MARKUS 2
2
Tong Yésus peka'o kelunan éh matai keluhat
(Mat. 9:1-8, Luk. 5:17-26)
1Bé' makat lebéé' la'o inah, Yésus moléé' tai leboo' Kapernaum kepéh, ngan irah pinaa' menéng rengah Néh pu'un tong lamin sinah. 2La'ah pinaa' kelunan petipun sinah avéé' tong usit lamin pah avéé' tong patah péh bé' lah pu'un jalan réh kepéh. Pu'un Yésus bara' ha' tebaraa' Allah ngan réh. 3Lem Yésus to nebaraa' réh, inah savéé' pat kelunan metéé' kelunan éh Sakit matai keluhat. Ke' réh patet éh tavin Yésus. 4Bang uban kelunan matek pinaa' nah, bé' réh omok mihin éh masek lem lamin, boh réh meka sapau bau Yésus nekedéng bara' ha' Tuhan nah, boh réh petuhun éh palaa' mak nah tai kera'. 5Hun Yésus jam irah matek ngelan mu'un kenat, pu'un Iah pané ngan kelunan éh matai keluhat nah, ka' ha' Néh, Anak Ké', penyala' ko' lepah pega', ha' Néh.
6Irah guru éh nebaraa' tong Surat Musa pu'un réh sinah, ngan hun réh menéng ha' Yésus pané kenat, 7boh' réh seruh, Kineu' Iah makang kenin pesalut Allah. Bé' pu'un kelunan tong tana' omok mega' penyala' ne'. Allah awah éh boh éh omok maneu' éh kenat, kelem réh.
8Yésus tioo jam kekat éh kedalem réh kenat, boh Iah pané ngan réh, ka' ha' Néh, 9Kineu' éh pelapah lumang ké' pané seneruh keh, ha' ké' mah éh tekep Ké' bara', penyala' ko' lepah pega', ha' nah, kineu' éh ha' ké' éh bara', betéé' ke' lakau, ha' nah, éh mah éh lumang kunah ka'ah, ha' Néh. 10Bang Akeu' juk pekelenaa' éh ngan keh, Anak Kelunan iteu' néh éh pu'un penyukat omok bet penyala' nah ne', ha' Néh. Boh Éh pané ngan kelunan éh matai keluhat nah kepéh, 11Betéé' ke', alaa' mak ko' nah moléé' ke', ha' Néh.
12Jin lem ta'an kekat réh béé, kelunan éh matai keluhat nah, betéé' alaa' mak néh, tioo musit. Kekat kelunan pinaa' nah béé kenin réh na'at éh, pu'un réh mejing Allah, Jin sahau rai péh éh bé' lu' pu'un na'at éh kenat, ha' réh.
Tong Yésus ngevéléé' Lewi
(Mat. 9:9-13, Luk. 5:27-32)
13La'ah Yésus lakau kepéh tai baa' Banget Galilia, pinaa' kelunan tavin Éh sinah, boh Éh nebaraa' réh kepéh. 14Lakau Yésus kepéh jin sinah, inah Iah na'at jah kelunan éh alaa' sukai. Lakei' inah mokoo' tong lamin éh lamin jalan kelunan mena' sukai, ngaran néh Lewi anak Alpeus, Yésus tebai éh, ka' ha' Néh, Tuai ke' kivu Akeu', ha' Néh. Lewi tioo betéé' ke' néh kivu Yésus.
15Tai Yésus kuman tong lamin Lewi pemung ngan irah bakéh Néh. Pinaa' kelunan éh alaa' sukai pu'un pemung ngan Néh sinah, ngan kelunan éh jah éh keleko kelunan péh pu'un sinah, kivu Yésus nah, tai béé réh kuman pemung ngan Yésus tong lamin Lewi nah. 16La'ah kuraa'-kuraa' guru' éh nebaraa' tong Surat Musa éh kivu adet irah Parisi, na'at Yésus kuman pemung ngan kelunan penyala', ngan kelunan éh alaa' sukai. Boh réh pané ngan irah éh bakéh Yésus, ka' ha' réh. Bé' tekep Éh kuman pemung ngan kelunan penyala', ngan pemung ngan kelunan éh alaa' sukai, ha' réh.
