꞌaurepa. 21Akꞌõre, mɨa iidi bɨ mãgɨ́ ijãapataarã ichiaba tꞌãri a–ba, chikꞌinia pꞌanapataadamerã, pɨ mɨ ome tꞌãri a–ba, chikꞌinia baparikꞌa. Mãgá pꞌanapataadakꞌãri, jõmaarãpa ijãadaitꞌee wãara pɨa mɨ pëiji na pꞌekꞌau eujãdee. 22Pɨa mɨmaa pia oodakꞌa mɨa ichiaba ãramaa pia ooji, tꞌãri a–ba pꞌanapataadamerã, pɨ mɨ ome tꞌãri a–ba baparikꞌa. 23Mɨ tꞌãri a–ba bapari ãra ome, pɨ mɨ ome baparikꞌa, ãra mãgá tꞌãri a–ba pꞌanapataadamerã ãchi kꞌõpꞌãyoorã ome. Mãgapɨ na pꞌekꞌau eujãdepemaarãpa kꞌawaadaitꞌee wãara pɨa mɨ pëiji mãikꞌaapa pɨa ãra aukꞌa kꞌinia iru bapari, mɨ kꞌinia iru baparikꞌa.
24ʼAkꞌõre, pɨa ãra jɨrɨtꞌeraji mɨde ijãapataadamerã. Mɨa kꞌinia bɨ ãra pꞌananadamerã mɨ ome, mɨ wãrumaa. Mãgá jõma mɨ kꞌĩra wãree unudaitꞌee, pɨa mɨmaa teeda mɨ kꞌinia iru bapachi perã na pꞌekꞌau eujã bai naaweda. 25Akꞌõre, pɨ jõmaarã kꞌãyaara tꞌãri piara bɨ. Na pꞌekꞌau eujãdepemaarãpa pɨ kꞌawada–e pꞌanɨ mĩda, mɨa pɨ kꞌawa bɨ mãikꞌaapa nãgɨɨrãpa pida kꞌawa pꞌanɨ pɨa mɨ pëida. 26Mɨa pɨ ãramaa kꞌawapiji mãikꞌaapa atꞌãri kꞌawapiitꞌee, mɨ ãra tꞌãride bapariitꞌee perã. Mãgá pɨa mɨ kꞌinia iru baparikꞌa, ãra jida ichiaba kꞌinia iru bapariitꞌeeda aji, ãrapa jõdee awaraarã kꞌinia iru pꞌanapataadamerã.
Currently Selected:
Juan 17: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.