Daniel 2
2
Rey Nabucodonosorpa kꞌãimokꞌaraada
1Nabucodonosor año omé rey bɨde, kꞌãimokꞌaraaji. Ma kꞌãimokꞌaraadade kꞌĩsia nɨ̃bɨpa pꞌoyaa kꞌãikꞌaa paji. 2Mapa jara pëiji chedamerã ichi ekꞌari mimiapatapꞌedaa petau tau kꞌawa beerã, ne–inaa waide pꞌasa–e bɨ jarapataarã, dapꞌa to kꞌawaa beerãkꞌa beerã mãikꞌaapa Babiloniadepema kꞌĩsia kꞌawaa beerã. Kꞌinia baji mãɨrãpa jaradamerã ichia kꞌãimokꞌaraada kꞌãata jara kꞌinia bɨ. Mapa ãra rey kꞌĩrapite cheepurujida.
3Mãpai irua mãgaji:
—Mɨa kꞌãimokꞌaraada kꞌaurepa kꞌĩsia nɨ̃bɨda aji, kꞌawa–e bairã kꞌãata jara kꞌinia bɨ.
4Mãpai arameo pedeede ma kꞌĩsia kꞌawaa beerãpa irumaa mãgajida:
—¡Rey Waibɨa, taipa kꞌinia pꞌanɨ pɨ ichita bapariimerã! Tai pɨ mimiapataarã. Taimaa pɨa kꞌãimokꞌaraada nepɨrɨpáde ajida. Mãgá taipa jaradayada ajida, kꞌãata jara kꞌinia bɨ.
5Mãpai reypa pꞌanauji:
—Mɨa nãga kꞌĩsia iru bɨda aji. Parãpa jarada–e pɨrã mɨa kꞌãimokꞌaraada mãikꞌaapa jarada–e pɨrã kꞌãata jara kꞌinia bɨ, mɨa parã kꞌapꞌɨa pitikiapikꞌooitꞌeeda aji. Ma awara mɨa pãchi te tꞌeepikꞌooitꞌee jõma jõdarumaa. 6Mamĩda jararuta pɨrã mɨa kꞌãimokꞌaraada mãikꞌaapa jararuta pɨrã ma kꞌãimokꞌaraada kꞌãata jara kꞌinia bɨ, ma pari parãmaa netꞌaa pi–ia teeitꞌeeda aji, mãikꞌaapa jõmaarãpa parã tꞌo pꞌanadaitꞌee. Mapa jaradapáde aji, mɨa kꞌãimokꞌaraada mãikꞌaapa jaradapáde aji, ma kꞌãimokꞌaraada kꞌãata jara kꞌinia bɨ.
7Mãpai ma kꞌĩsia kꞌawaa beerãpa waya mãgajida:
—Rey Waibɨa, tai pɨ mimiapataarã. Pɨa kꞌãimokꞌaraada taimaa nepɨrɨ́ji. Mãgá taipa jaradaitꞌeeda ajida, kꞌãata jara kꞌinia bɨ.
8Mãpai reypa pꞌanauji:
—Mɨa ooitꞌee kꞌĩsia iru bɨ parãpa pia kꞌawa pꞌanɨda aji. ¿Maperã parã nama mɨ kꞌĩrapite taarã pꞌana kꞌinia pꞌanɨ–ekꞌã? aji. 9Mɨa kꞌãimokꞌaraada jarada–e pɨrã, kꞌawa pꞌanɨda aji, parã ome kꞌãata pꞌasaitꞌee. ¿Parã pedeeteejida–ekꞌã seewa jaradaitꞌee maa–e pɨrã mɨ kꞌũradaitꞌee, mɨa kꞌĩsia awara atai jĩakꞌaapa? Mɨa kꞌãimokꞌaraada jarátɨ. Mãgá mɨa kꞌawaayada aji, parãpa wãara kꞌawa pꞌanɨ ma kꞌãimokꞌaraada kꞌãata jara kꞌinia bɨ.
10Mãpai ma kꞌĩsia kꞌawaa beerãpa mãgajida:
—Rey Waibɨa, na pꞌekꞌau eujãde eperã apida wẽ–eda ajida, pɨa iidi bɨ jaramerã. ¡Rey apidaapa waide nãgee ne–inaa iidikꞌaada ajida, ichi jua ekꞌari bee petau tau kꞌawaa beerãmaa, ne–inaa waide pꞌasa–e bɨ jarapataarãmaa maa–e pɨrã tai Babiloniadepema kꞌĩsia kꞌawaa beerãmaa!
11’Rey Waibɨa, pɨa audú ne–inaa chaaree iidi bɨ. Apidaapa pꞌoyaa jarada–e. Aba tachi Babiloniadepemaarã akꞌõre waibɨarãpapaita mãga oodai. ¡Mamĩda ãra eperãarã tꞌãide pꞌanadakꞌaada! ajida.
12Ma kꞌĩsia kꞌawaa beerãpa mãga jaradakꞌãri, rey audupɨara kꞌĩraudachi. Mapa Babiloniadepema kꞌĩsia kꞌawaa beerã jõmaweda peepikꞌooitꞌeeda aji. 13Mãpai ma reypa ichia jarada pꞌãpipꞌeda, jaraji Babiloniadepema kꞌĩsia kꞌawaa beerã jõmaarã peekꞌoodamerã. Maperã Daniel chi kꞌõpꞌãyoorã ome aukꞌa jɨrɨmaa pꞌaneejida peekꞌoodaitꞌee.
14Mãpai rey jɨ̃apataarã poro waibɨa Arioc uchiakꞌãri Babliloniadepema kꞌĩsia kꞌawaa beerã peekꞌoode, Danielpa irumaa tꞌãri pia mãikꞌaapa kꞌĩsia kꞌawaa pedeeji. 15Iidiji:
—¿Sãapꞌeda reypa ma ley taarã–eweda pꞌãpijima? aji.
Mãpai Ariocpa Danielmaa jaraji sãapꞌeda reypa mãga ooji. 16Mãga ũrikꞌãri, Daniel reymaa wãji mãikꞌaapa irumaa chupɨria iidiji nɨmerã, ichia jararu misa ma kꞌãimokꞌaraada kꞌãata jara kꞌinia bɨ. 17Maapꞌeda Daniel ichi temaa panakꞌãri, jõmaweda nepɨrɨji chi kꞌõpꞌãyoorã Ananiamaa, Misaelmaa mãikꞌaapa Azariamaa. 18Ma awara jaraji ãchia Tachi Akꞌõre ɨtꞌari baparimaa chupɨria iididamerã, irua ma ne–inaa apidaapa kꞌawada–e pꞌanɨ kꞌawapimerã. Mãgá ichi, chi kꞌõpꞌãyoorã mãikꞌaapa Babiloniadepema kꞌĩsia kꞌawaa beerã paara piuda–e paitꞌee.
Danielpa ɨtꞌaa tꞌɨ̃da
19Ma ewate pꞌãrikꞌua kꞌãimokꞌaraa pɨkꞌa bɨde Tachi Akꞌõrepa Danielmaa reypa kꞌãimokꞌaraada kꞌawapiji. Danielpa mãga kꞌawakꞌãri, Tachi Akꞌõre ɨtꞌari baparimaa na pedee pia jaraji:
20“¡Tachi Akꞌõre tꞌɨ̃ ichita pipɨara bɨ jõmaarã tꞌɨ̃ kꞌãyaara! Irua nejõmaata kꞌawapari mãikꞌaapa ichi júapata ne–inaa jõmaweda oopari. 21Ewari, atane mãikꞌaapa año iru jua ekꞌari nɨ̃bɨ. Eperã rey papipari mãikꞌaapa uchiapipari. Kꞌĩsia kꞌawaa beerãmaa irua kꞌĩsia kꞌawaapipari mãikꞌaapa poro wẽsaa beerãmaa ne–inaa kꞌawaapipari. 22Kꞌawaapipari ne–inaa eperãarãpa pꞌoyaa kꞌawada–e pꞌanɨ; ne–inaa pꞌãriude pɨkꞌa bɨ pɨjida. Mãga oopari ichi ɨ̃daade bapari perã. 23Mɨ akꞌõreerã Akꞌõre Waibɨa, pɨmaa tꞌãri o–ĩa ɨtꞌaa tꞌɨ̃ bɨ mãikꞌaapa gracias jara bɨ, pɨa mɨ kꞌĩsia kꞌawaa mãikꞌaapa sõcharra papida perã. Taipa ɨtꞌaa iididapꞌedaa pɨa mɨmaa kꞌawaapiji. Reypa kꞌãimokꞌaraada kꞌawaapiji.”
Danielpa jarada reypa kꞌãimokꞌaraada
24Maapꞌeda Daniel wãji Ariocmaa, irumaa reypa jarada perã Babiloniadepema kꞌĩsia kꞌawaa beerã peekꞌoomerã. Danielpa mãgaji:
—Babiloniadepema kꞌĩsia kꞌawaa beerã peenáaji. Mɨ rey kꞌĩrapite ateepáde aji, irua kꞌãimokꞌaraada mɨa jaraitꞌee perã.
25Aramata Ariocpa Daniel ateeji rey Nabucodonosor kꞌĩrapite mãikꞌaapa reymaa mãgaji:
—Judiorã tachia presoorãkꞌa aneedapꞌedaarã tꞌãide mɨa na eperã unuji. Rey Waibɨa, irua jaraitꞌeeda aji, pɨa kꞌãimokꞌaraada kꞌãata jara kꞌinia bɨ.
26Mãpai reypa iidiji Danielmaa; ichiaba Beltsasar apatapꞌedaa:
—¿Pɨa jaraikꞌã aji, mɨa kꞌãimokꞌaraadade unuda mãikꞌaapa ma kꞌãimokꞌaraada kꞌãata jara kꞌinia bɨ?
27Mãpai Danielpa pꞌanauji:
—Rey Waibɨa, pɨa iidimaa bɨ ne–inaa eperãarãpa kꞌawadakꞌaa: kꞌĩsia kꞌawaa beerãpa; ne–inaa waide pꞌasa–e bɨ jarapataarãpa; petau tau kꞌawaa beerãpa; lucero akꞌɨdapꞌeda, ne–inaa jarapataarãpa pida. Mãɨrãpa mãgee ne–inaa pꞌoyaa jaradakꞌaa, kꞌawadakꞌaa perã. 28Mamĩda Akꞌõre Waibɨa ɨtꞌari baparípata ne–inaa eperãarãpa kꞌawadakꞌaa kꞌawapipari. Rey Waibɨa, pɨa kꞌãimokꞌaraada kꞌaurepa iruata kꞌawaapiji ne–inaa ewari cherude pꞌasaitꞌee bɨ. Mɨa jaraitꞌee pɨa kꞌãimokꞌaraada mãikꞌaapa pɨa awaraa ne–inaa unuda kꞌãimokꞌaraa pɨkꞌa bɨde, pɨchi pꞌarude kꞌãi bɨde. 29Rey Waibɨa, pɨchi pꞌarude bɨde, kꞌĩsia beeji ne–inaa ewari cherude pꞌasaitꞌee bɨde. Chi ne–inaa eperãarãpa kꞌawadakꞌaa kꞌawaapiparipa pɨmaa mãga kꞌawaapiji. 30Mɨmaa ichiaba ma ne–inaa kꞌawaapiji. Mãga oo–e paji mɨ awaraa eperãarã kꞌãyaara kꞌĩsia kꞌawaara bairã. Rey Waibɨa, irua jĩpꞌa mãga ooji mɨa pɨmaa jarateemerã ma kꞌãimokꞌaraada kꞌãata jara kꞌinia bɨ mãikꞌaapa pɨa ma unuda kꞌawaamerã.
31’Rey Waibɨa, pɨa kꞌãimokꞌaraadade unuji eperãkꞌa bainɨ̃ bɨ. Mãgɨ́ nẽchoma, urua nɨ̃baji. Ne–inaa tachi pꞌerapiparikꞌa baji. 32Chi poro nẽedee aupai baji. Chi tꞌũa mãikꞌaapa jua pꞌaratꞌadee baji. Chi bi mãikꞌaapa makꞌara broncedee baji. 33Chi jĩru hierrodee baji; chi bɨɨrɨ chaachaa esa–aukꞌa hierrodee baji, esa–aukꞌa yooro paadadee baji. 34Pɨa ma eperãkꞌa bɨmaa akꞌɨmaa bɨde, mãu eedeepa ichi itu ɨradachi. Mãgá chi bɨɨrɨ hierrodee bada mãikꞌaapa yoorodee bada ãrikꞌoodachida. 35Aramata ma eperãkꞌa bɨ hierrodee bada, broncedee bada, pꞌaratꞌadee bada, nẽedee bada tꞌodoochoodachi. Ma eperãkꞌa bada yooro pꞌorakꞌa beeji, pꞌoojarade trigo chi edeepa ãyaa pꞌe atadakꞌãri, trigo kꞌiru pꞌora beeparikꞌa. Nãupa trigo kꞌiru ãyaa ateeparikꞌa, mãga pɨkꞌa nãupa ma eperãkꞌa badadepema yooro pꞌorakꞌa beeda wẽpapiji, waa unuda–e parumaa. Jõdee ma mãu eedeepa pɨra cheda ma eperãkꞌa bɨ bɨɨrɨmaa na pꞌekꞌau eujã jõmaade ee choma padachi.
36’Rey Waibɨa, mãga paji pɨa kꞌãimokꞌaraada. Ɨ̃rá mɨa jaraitꞌee kꞌãata jara kꞌinia bɨ. 37Rey Waibɨa, pɨ waibɨara bɨ awaraa reyrã kꞌãyaara, ɨtꞌaripema Akꞌõre Waibɨapa pɨ mãga papida perã. Eperãarã chokꞌara pɨ jua ekꞌari bɨji. Juataura papiji, awaraa pꞌuuru pidaarã chokꞌara pꞌoyaamerã mãikꞌaapa eperãarãpa pɨ tꞌo pꞌanadamerã. 38Rey Waibɨa, irua pɨ jua ekꞌari bɨji awaraarã eujã waibɨa; eperãarã chokꞌara ãchi pꞌanapatamãi, mẽepema ne–animalaarã mãikꞌaapa ipanaarã. Ma jõma pɨ jua ekꞌari bɨda perã, pɨ ma eperãkꞌa bada poro nẽedee oodákꞌapɨ bɨ. 39Pɨ tꞌẽe awaraa rey uchiaitꞌee. Mãgɨ́ ma eperãkꞌa bada tꞌũa mãikꞌaapa jua pꞌaratꞌadee oodákꞌapɨ baitꞌee. Mamĩda mãgɨ́ makꞌɨara waibɨa pa–e paitꞌee. Ma eere awaraa rey uchiaitꞌee. Mãgɨ́ ma eperãkꞌa bada bi mãikꞌaapa makꞌara broncedee oodákꞌapɨ baitꞌee. Mãgɨpa na eujã jõmaweda ichi jua ekꞌari iru bapariitꞌee. 40Ma eere rey awaraa uchiaitꞌee. Mãgɨ́ ma eperãkꞌa bada jĩru hierrodee oodákꞌapɨ baitꞌee. Mãgɨ́ juataura baitꞌee hierro chaaree baparikꞌa. Hierropa ne–inaa ãriparikꞌa mãikꞌaapa jõpiparikꞌa, mãga pɨkꞌa ma reypa awaraa reyrã jõmaweda pꞌoyaaitꞌee mãikꞌaapa jõpiitꞌee.
41’Rey Waibɨa, pɨa unuji ma eperãkꞌa bada bɨɨrɨ mãikꞌaapa chi bɨɨrɨ kꞌɨ̃ chakꞌeerã hierro yooro ome pꞌoiradadee bɨ. Esa–aukꞌa yoorodee baji; esa–aukꞌa hierrodee baji. Mãga pɨkꞌa reyrã ma rey waibɨa jua ekꞌari pꞌanɨ kꞌĩsia awara–awaraa pꞌanapataadaitꞌee. Hierro chaaree baparikꞌa, mãga pɨkꞌa iru juataura baitꞌee. Mamĩda ma reyrã iru jua ekꞌari pꞌanapataarã pia araa pꞌanapataada–e paitꞌee. 42Ma bɨɨrɨ kꞌɨ̃ chakꞌeerã esa–aukꞌa hierrodee bada mãikꞌaapa esa–aukꞌa yoorodee bada jara kꞌinia bɨ reyrã ma rey waibɨa jua ekꞌari pꞌanɨ ũkꞌuru juataura pꞌanadaitꞌee, ũkꞌuru juatau wẽe pꞌanadaitꞌee. 43Ma awara pɨa hierro yooro ome araa pꞌoira bɨ unudakꞌa, mãga pɨkꞌa ãra miakꞌãidakꞌãri, araa pꞌoirakꞌoodaridaitꞌee. Mamĩda ãra pꞌoyaa araa pꞌanada–e paitꞌee, hierro yooro ome araa pꞌoiradakꞌaa perã. 44Ma reyrãpa eperãarã ãchi jua ekꞌari iru pꞌanɨde, ɨtꞌaripema Akꞌõre Waibɨapa eperãarã ichi jua ekꞌari bɨ wãitꞌee. Awaraa reyrãdepema apidaapa iru jua ekꞌari pꞌanapataarã pꞌoyaada–e paitꞌee, iru ichita mãɨrã rey paitꞌee perã. Jõdee iruata awaraa reyrã jõmaweda pꞌoyaaitꞌee mãikꞌaapa jõpiitꞌee. 45Rey Waibɨa, mɨa etꞌewa jarada, mãgata jara kꞌinia bɨ pɨa ma mãu unuda ichi itu eedeepa pɨradaida; mãgɨ́ mãupa ma hierro, bronce, yooro, pꞌaratꞌa, mãikꞌaapa nẽe, yooro pꞌorakꞌa papida. Jõmaarã Akꞌõre Waibɨapa ma ne–inaa ewari cherude pꞌasapiitꞌee bɨ pɨmaa unupiji. Pɨa kꞌãimokꞌaraadakꞌa wãara pꞌasaitꞌee. Mɨa wãarata jara bɨda aji.
46Mãga ũrikꞌãri, rey Nabucodonosor Daniel kꞌĩrapite bedabaidachi ichi tau bɨɨrɨ te jãde tꞌõbairumaa mãikꞌaapa jaraji netꞌaa pia mãikꞌaapa ne–inaa tꞌũa bapari irumaa teedamerã. 47Ma awara ichia Danielmaa mãgaji:
—¡Wãara pɨ Akꞌõre Waibɨa jõmaarã akꞌõre waibɨarã kꞌãyaara waibɨara bɨ! ¡Iru jõmaarã reyrã poro waibɨa! Irua ne–inaa eperãarãpa pꞌoyaa kꞌawadakꞌaa kꞌawapipari. Irua pɨmaa kꞌawaapiji mɨa kꞌãimokꞌaraada kꞌãata jara kꞌinia bɨ.
48Maapꞌeda reypa Daniel eperãarã poro waibɨa papiji ichi eujãde. Irumaa netꞌaa pi–ia chokꞌara teeji mãikꞌaapa iru bɨji Babilonia eujã jõmaweda akꞌɨpariimerã. Ma awara ma eujãdepema jõmaweda kꞌĩsia kꞌawaa beerã poro waibɨa bɨji.
49Mãga bɨde Danielpa iidiji reypa Sadrac, Mesac mãikꞌaapa Abednego Babilonia eujã akꞌɨpataarã bɨmerã. Mãpai reypa mãga ooji. Mamĩda Danielta rey ikꞌaawa mimiapachi.
Currently Selected:
Daniel 2: sjaB
Highlight
Share
Compare
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.
