Juan 10
10
Ovejaarã akꞌɨpari nepɨrɨda
1Mãpai Jesupa mãgaji:
—Mɨa wãarata jararu. Eperãarã oveja kꞌãipatamãi tꞌĩudakꞌãri, puerta eere tꞌĩupata. Maperã eperã ma puerta eere tꞌĩu–e pɨrã, mãgɨ́ nechɨayaa bɨ. 2Mamĩda chi eperã puerta eere tꞌĩupari; mãgɨ́ chi ovejaarã akꞌɨpari. 3Puerta jɨ̃aparipa ewapari mãgɨ́ oveja akꞌɨpari tꞌĩumerã. Mãpai irua ichi ovejaarã aba–abaa tꞌɨ̃pari. Ma ovejaarãpa iru pedee kꞌawapata perã, ãchi kꞌãipatamãiipa uchiadakꞌãri, iru tꞌẽe kꞌĩupꞌee wãpata. 4Ichi ovejaarã jõmaweda uchia atakꞌãri, ãra naa wãpari mãikꞌaapa chi ovejaarã iru tꞌẽe wãpata, chipari pedee kꞌawapata perã. 5Mamĩda awaraa eperãpa ma ovejaarã atee kꞌinia bɨ pɨrã, wãdakꞌaa mãgɨ́ ome. Ãyaa wãpata, mãgɨ́ pedee kꞌawadakꞌaa perã.
6Jesupa mãga nepɨrɨji jarateeitꞌee ma fariseorãmaa. Mamĩda ãchia kꞌawada–e paji irua kꞌãata jara kꞌinia bada.
Jesupa ichideerã pia akꞌɨpari
7Mapa Jesupa ãchimaa waya mãgaji:
—Mɨa wãarata jararu. Mɨda aji, ma puertakꞌa, ovejaarã tꞌĩupatamãi. 8Jõmaarãpa mɨ naa jara chedapꞌedaa ãchita Tachi Akꞌõrepa pëida, nechɨayaa beerãkꞌa pꞌanajidada aji. Mapa mɨchi ovejaarã, pia jaraitꞌeera, mɨchideerãpa mãɨrã pedee ijãada–e paji. 9Mɨda aji, puertakꞌa bɨ. Mɨa eperãarã o kꞌachiadeepa kꞌaripa atapari tꞌĩudamerã mɨchi jua ekꞌari mɨchideerã ome. Oveja akꞌɨpari pia bɨpa ichi ovejaarã akꞌɨparikꞌa, mãga pɨkꞌa mɨa mɨchideerã akꞌɨpari mãikꞌaapa kꞌaripapari pia pꞌanapataadamerã.
10ʼChi nechɨapari chepari nechɨaitꞌee aupai mãikꞌaapa peeitꞌee aupai; ichiaba ne–inaa jõma pꞌe atadariitꞌee aupai. Jõdee mɨ nama cheji eperãarã pia pꞌanapiitꞌee mãikꞌaapa ichita pꞌanapiitꞌee Tachi Akꞌõre ome.
11ʼMɨ chi ovejaarã akꞌɨpari tꞌãri piara bɨkꞌa mãikꞌaapa eperãarã mɨ ovejaarãkꞌa. Ovejaarã akꞌɨpari tꞌãri pia bakꞌãri, chi ovejaarã pia akꞌɨpari, mãga oo bɨ kꞌaurepa piuru pɨjida. 12Mamĩda mãga–e mimiapari jĩpꞌaa ome. Chĩara ovejaarã akꞌɨ bɨde, mãgɨpa ne–animal kꞌachia cheru unukꞌãri, mirudaipari ma ovejaarã kꞌiniakꞌaa perã. Maperãpɨ ne–animal kꞌachia bɨpa ma ovejaarã ũkꞌuru ata chepari mãikꞌaapa apemaarã awara ãyaa jĩchoopipari. 13Ma eperã mirudaipari ma ovejaarã akꞌɨpari–e perã mãikꞌaapa ma ovejaarã ichide–e perã.
14-15ʼOvejaarã akꞌɨpari tꞌãri piara bɨpa ichi ovejaarã pia akꞌɨparikꞌa, mãga pɨkꞌa mɨa mɨchideerã pia akꞌɨpari. Mɨ Akꞌõrepa mɨ tꞌãri kꞌawa bɨ; ichiaba mɨa pida mɨ Akꞌõre tꞌãri kꞌawa bɨ. Mãgá ichiaba mɨa mɨchi ovejaarã tꞌãri kꞌawa bɨ mãikꞌaapa ãrapa pida mɨ tꞌãri kꞌawa pꞌanɨ. Mɨchi kꞌapꞌɨa peepiitꞌee ãra kꞌaripaitꞌee. 16Mɨa ichiaba awaraa ovejaarã iru bɨ. Mãgɨ́ ovejaarã nãpemaarã–e, judiorã–e perã. Mamĩda mɨa ichiaba ãra kꞌaripa kꞌinia bɨ. Ãrapa ichiaba mɨ pedee ũripataadayada aji. Mapa mɨa ãra pꞌe bɨitꞌee apemaarã mɨchideerã, judiorã mɨde ijãapataarã ome, jõmaweda akꞌɨpari apai jua ekꞌari pꞌanapataadamerã.
17ʼMɨ Akꞌõrepa mɨ kꞌinia iru bapari mɨchi kꞌapꞌɨa peepiitꞌee perã eperãarã pari. Mamĩda waya chokꞌai pꞌirabaiitꞌee. 18Awaraarãpa mɨ kꞌapꞌɨa peepida–e pai. Ma kꞌãyaara mɨata ãchimaa mɨchi kꞌapꞌɨa peepiitꞌee. Mɨa mãga ooitꞌee mãikꞌaapa waya chokꞌai pꞌirabaiitꞌee, mɨ Akꞌõrepa mãga jara bairã. Iru jõmaarã kꞌãyaara waibɨara bɨ.
19Ma pedee ũridakꞌãri, judiorã waya kꞌĩsia awara–awaraa pꞌaneejida. 20Ũkꞌuruurãpa mãgapachida:
—¿Sãapꞌeda parãpa jã eperã pedee ũri pꞌanɨma? ajida. Iru kꞌapꞌɨade netuara merãtɨa bɨ mãikꞌaapa kꞌĩra kꞌawa–ee bɨ.
21Mamĩda awaraarãpa mãgapachida:
—Eperã kꞌapꞌɨade netuara merãtɨa bakꞌãri, mãga pedeekꞌaada ajida. ¿Netuarapa tau pꞌãriu beerã pia unupiikꞌã? ajida.
Judiorãpa Jesús yiaraa iru pꞌanadapꞌedaa
22Ma tꞌẽepai kꞌoijara pakꞌãri,#10.22 Ma eujãde invierno pakꞌãri, eujã kꞌũrasaa bapari. judiorãpa fiesta oojida Jerusalén pꞌuurude. Ma fiesta oopachida kꞌirãpadaitꞌee chonaarãwedapema ewari Tachi Akꞌõre te waibɨa awara bɨdapꞌedaa iru–itꞌee. 23Jesús mama nipaji Akꞌõre te ãukꞌidaa, Salomón Pórtico apatapꞌedaamãi. 24Maperã judiorã poro waibɨarãpa iru wapꞌɨra ata chejida mãikꞌaapa iidijida:
—¿Atꞌãri tai audú kꞌĩsiapimaa iru baitꞌeekꞌã? ajida. Pɨ Tachi Akꞌõrepa pëida, Mesías pɨrã, aweda jaráji.