17Pu'un Yésus menéng ha' réh pané kenat, boh Éh mipa ha' réh, ka' ha' Néh. Kelunan éh bé' pu'un kesakit bé' éh tai nawan, bang kelunan éh sakit éh tai nawan. Bé' Ku' tuai tong tana' iteu' Ké' tebai kelunan éh seruh iah éh kelunan éh jian, bang Akeu' tuai ke' Ké' tebai kelunan éh seruh iah éh kelunan sa'at, ha' Néh.
Tong kelunan kelaset kivu adet sebayang réh
(Mat. 9:14-17, Luk. 5:33-39)
18La'ah jah koléé' tovoo' irah éh kivu Yohanes Batis, ngan irah éh kivu adet Parisi, kelaset kivu adet sebayang réh, pu'un kelunan tai tavin Yésus ke' réh neteng Éh, ka' ha' réh. Kineu' éh ke' irah éh kivu Yohanes Batis, ngan kenat péh irah éh kivu irah Parisi, pinaa' koléé' réh kelaset kivu adet sebayang réh, bang irah éh bakéh ko', bé' réh kelaset barei' irah inah, ha' réh.
19Ha' Yésus mipa réh, Hun kelunan tai kuman tong kawin, kineu' réh, kelaset awah? Adang néh bé' kenat. Kelebéé' lakei' éh juk kawin nah pu'un ngan réh sinah, bé' réh kelaset awah. 20Pu'un jah retek hun kelunan éh juk kawin nah, lepah nalaa' réh da', boh réh pu'un kelaset, ha' Néh.
21Yésus maneu' jah tapan kepéh ngan réh, ka' ha' Néh, Bé' pu'un kelunan mejéé' kerayung éh maréng ke' néh pék éh tong kerayung éh mupuk. Hun néh pék éh tong éh mupuk nah, boh kerayung éh maréng nah péh pisei kepéh, jéé' kerayung éh maréng nah, bé' éh pekua' layan kerayung mupuk nah, ha' Néh. 22Jah ha' tapan éh neu' Yésus kepéh ka', Bé' kelunan modoo' baa' buaa' agun éh maréng lem telokoo' kulit ka'an éh lepah lebéé'. Hun néh modoo' éh kenat, baa' buaa' agun éh maréng nah ngeletaa' kulit ka'an éh lepah lebéé' nah, pelapah baa' buaa' agun nah pega', ngan telokoo' nah tasa'. Baa' buaa' agun éh maréng tekep modoo' éh lem telokoo' éh maréng, ha' Néh.
Tong peneteng réh tong Dau Posot
(Mat. 12:1-8, Luk. 6:1-5)
23 Tong jah Dau Posot Yésus lakau ngelapah térék, pu'un irah bakéh Néh kivu' Éh, boh irah bakéh Néh nyepit lo'ong parai jin pungun néh. 24Uban irah bakéh Néh alaa' lo'ong parai nah, inah irah Parisi pané ngan Yésus, ka' ha' réh, Na'at ke' bakéh ko' nah, uban ineu' réh maneu' éh kenat ngelapah ha' lem Surat Musa ngan ngelapah tong Dau Posot, ha' réh.
25Ka' ha' Yésus mipa réh, Kineu' bé' jak keh sakui purung ineu' neu' Daud ngan kelunan éh kivu éh hun réh la'au' sahau nah? 26 Daud rai péh pu'un éh tai lamin Allah ke' néh alaa' roti éh nena' réh ngan Allah ke' néh kuman éh, ngan iah mena' éh kepéh ngan irah éh kivu éh rai. Iah pu'un tai hun Abiatar pu'un Imam éh pengeja'au kekat imam, na' péh Surat Musa éh kenivu lu' bara', kelunan éh kereja' imam awah éh omok kuman éh, bé' kelunan éh jah omok kuman éh, Daud pu'un kuman éh pemung ngan irah bakéh néh, ha' Yésus ngan réh.
27La'ah ha' Yésus kepéh, Dau Posot ke' kelunan omok posot, bé' kelunan pu'un uban Dau Posot inah pu'un, ha' Néh. 28Ha' Yésus kepéh, Anak Kelunan éh pu'un penyukat bara' tong éh tekep neu' tong Dau Posot, ha' néh.
Currently Selected:
MARKUS 2: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia