Daniel 1
1
Babilonia eujãdepemaarãpa Judá eujãdepemaarã ãchi eujãdee ateedapꞌedaa
1Judá eujãdepema rey Joacim año õpee rey bɨde, Babilonia eujãdepema rey Nabucodonosorpa ichi soldaorã ome Jerusalén pꞌuuru wapꞌɨra atanajida. 2Mãga nɨde Tachi Akꞌõrepa rey Joacim Nabucodonosor eerepemaarãmaa jita atapiji. Ichiaba netꞌaa chokꞌara ichi tede nɨ̃bada jãri atapiji. Nabucodonosorpa rey Joacim mãikꞌaapa iru eere pꞌanadapꞌedaarã Babilonia eujãdee ateeji mãikꞌaapa Tachi Akꞌõre tedepema netꞌaa ateedapꞌedaa bɨnaji ichi netꞌaa pia ome ichi akꞌõre waibɨa apata tede. 3Maapꞌeda ichi jua ekꞌari mimiapataarã poro waibɨa Aspenamaa jaraji ma israelitaarã aneedapꞌedaarãdepema jɨrɨmerã rey ëreerãdepemaarã maa–e pɨrã awaraa pꞌaratꞌa paraa beerãdepemaarã. 4Jɨrɨipia bɨda aji, kꞌũtrãarã kꞌĩra wãree, kꞌapꞌɨade ne–inaa kꞌachia wẽe, poro wẽsaa, kꞌĩsia kꞌawaa mãikꞌaapa ne–inaa kꞌĩra tꞌãdoo kꞌawapata rey palaciode mimiadamerã. Aspenapa mãɨrãmaa Babiloniadepemaarã pedee jarateeipia bɨda aji, mãikꞌaapa Babiloniadepemaarã libro pꞌã iru pꞌanadapꞌedaa lee kꞌawaapiipia bɨda aji. 5Rey Nabucodonosorpa ichiaba jaraji ewari chaa ma kꞌũtrãarãmaa nekꞌopidamerã ichimaa nekꞌopipatapꞌedaakꞌa mãikꞌaapa vino topidamerã ichimaa topipatapꞌedaakꞌa. Jaraji año õpee paru misa, ma kꞌũtrãarãmaa jarateedamerã, maapꞌeda ichi palaciode mimia pꞌaneedamerã.
Daniel chi kꞌõpꞌãyoorã ome rey palaciode mimia pꞌaneedapꞌedaa
6Ma kꞌũtrãarã tꞌãide pꞌanajida Judadeepa uchiadapꞌedaarã tꞌɨ̃jarapatapꞌedaa: Daniel, Ananías, Misael mãikꞌaapa Azarías. 7Rey jua ekꞌari mimiapataarã poro waibɨapa mãgɨɨrã tꞌɨ̃ awara bɨkꞌooji: Daniel tꞌɨ̃ bɨji Beltsasar; Ananías tꞌɨ̃ bɨji Sadrac; Misael tꞌɨ̃ bɨji Mesac; mãikꞌaapa Azarías tꞌɨ̃ bɨji Abednego.
8Mamĩda Danielpa kꞌinia–e paji reypa chikꞌo kꞌopariida mãikꞌaapa vino topariida, Tachi Akꞌõrepa mãgee ne–inaa kꞌopi kꞌinia–e bada perã. Mapa ma poro waibɨamaa chupɨria iidiji ichimaa mãgee chikꞌo kꞌopinaamerã mãikꞌaapa mãgee vino topinaamerã. 9Tachi Akꞌõrepa ma poro waibɨamaa kꞌĩsiapiji Daniel pia akꞌɨ bapariimerã. 10Mamĩda ma poro waibɨapa Danielmaa mãgaji:
—Mɨa mɨchi poro waibɨa, tai rey, waawee baparida aji. Iruata jarajida aji, parãmaa mãgɨ́ chikꞌo vino ome teepariimerã. Mãgɨ́ chikꞌo kꞌoda–e pɨrã mãikꞌaapa irua parã awaraa kꞌũtrãarã parã ome año aukꞌa iru beerã kꞌãyaara kꞌaitekꞌeera unuru pɨrã, pɨchi kꞌaurepa mɨ otau tꞌɨapꞌepiitꞌeeda aji.
11Ma poro waibɨapa ichi jua ekꞌari mimiaparimaa jaraji irua Daniel, Ananías, Misael mãikꞌaapa Azarías akꞌɨ bapariimerã. Maapꞌeda Danielpa ma mimiaparimaa mãgaji:
12—Tai chupɨria kꞌawaapáde aji. Ewari diez paru misa, tai, pɨ mimiapataarãmaa verdura aupai kꞌopipáde aji, mãikꞌaapa pania aupai topipáde aji. 13Ma ewari diezmaa tai kꞌapꞌɨa akꞌɨpáde aji. Mãgá kꞌawaayada aji, awaraa kꞌũtrãarã reypa chikꞌo kꞌopari kꞌo pꞌanɨɨrã ome aukꞌa pꞌanɨ maa–e pɨrã aukꞌa pꞌanɨ–e. Maapꞌeda tai ome oopáde aji, pɨchia kꞌĩsia bɨkꞌa.
14Mãpai ma kꞌũtrãarã akꞌɨ badapa mãga ooitꞌeeda aji. Mãgá ewari diez wãyaarude ma kꞌũtrãarãmaa verdura aupai kꞌopiji mãikꞌaapa pania aupai topiji. 15Ma ewari diezmaa ma kꞌũtrãarã kꞌapꞌɨa piara pꞌanajida mãikꞌaapa juataura pꞌanajida awaraa kꞌũtrãarã reypa chikꞌo kꞌopari kꞌo pꞌanadapꞌedaarã kꞌãyaara. 16Maperã ma kꞌũtrãarã akꞌɨ badapa waa reypa chikꞌo kꞌopariida mãikꞌaapa vino topariida anee–e paji. Ma kꞌãyaara ãramaa verdura aupai kꞌopipachi mãikꞌaapa pania aupai topipachi.
17Mãgá ma kꞌũtrãarã kꞌĩmariweda Tachi Akꞌõrepa kꞌĩsia kꞌawaapiji mãikꞌaapa poro wẽsaapiji librode jara bɨ jõmaweda mãikꞌaapa ciencia jõmaweda kꞌawaapataadamerã. Ma awara Danielpa ichiaba kꞌawaapachi kꞌãata jara kꞌinia bɨ jõmaweda kꞌãimokꞌaraadapꞌedaa mãikꞌaapa kꞌãimokꞌaraa pɨkꞌa bɨde unudapꞌedaa. 18Rey Nabucodonosorpa jarada año pakꞌãri, rey jua ekꞌari mimiapataarã poro waibɨapa ma kꞌũtrãarã rey kꞌĩrapite ateeji. 19Rey ma kꞌũtrãarã ome pedeekꞌãri, awaraa apida ãrakꞌa unu–e paji. Mapa Daniel, Ananías, Misael mãikꞌaapa Azarías rey jua ekꞌari mimiamaa pꞌaneejida awaraa kꞌĩsia kꞌawaa beerã ome. 20Reypa iidikꞌãri ne–inaa kꞌĩsia kꞌawaa beerãpa kꞌawapatapꞌedaa, ma kꞌũtrãarãpa pipɨara pꞌanaupachida awaraa kꞌĩsia kꞌawaa beerã kꞌãyaara. Ãchi diez veces waa kꞌĩsia kꞌawaara pꞌanajida ma rey jua ekꞌari pꞌanadapꞌedaa petau tau kꞌawa beerã kꞌãyaara mãikꞌaapa ne–inaa waide pꞌasa–e bɨ kꞌawapatapꞌedaarã kꞌãyaara. 21Mãgata Daniel Babiloniadepema rey jua ekꞌari mimia beeji, rey Ciro naapema año rey beerumaa.
Currently Selected:
Daniel 1: sjaB
Highlight
Share
Compare
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.
