Juan 11
11
Lázaro jai–idaada
1Eperã, tꞌɨ̃jarapatapꞌedaa Lázaro kꞌayaa baji. Ma eperã chi ɨ̃pewẽraarã María, Marta ome Betania pꞌuurudepema paji. 2(Tꞌẽepai mãgɨ́ Mariapa kꞌera weeji Jesús bɨɨrɨ ɨ̃rɨ mãikꞌaapa Jesús bɨɨrɨ pꞌooji ichi pudapa.) 3Lázaro kꞌayaa bada perã, chi ɨ̃pewẽraarãpa jara pëijida Jesumaa:
—Tachi Waibɨa, pɨ kꞌõpꞌãyo kꞌinia Lázaro kꞌayaa bɨ.
4Jesupa mãga ũrikꞌãri, mãgaji chi kꞌõpꞌãyoorãmaa:
—Ma kꞌayaapa jai–idaaru pɨjida, chokꞌai pꞌirabaiitꞌee. Iru kꞌayaa bɨ eperãarãpa kꞌawaadamerã Tachi Akꞌõre jõmaarã kꞌãyaara waibɨara bɨ mãikꞌaapa kꞌawaadamerã Tachi Akꞌõre Warrapa ne–inaa jõma ooi ichi Akꞌõrepa oopi bɨkꞌa. Mãga ookꞌãri, jarapataadaitꞌee Tachi Akꞌõre tꞌãri pia bapari eperãarã ome; chi Warra jida aukꞌa.
5Jesupa kꞌinia pꞌe iru bapachi Marta, María mãikꞌaapa Lázaro. 6Jesumaa jara pëijida mĩda, ichi badamãi kꞌãima omé beeji. 7Maapꞌeda mãgaji chi kꞌõpꞌãyoorãmaa:
—Waya wãdáma aji, Judea eujãdee.
8Pꞌanaujida:
—Mamĩda Tachi Jarateepari, makꞌɨara taarã–e bɨda ajida, judiorã poro waibɨarãpa pɨ mãupa peedaitꞌee pꞌanadapꞌedaa. ¿Waya jãmaa wã kꞌinia bɨkꞌã? ajida.
9Jesupa pꞌanauji:
—¿Ewari doce hora ɨ̃daa nɨ̃bapari–ekꞌã? aji. Eperã ãstaawa nipakꞌãri, tꞌĩutɨkꞌaa, ɨ̃daa nɨ̃bairã.#11.9 Mãga jarakꞌãri, Jesupa jara kꞌinia baji atꞌãri aupa–emaa ichi pëidapa oopi bɨkꞌa, pia nipapariitꞌee. 10Mamĩda eperã pꞌãrikꞌua ni pɨrã, tꞌĩutɨpari ɨ̃daa–e bairã.#11.10 Jesupa jara kꞌinia baji ichia aupakꞌãri ichi pëidapa oopi bɨkꞌa, kꞌachia beerã juade baaiitꞌee.
11Mãga jarapꞌeda, Jesupa mãgaji:
—Tachi kꞌõpꞌãyo Lázaro kꞌãi bɨ. Mamĩda mɨa ɨ̃rɨmatꞌaanaitꞌee.
12Chi kꞌõpꞌãyoorãpa pꞌanaujida:
—Tachi Waibɨa, iru kꞌãi bɨ pɨrã, jɨpaitꞌeeda ajida.
13Jesupa jara kꞌinia baji Lázaro jai–idaa bɨ. Mamĩda ãrapa kꞌawada–e pꞌanajida. Kꞌĩsiajida jĩpꞌa kꞌãi bɨ. 14Mãpai Jesupa jĩpꞌa mãgaji:
—Lázaro jai–idaajida aji. 15Pia bɨ mɨ naaweda wã–e paji, ma kꞌaurepa ɨ̃rá parãpa waapɨara ijãadaitꞌee perã Tachi Akꞌõrede. Ɨ̃rá wãdáma aji, Lazaromaa.
16Mãpai Tomapa (ichiaba tꞌɨ̃jarapatapꞌedaa Me–iso) apemaarãmaa mãgaji:
—Wãdáma aji, iru ome, tachi peekꞌooruta pɨjida.
Jesude ijãapataarã chokꞌai pꞌirabaidaitꞌee jai–idaaruta pɨjida
17Jesús pachekꞌãri Lázaro bapatamãi, kꞌãima kꞌĩmari baji ɨadapꞌedaa. 18Jerusalendeepa Betania pꞌuuru perá kilometro õpee baji. 19Mamãikꞌaapa judiorã chokꞌara cheepuru pꞌanajida Marta mãikꞌaapa María kꞌõpꞌãyaadaitꞌee, ãra ɨ̃pema jai–idaa bada perã. 20Martapa kꞌawaakꞌãri Jesús cheru, wãji iru kꞌĩrachuude. Mamĩda María teeda beeji. 21Jesús unukꞌãri, Martapa mãgaji:
—Tachi Waibɨa, pɨ cheda paara, mɨ ɨ̃pema jai–idaa–e pakꞌajida aji. 22Mamĩda mɨa kꞌawa bɨ atꞌãri pɨa iidiruta Tachi Akꞌõrepa ooitꞌee.
23Jesupa mãgaji:
—Pɨ ɨ̃pema pꞌirabaiitꞌeeda aji.
24Martapa pꞌanauji:
—Mɨa kꞌawa bɨ na pꞌekꞌau eujã jõdaikꞌãri, iru chokꞌai pꞌirabaiitꞌee mãikꞌaapa ɨtꞌaa wãitꞌee.
25Mãpai Jesupa mãgaji:
—Mɨa piu beerã waya chokꞌai pꞌanapiparida aji. Chi jai–idaada Akꞌõre eujãde ichita chokꞌai bapariitꞌeeda aji, mɨde ijãa bapachi perã. 26Ma awara chi chokꞌai bɨ jida atua–e. Ichita ɨtꞌari banaitꞌeeda aji, ijãa bapari perã. ¿Pɨa mãga ijãa bɨkꞌã? aji.
27Martapa mãgaji:
—Ijãa bɨpɨ. Pɨta Mesías, chi na pꞌekꞌau eujãdee cheitꞌee bada eperãarã kꞌaripade. Pɨta Tachi Akꞌõre Warra.
Jesús Lázaro ɨadapꞌedaamãi jẽeda
28Mãga jarapꞌeda, Marta wãji ichi ɨ̃pewẽra Mariamaa mãikꞌaapa kꞌɨɨrɨ ikꞌaawa mãganaji:
—Tachi Waibɨa nama bɨ. Pɨ tꞌɨ̃ bɨda aji.
29Mariapa mãga ũrikꞌãri, isapai Jesumaa wãji. 30Jesús waide pana–e baji pꞌuurude; atꞌãri Marta ome unudamãi baji. 31Judiorã María ome pꞌanadapꞌedaarãpa ichi isapai uchiaru unudakꞌãri, iru tꞌẽe wãjida, wãitꞌee jĩakꞌaapa jẽede Lázaro ɨadapꞌedaamãi.
32Mamĩda Mariapa Jesús unukꞌãri, bedabaidachi mãikꞌaapa mãgaji:
—Tachi Waibɨa, pɨ nama bada paara, mɨ ɨ̃pema jai–idaa–e pakꞌajida aji.
33Jesupa unukꞌãri María chi che pꞌanadapꞌedaarã ome jẽe para nɨ̃bɨ, tꞌãri pꞌua nɨ̃beeji. 34Mãpai iidiji:
—¿Sãma ɨajidama? aji.
Pꞌanaujida:
—Chepáde ajida, akꞌɨde.
35Jesús jẽedachi. 36Mãga unudakꞌãri, judiorãpa mãgajida:
—¡Akꞌɨ́tɨ! ¡Mãgara Lázaro kꞌinia iru baji!
37Mamĩda mãɨrã ũkꞌuruurãpa mãgajida:
—Na Jesupa tau pꞌãriu beerã pia unupipari. Maperã ¿Lázaro jɨpakꞌaji–ekꞌã ajida, jai–idaanaamerã?
Lázaro chokꞌai pꞌirabaida
38Lázaro piuda kꞌaurepa Jesús atꞌãri tꞌãri pꞌua nɨ̃bɨde, panaji Lázaro ɨadapꞌedaamãi. Mãu te uria baji mãikꞌaapa chi tꞌai jɨ̃a nɨ̃baji mãu choma bɨpa. 39Mapa Jesupa mãgaji:
—Jã mãu ãyaa ata bɨnadapáde aji.
Mãpai Marta, chi piuda ɨ̃pewẽrapa mãgaji:
—Mamĩda Tachi Waibɨa, ɨ̃rá iru kꞌapꞌɨa mikꞌia jo nɨ̃bɨda aji, kꞌãima kꞌĩmari bairã ɨadapꞌedaa.
40Mãpai Jesupa mãgaji:
—¿Mɨa pɨmaa jaraji–ekꞌã? aji. Ijãa bɨ pɨrã, Akꞌõrepa ne–inaa pia ooitꞌee eperãarãpa pꞌoyaa oodakꞌaa ãchi juadoopa.
41Mãpai chi mãu ãyaa ata bɨjida. Maapꞌeda Jesús ɨtꞌaa akꞌɨji mãikꞌaapa mãgaji:
—Akꞌõre, gracias mɨa chupɨria iidida ũrida perã. 42Kꞌawa bɨ mɨa iidipari chaa pɨa ũripari. Mamĩda na pedee jararu na eperãarãpa ũridamerã mãikꞌaapa ijãadamerã pɨa mɨ pëiji.
43Mãga jarapꞌeda, Jesupa golpe biaji:
—¡Lázaro, uchíaji jãmãikꞌaapa!
44Mãpai chi jai–idaa bada uchiaji. Ichi kꞌapꞌɨa jõma atꞌãri pɨra baji pꞌarupa; chi jua, jĩru paara. Ichiaba ichi poro pɨra baji pꞌarupa. Mapa Jesupa mãgaji:
—Iru ɨa bada pꞌaru ẽratꞌaadapáde aji.
Jesús jita atadaitꞌee pedeeteedapꞌedaa
(Mateo 26.1-5; Marcos 14.1-2; Lucas 22.1-2)
45Jesupa ooda unudakꞌãri, judiorã chokꞌara María ome wã pꞌanadapꞌedaarãpa irude ijãajida. 46Mamĩda mãɨrãdepema ũkꞌuru fariseorãmaa wãjida Jesupa ooda nepɨrɨde. 47Mapa ma fariseorã pꞌaareerã poroorã ome tꞌɨ̃ pëijida Junta Supremadepemaarã mãikꞌaapa mãgajida:
—¿Kꞌãata oodaitꞌeema? ajida. Jã eperãpa oomaa bɨ ne–inaa chokꞌara eperãarãpa pꞌoyaa oodakꞌaa ãchi juadoopa. 48Ita–aria bɨrutara, jõmaarãpa irude ijãadai. Mãgara Romadepemaarã chedayada ajida, Tachi Akꞌõre te waibɨa tꞌeetꞌaade mãikꞌaapa tachi aukꞌaarã jõtꞌaade.
49Judío tꞌɨ̃jarapatapꞌedaa Caifás pꞌaareerã poro waibɨa paji ma añode. Ichia mãgaji:
—Parãpa maarepida kꞌawada–e pꞌanɨda aji. 50Piara bɨ eperã aba piumerã tachi pꞌuuru pidaarã pari, tachi pꞌuuru pidaarã jõmaweda piudai kꞌãyaara.
51Mamĩda Caifapa mãga jara–e paji ichi kꞌĩsiadoopa. Ma añode pꞌaareerã poro waibɨa pada perã, Tachi Akꞌõrepa ne–inaa pꞌasaitꞌee bada ichimaa jarapiji. Maperãpɨ ichia jaraji Jesús piutꞌee ãchi pꞌuuru pidaarã pari. 52Mamĩda wãara ma eujãdepemaarã–itꞌee aupai piu–e paitꞌee paji. Ichiaba piutꞌee paji eperãarã jõmaarã pari, chi Tachi Akꞌõrede ijãapataadaitꞌeerã awara–awaraa eujãde pꞌanapataarã pari. 53Caifapa mãga jarada ewatedeepa judiorã poroorãpa pedeeteepachida Jesús peedaitꞌee.
54Maperã Jesús judiorã tꞌãide tau taawa nipakꞌaa paji naawedapemakꞌa. Mamãikꞌaapa wãji eujã pania wẽe bɨ kꞌaitꞌa, eperãarã makꞌɨara pꞌanadakꞌaa pꞌuurude. Mãgɨ́ pꞌuuru tꞌɨ̃jarapachida Efraín. Mama beeji chi kꞌõpꞌãyoorã ome.
55Ma tꞌẽepai judiorã Pascua fiesta ɨ̃rɨ pakꞌãri, eperãarã chokꞌara awara ãiipa chejida Jerusalendee Tachi Akꞌõre Ũraa pꞌãdade jara bɨkꞌa oodaitꞌee mãikꞌaapa pia pꞌanadaitꞌee iru kꞌĩrapite. 56Mama pꞌanɨde ma eperãarã Jesús jɨrɨ nipapachida mãikꞌaapa Tachi Akꞌõre te waibɨade pedee para baji ãchi kꞌõpꞌãyoorã ome:
—¿Kꞌãata kꞌĩsia pꞌanɨma? ajida. ¿Iru cheipaa na fiestade wa mãga–e?
57Mamĩda fariseorãpa mãikꞌaapa pꞌaareerã poroorãpa Jesús jita atapi kꞌinia pꞌanapachida. Mapa jarajida apidaapa Jesús unuruta pɨrã, ãchimaa jara chedamerã.
Currently Selected:
Juan 11: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.