25Jesupa pꞌanauji:
—Naaweda mɨa parãmaa mãga jarajida aji. Mamĩda ijãada–e paji. Mɨa oopari mɨ Akꞌõrepa oopi bɨkꞌa. Oopari ne–inaa eperãarãpa pꞌoyaa oodakꞌaa ãchi juadoopa. Ma kꞌaurepata ijãadaipia bɨ mɨ Tachi Akꞌõrepa pëida. 26Mamĩda parãpa ijãada–e pꞌanɨ, mɨchideerã–e perã. 27Mɨchideerãpa mɨ pedee kꞌawapata mãikꞌaapa mɨa ãchi kꞌawapari. Mapa ãchi mɨ tꞌẽe nipapata. 28Mɨa ãchi o kꞌachiadeepa kꞌaripa atapari atuanaadamerã; jĩpꞌa ichita chokꞌai pꞌanapataadamerã Tachi Akꞌõre ome. Apidaapa ãchi pꞌoyaa jãri atada–e pai mɨ juadeepa. 29Mɨ Akꞌõrepa ãchimaa mɨde ijãapiji. Iru jõmaarã kꞌãyaara waibɨara bɨ. Maperãpɨ apidaapa ãchi pꞌoyaa jãri atada–e pai iru juadeepa. 30Mɨ, mɨ Akꞌõre ome abapai.
31Mãga ũridakꞌãri, ma judiorãpa mãu pꞌe atajida iru batꞌa peedaitꞌee. 32Mamĩda Jesupa mãgaji:
—Mɨ Akꞌõrepa mɨmaa oopiparida aji, ne–inaa pia chokꞌara eperãarãpa pꞌoyaa oodakꞌaa ãchi juadoopa. ¿Chisãgɨ́ kꞌaurepata mɨ batꞌa pee kꞌinia pꞌanɨma aji, mãupa?
33Ma judiorãpa pꞌanaujida:
—Pɨa ne–inaa pia oo bɨ kꞌaurepa pɨ batꞌa pee kꞌiniada–eda ajida. Mãga oodaitꞌee pɨa Tachi Akꞌõre ãpɨte ikꞌachia pedeeda perã. Jaraji pɨ Tachi Akꞌõre ome aukꞌa, pɨ eperã bɨ mĩda taikꞌa.
34Mãpai Jesupa mãgaji:
—¿Parã ũraa pꞌãdade Tachi Akꞌõrepa jara bɨ–ekꞌã:
‘Mɨa jaraji parã mɨkꞌa; akꞌõre waibɨarã’? (Salmos 82.6)
35Tachi Akꞌõre Ũraa jõkꞌaa. Maperã pꞌoyaa merada–e. Ma ũraa pꞌãdade Akꞌõrepa tꞌɨ̃jaraji ‘akꞌõre waibɨarã mɨkꞌa’ iru pedee ũridapꞌedaarãmaa, parã chonaarãpa mãɨrã awara bɨdapꞌedaa perã iru–itꞌee. 36Tachi Akꞌõrepa mɨ aukꞌa awara bɨji mãikꞌaapa pëiji na pꞌekꞌau eujãdee. Mãga bɨta, ¿sãga parãpa jaradai mɨa ikꞌachia pedee baji Tachi Akꞌõre ãpɨte, jarakꞌãri mɨ Tachi Akꞌõre Warra? 37Oo–e pɨrã mɨ Akꞌõrepa oopi bɨkꞌa, mãgara ijãanáatɨ. 38Mamĩda oo bɨ pɨrã mɨ Akꞌõrepa oopi bɨkꞌa, mɨa jara bɨ ijãada–e pꞌanɨ mĩda, ijã́atɨ mɨa ooda kꞌaurepa. Mãgá parãpa wãara kꞌawaadai mɨ Tachi Akꞌõre ome abapai.
39Mãga ũridakꞌãri, waya iru jita atadaitꞌee paji. Mamĩda Jesús mirudachi.
40Maapꞌeda Jesús wãji Jordán to kꞌĩraikꞌa eeree. Mama Juanpa naaweda poro choopatamãi beeji. 41Mama bɨde eperãarã chokꞌara irumaa wãjida mãikꞌaapa ãchi pitapai mãgapachida:
—Juanpa oo–e paji ne–inaa eperãarãpa pꞌoyaa oodakꞌaa ãchi juadoopa, na eperãpa ooparikꞌa. Mamĩda irua wãarata jarapachi na eperãde.
42Maperãpɨ mama eperãarã chokꞌara Jesude ijãajida.
Currently Selected:
Juan 10: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.