MARKUS 3
3
Tong jah kelunan paket jebila' ojoo'
(Mat. 12:9-14, Luk. 6:6-11)
1Yésus lakau tai lamin sebayang kepéh la', pu'un jah kelunan sinah éh paket jebila' ojoo'. 2La'ah pu'un kuraa' kelunan sinah éh juk pesala' Yésus, kenat péh irah kepuh Yésus ke' réh omok jam hun néh pu'un peka'o kelunan sioo' Dau Posot nah. 3Ha' Yésus ngan kelunan paket ojoo' nah, Betéé' ke' jian ke' tuai nekedéng siteu', ha' Néh ngan néh. 4La'ah ha' Yésus ngan kelunan éh pinaa' sinah, Akeu' juk neteng ngan ka'ah, Ineu' omok neu' lu' tong Dau Posot? Kineu' ha' lem tebaraa' éh kenivu lu' iteu', pu'un éh nyohoo' lu' masi kelunan? Kineu' éh, kelu' ngesa'at kelunan kunah néh? Kineu sohoo' néh ngan lu', kelu' purip kelunan nah? Kineu lah lu' da', kelu' mematai kelunan nah? Kineu' ha' tebaraa' tong Dau Posot lu' iteu' néh kunah ka'ah, ha' Yésus neteng réh.
Bang bé' réh mipa éh. 5Ngejuwak Yésus na'at réh, merek Éh ngan réh bang Iah pika réh kepéh uban réh mahéng kenin bé' jam seruh. La'ah ka' ha' Néh ngan kelunan paket ojoo' nah kepéh, Jian ke' pejat ojoo' ko', ha' Néh. Tioo kelunan inah pejat ojoo' néh, tioo jian lah ojoo' néh. 6Musit lah kelunan Parisi tioo tai tavin kelunan éh kivu irah éh pemung ngan Herodis ke' réh pakat pitah jalan omok mematai Yésus.
Tong kelunan déhéé baa' banget
7Lakau Yésus ngan irah éh bakéh néh tai baa' Banget Galilia, pinaa' mu'un kelunan kivu réh tai. Jelua' réh pu'un jin tana' Galilia, jelua' jin tana' Yudea, 8jelua' kepéh jin leboo' Yérusalem ngan jelua' jin tana' Idumia. Pu'un éh kepéh jin dipa baa' Yordan, ngan jin tana' éh déhéé' Tirus ngan Sidon, pinaa' mu'un réh tai tavin Yésus uban réh menéng rengah tong kekat penganeu' Néh éh ja'au nah. 9Uban réh pinaa' mu'un kenat, Iah nyohoo' irah éh bakéh néh petenup jah alut ngan Néh, dai kelunan pinaa' nah nyikeu' éh. 10 Pu'un pinaa' tenéh kelunan peka'o néh jin kesakit réh, na' péh éh kenat irah éh sakit keto nah pu'un réh nyikeu' Éh ngan ngamit Éh ke' réh omok ma'o jin kesakit réh. 11Hun irah éh nasek sahéé' sa'at nah na'at Yésus, tioo ngejekuu' lep réh ngan ngeradau, bara', ka'au' néh Anak Allah, ha' ngeradau réh.
12Yésus meta' réh pané kenat, bé' iah buhaa' réh pekelenaa' Iah.
Tong Yésus ngevéléé' jah poloo' duah bakéh néh
(Mat. 9:9-13, Luk. 5:27-32)
13Yésus lakau tai jah tokong, jin sinah Iah tebai kelunan éh keneloo' néh, boh irah éh keneloo' Néh nah tavin Iah sinah. 14Hun réh avéé' lah inah Yésus ngevéléé' jah poloo' duah usah jin belah réh, dokoo' irah éh kevéléé' Néh nah ngelayau pu'un pemung ngan Néh, kenat péh ke' réh omok nebaraa' kelunan 15ngan ke' réh pu'un penyukat omok bet balei'.
