Juan 18
18
Jesús jita atapidapꞌedaa
(Mateo 26.47-56; Marcos 14.43-50; Lucas 22.47-53)
1Mãgá ɨtꞌaa tꞌɨ̃pꞌeda, Jesús chi kꞌõpꞌãyoorã ome Cedrón to chakꞌe sĩajida. Mama tꞌĩujida olivo kꞌãide.
2Judas, Jesús traicionaaitꞌee badapa kꞌawa baji ãra tꞌĩudapꞌedaamãi, Jesús chi kꞌõpꞌãyoorã ome mama chipꞌepatapꞌedaa perã. 3Mapa Judapa mamaa ateeji Romadepema soldaorã chokꞌara mãikꞌaapa Tachi Akꞌõre te waibɨa jɨ̃apataarã, judiorã pꞌaareerã poroorãpa pëidapꞌedaa; ichiaba fariseorãpa pëidapꞌedaa. Espada#18.3 Espada nekꞌo choma bɨkꞌa bɨ, mamĩda kꞌĩraichaa weda pꞌewedee bapari. pakꞌuru ome, lámpara, ĩpirã paara anipajida. 4Jesupa kꞌawa baji ichi pꞌasaitꞌee bada. Mapa mãɨrã cheruta unu atakꞌãri, uchiaji ma ne–uu kꞌãideepa mãikꞌaapa iidiji:
—¿Kꞌaita jɨrɨ pꞌanɨma? aji.
5Ãchia pꞌanaujida:
—Jesús Nazaretdepema.
Jesupa mãgaji:
—Mɨda aji.
Judas, chi traicionaaitꞌee bada mama bainɨ̃ baji ma chedapꞌedaarã ome. 6Jesupa “mɨda” akꞌãri, ãchi jõma ãpɨtee jɨ̃tɨjida mãikꞌaapa eujãde baainajida.
7Mãpai Jesupa waya iidiji:
—¿Kꞌaita jɨrɨ pꞌanɨma? aji.
Waya pꞌanaujida:
—Jesús Nazaretdepema.
8Mãpai Jesupa mãgaji:
—Mɨa jaraji mɨ Jesús Nazaretdepema. Mɨta jɨrɨ pꞌanɨ pɨrã, mɨ ome pꞌanɨɨrã ichiakꞌau wãpítɨ.
9Jesupa mãga jaraji pꞌasamerã ichia naaweda jaradakꞌa. “Pɨa mɨ juade bɨdaarã apida atuada–e paitꞌee.”#18.9 Jn 6.39; 10.28; 17.12. 10Mãpai Simón Pedropa espada iru bada ẽe atapꞌeda, tꞌuji mãɨrãdepema aba, tꞌɨ̃jarapatapꞌedaa Malco. Mãgɨ́ kꞌɨɨrɨ juaraarepema orpꞌetꞌaaji. Mãgɨ́ pꞌaareerã poro waibɨa esclavo paji. 11Mãpai Jesupa mãgaji Pedromaa:
—¡Pɨchi espada ata bɨ́ji ichi badamãi! ¿Mɨa choo–e paikꞌã aji, mɨ Akꞌõrepa miapiru?#18.11 Griego pedeede: ¿Mɨa to–e paikꞌã aji, mɨ Akꞌõrepa ne–inaa asia topiru?
Jesús pꞌaareerã poro waibɨa Anás kꞌĩrapite bada
(Mateo 26.57-58; Marcos 14.53-54; Lucas 22.54)
12Mãpai ma soldaorã see nɨ̃bada ãchi poro ome mãikꞌaapa judiorã, chi Tachi Akꞌõre te waibɨa jɨ̃apataarã paara, Jesús jita atadachida. Mãpai jɨ̃ nɨ̃bɨjida. 13Naapɨara ateejida Anás temaa, ichi Caifás chãure pada perã. Aɨ naaweda Anás pꞌaareerã poro waibɨa paji. Mamĩda ma año Caifás ãchi poro waibɨa paji. 14Caifás paji chi jarada: “Piara bɨ eperã aba piumerã tachi judiorã pꞌuuru pidaarã pari.”#18.14 Jn 11.49-50.
Pedropa naapɨara Jesús kꞌawa–e bɨda ada
(Mateo 26.69-70; Marcos 14.66-68; Lucas 22.55-57)
15Jesús jita atadakꞌãri, Simón Pedro awaraa kꞌõpꞌãyo ome ãra tꞌẽe wãjida. Pꞌaareerã poro waibɨapa mãgɨ́ kꞌõpꞌãyo kꞌawa bada perã, tꞌĩupiji ma te tꞌɨakꞌau badamãi Jesús ome. 16Mamĩda Pedro taawa bainɨ̃ beeji puerta tꞌaide. Mapa chi apema kꞌõpꞌãyo#18.16 Na pedee pia pꞌãda, Juan, chi apema kꞌõpꞌãyo paji. Caifás kꞌawa badapa pedeenaji awẽra puerta jɨ̃apari ome Pedro ichiaba tꞌĩupimerã. Mãgá Pedro ichiaba tꞌĩuji. 17Ma puerta jɨ̃aparipa Pedromaa iidiji:
—¿Pɨ jã eperã kꞌõpꞌãyo–ekꞌã? aji.
Mãpai Pedropa pꞌanauji:
—Mɨ–eda aji.
18Jĩsua nɨ̃bada perã, pꞌaareerã poro waibɨa mimiapataarãpa mãikꞌaapa te jɨ̃apataarãpa tꞌɨpɨ orojida mãikꞌaapa kꞌara pꞌaimaa pꞌaneejida. Bainɨ̃ pꞌanɨde tꞌɨpɨtau ikꞌaawa, Pedro ichiaba ãchi ome kꞌara pꞌaimaa beeji.
Pꞌaareerã poro waibɨapa Jesumaa iidida
(Mateo 26.59-66; Marcos 14.55-65; Lucas 22.66-71)
19Mãɨmisa pꞌaareerã poro waibɨapa Jesumaa iidiji:
—¿Kꞌáirãma aji, pɨ kꞌõpꞌãyoorã? Pɨa, ¿kꞌãata jarateeparima? aji.
20Jesupa pꞌanauji:
—Mɨ jĩpꞌa pedeeparida aji, jõmaarã taide Akꞌõre te waibɨade mãikꞌaapa Tachi Akꞌõre Ũraa jarateepata te beede. Judiorã chepatamãi mɨa jarateepari. Maarepida chĩara ãpɨte pedee–e bɨ. 21¿Sãapꞌeda mɨmaa mãga iidi bɨma? aji. Mɨ pedee ũridapꞌedaarãmaa iidináji. Ãrapa jaradaipɨ, kꞌawa pꞌanadairã mɨa jarapari.
22Jesupa mãga jarakꞌãri, te jɨ̃aparipa iru kꞌĩramaa sĩji mãikꞌaapa mãgaji:
—¿Jãgata pꞌanauparikꞌã aji, pꞌaareerã poro waibɨamaa?
23Jesupa mãgaji:
—Mɨa pedee kꞌachia jaraji pɨrã, jarapáde aji, kꞌãare pedeeta kꞌachia baji. Mamĩda mɨa jarada wãara pɨrã, ¿sãapꞌeda mɨ sĩjima? aji.
24Mãpai Anapa Jesús jua jɨ̃pꞌeda, Caifamaa pëiji. Maapai Caifás pꞌaareerã poro waibɨa paji.
Pedropa waya Jesús kꞌawa–e bɨda ada
(Mateo 26.71-75; Marcos 14.69-72; Lucas 22.58-62)
25Mãɨmisa taawa Simón Pedro bainɨ̃ baji tꞌɨpɨtau ikꞌaawa kꞌara pꞌaimaa. Arii pꞌanadapꞌedaarãpa iidijida:
—¿Pɨ jã eperã kꞌõpꞌãyo–ekꞌã? ajida.
Pedropa meraji:
—¡Mɨ iru kꞌõpꞌãyo–eda! aji.
26Mamĩda awaraa eperãpa Pedro kꞌĩra kꞌawa ataji. Mãgɨ́ pꞌaareerã poro waibɨa mimiapari paji. Ëreerã paji Pedropa kꞌɨɨrɨ orpꞌetꞌaada ome. Mãgɨpa mãgaji:
—¿Pɨ–ekꞌã mɨa ne–uu kꞌãide Jesús ome unuda?
27Mãpai Pedropa waya meraji. Aramata etꞌerre kꞌariji.
Jesús Pilato kꞌĩrapite
(Mateo 27.1-2, 11-14; Marcos 15.1-5; Lucas 23.1-5)
28Tapꞌeda weda judiorã poro waibɨarãpa Jesús ateejida Caifás tedeepa Pilato palaciodee. Pascua fiesta ɨ̃rɨ pada perã, aɨ tede tꞌĩuda–e paji. Kꞌawa pꞌanajida judio–eerã tede tꞌĩudapꞌedaa paara, Pascua chikꞌo pꞌoyaa kꞌoda–e pakꞌaji. Mãga kꞌawajida ãchi ũraade jara bairã. 29Maperã Pilato uchiaji pedeede ãchi ome:
—¿Kꞌãare kꞌaurepata na eperã nãgá iru pꞌanɨma? aji.
30Pꞌanaujida:
—Na eperã tꞌãri kꞌachia–idaa–e bada paara, pɨmaa aneeda–e pakꞌajida ajida.
31Mãpai Pilatopa mãgaji:
—Mãgara pãchia atadarítɨ mãikꞌaapa iru akꞌɨ́tɨ pãchi ũraade jara bɨkꞌa. Maapꞌeda óotɨ pãchia oo kꞌiniata.
Mamĩda ma judiorãpa pꞌanaujida:
—Pãchi Romadepemaarã ũraade jara bɨ tai judiorãpa chĩara peedaikꞌaraa bɨ irua ne–inaa kꞌachia ooda kꞌaurepa.
32Mãga jarajida uchiamerã Jesupa aɨ naaweda jaradakꞌa, irua jarakꞌãri sãga ichi piutꞌee. 33Pilato waya ichi palaciode tꞌĩupꞌeda, Jesús tꞌɨ̃ ataji mãikꞌaapa iidiji:
—¿Pɨkꞌã aji, Judiorã Rey?
34Jesupa mãgaji:
—¿Pɨchi kꞌĩradoopapai mãga iidi bɨkꞌã, maa–e pɨrã awaraarãpa pɨmaa mãga jaradapꞌedaa perã?
35Pilatopa pꞌanauji:
—¡Mɨ judio–epɨ! Pɨchi aukꞌaarã́pata mãikꞌaapa pꞌaareerã poroorã́pata pɨ mɨmaa aneejida. ¿Pɨa kꞌãata oojima? aji.
36Jesupa pꞌanauji:
—Mɨ rey–eda aji, na pꞌekꞌau eujãdepema reyrãkꞌa. Ãchikꞌa pada paara, mɨ ome nipapataarã chõokꞌajida, judiorã poro waibɨarãpa mɨ jitanaadamerã. Mamĩda mɨ rey–e na pꞌekꞌau eujãdepema reyrãkꞌa.
37Mãpai Pilatopa iidiji:
—¿Wãara pɨ reykꞌã? aji.
Jesupa pꞌanauji:
—Pɨchia jarajipɨ. Mɨ reypɨ. Ma–itꞌee mɨ tꞌoji mãikꞌaapa cheji na pꞌekꞌau eujãdee; Tachi Akꞌõre wãarata jaraitꞌee. Wãarata kꞌawa kꞌinia pꞌanɨɨrã jõmaarãpa mɨ pedee ũripatada aji.
38Mãpai Pilatopa mãgaji:
—¿Kꞌaipa wãarata kꞌawayama? aji.
Jesús pëida peedamerã
(Mateo 27.15-31; Marcos 15.6-20; Lucas 23.13-25)
Mãga jarapꞌeda, Pilato taawaa uchiaji waya pedeede ma judiorã poro waibɨarã ome:
—Mɨa maarepida kꞌachia unu–eda aji, na eperãde. 39Mamĩda kꞌirãpátɨ año chaa Pascua fiestade mɨa preso aba kꞌena pëipari. Mapa ¿kꞌinia pꞌanɨkꞌã aji, mɨa Judiorã Rey apata kꞌena pëimerã?
40Mãpai arii pꞌanadapꞌedaarã jõmaweda waya biajida:
—¡Jãgɨ́ kꞌena pëináaji! ¡Barrabata kꞌena pë́iji!
Barrabás nechɨayaa bapachi mãikꞌaapa chõoyaa bapachi Romadepemaarã ome, ãchi jua ekꞌariipa uchia kꞌinia bada perã.
Currently Selected:
Juan 18: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.