16Iteu' ngaran kekat irah éh kevéléé' Néh, Simon, pu'un jah ngaran néh éh nateng Yésus, Péterus, 17Yakub rawah Yohanes éh anak Sabedeus. Yésus maneu' ngaran roh Boanerges, sin tong ngaran inah kelunan éh makang barei' ha' lengedo. 18Pu'un kelunan kepéh ngaran réh Anderias, ngan Pilipus, Bartolomeus, Matius, Tomas, ngan Yakub anak Alpeus, Tadius, Simon kelunan jin Kana'an. 19Yudas Iskariot, inah éh Yudas éh memalo Yésus rai.
Tong Yésus ngan tong balei' Beelsebul
(Mat. 12:22-32, Luk. 11:14-23, 12:10)
20La'o inah moléé' Yésus tai lamin, pelapah tuai kelunan pinaa' nah kepéh la', pah avéé' Yésus ngan bakéh néh bé' omok kuman. 21Hun irah panak Yésus jam éh kenat, tai réh juk alaa' Iah, uban pu'un kelunan éh bara', Yésus nah tuleu', ha' réh.
22 La'ah pu'un kuraa' guru éh nebaraa' tong Surat Musa tuai jin leboo' Yérusalem bara' Yésus nasek balei' Beelsebul, ngan Iah bet balei' palaa' kerenget sahéé' sa'at, ha' réh.
23Neu' ha' réh pané kenat, Yésus tebai irah tuai ke' Néh bara' kuraa' ha' tapan ngan réh. Ka' ha' Néh, Kineu' jalan Sitan omok bet Sitan. 24Hun pu'un kelunan tong jah tana', pata pekelawan belah nah ke', adang kekat irah leboo' inah matai béé. 25Kepéh Ne' pu'un kelunan murip lem jah lamin; boh irah pata pekelawan belah irah ke' sinah, adang kekat irah lem lamin inah matai béé. 26Kenat péh né' Sitan pekelawan belah nah ke', adang penyukat néh bé' omok lebéé' kekat éh lem kamit néh béé mu'un.
27Bé' pu'un jah kelunan omok masek lem lamin kelunan éh gahang, ke' néh omok nyayoh livah lem lamin néh, bang hun kelunan gahang nah pu'un kejeret, la'o inah boh kelunan omok masek tong lamin néh ngan nyayoh livah lem lamin néh.
28Jian keh seruh jian-jian, kekat arong kesa'at kelunan omok Tuhan mega' éh, kenat péh tong ha' ané réh éh sa'at, 29 bang tong kelunan éh pané ngesa'at Sahéé' Ni'ai, kesa'at inah bé' Tuhan omok mega' éh, uban penyala' inah pu'un éh pelinguh, ha' Néh. 30Yésus pu'un pané kenat ngan réh, uban irah ke' bara' Yésus nasek balei'.
Tong tinen ngan padéé' Yésus
(Mat. 12:46-50, Luk. 8:19-21)
31La'o inah tuai tinen ngan padéé' Yésus, pu'un réh mena Yésus tong usit, boh réh nyohoo' kelunan éh jah tai tebai Éh. 32Pinaa' kelunan menyun keto tutuh Yésus, ka' ha' réh ngan Néh, Tinen ko' ngan padéé' ko' pu'un mena ke' tong usit sinah rit, pu'un réh tebai ke', ha' réh.
33Ha' Yésus mipa réh, séé' tinen ngan padéé' Ké' éh kunah keh nah néh, ha' Néh. 34Iah ngelengit na'at kelunan pinaa' éh menyun tutuh Néh nah, boh Iah bara' ka', Na'at, iteu' néh tinen Ké' ngan padéé' Ké'. 35Kelunan séé' éh kivu sohoo' Allah, kelunan inah éh padéé' Ké', jian péh éh lakei', jian péh éh padéé' ké' redo, kenat péh éh tinen Ké', ha' Néh ngan réh.
Currently Selected:
MARKUS 3: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia