IBRANI 12

Allah éh Tamen lu'

1La'ah uban pu'un kelunan pinaa' nah éh tutuh lu' éh omok nelana' bara' tong pengelan réh tong Allah, jian uleu' bet kekat éh nebii' lu' éh bahat ngan bet kekat penyala' éh maneu' lu' tekaleu' ngan saveng, dokoo' lu' omok petakéé' nekedeu' mu'un-mu'un mapun éh saa' tenah lu'. 2Bang jian lu' petem kepuh tong Yésus, éh majak lu' lem pengelan lu' jin bu'un avéé' ga'. Yésus bé' béé kenin, na' péh Iah pu'un matai tong kayeu' salib. Bang uban kemurung éh juk laa' Néh kepéh, bé' Iah seruh kemenyaa' éh teneng tong kelunan éh matai tong kayeu' salib, hun iteu' Iah menyun saa' na'au' nyun Allah.

3Jian keh pepata urip keh ngan urip Néh, pinaa' penusah Néh neu' kelunan éh sa'at éh leko Éh ngan maneu' Éh mu'un-mu'un, bang kebit kenin Néh lem kekat penusah Néh. Jian keh pepata urip keh ngan urip Néh kenat, dai keh béé kenin ngan bé' omok ngeretep lem kekat penusah keh kepéh. 4Uban tong jalan keh ngelawan penyala' dokoo' keh omok nyopéé' éh, bé' jak keh pu'un ngelawan éh pah avéé' keh penatai réh. 5#Ayb. 5:17, Ams. 3:11-12 Mai kelepan ha' Allah pané ngan keh éh anak Néh dokoo' Néh ngereken kenin keh. Ka' ha' Néh,

O anak ké', mai ke' bet ha' Tuhan hun Néh memerah ke'.

Mai ke' juk béé kenin hun Néh ngukum keh.

6Uban pu'un Tuhan petena' kekat kelunan éh penika Néh,

ngan ngukum kekat irah éh anak Néh, ha' Néh.

7Hun néh kenat jian keh ngeretep lem pengeketa keh, ngan kejeraa' pengeketa inah pu'un barei' perah éh penakai tamen ko' dokoo' nebaraa' ke', uban neu' pengeketa keh nah inah jalan Allah nebaraa' keh uban keh anak Néh. Mah pu'un anak éh bé' penerah tamen néh? 8Hun Tuhan bé' memerah keh barei' Iah memerah kekat anak Néh, barang bé' péh keh anak Néh mu'un bang anak ubuu' awah keh. 9Irah éh tamen lu' tong tana', pu'un réh memerah lu' ngan pu'un lu' sepah réh kepéh. Makin péh hun néh Tamen lu' tong seruga maneu' kenat, tekep lu' ngerera' kenin lu' dokoo' lu' omok murip. 10Pu'un Tamen lu' tong tana' petena' ngan memerah lu' kelebéé' lu' bé' jam seruh, dokoo' lu' jam kivu kekat éh jian kunah néh. Bang pu'un Tuhan memerah lu' dokoo' Néh nolong lu' ke' lu' omok ni'ai barei' Iah péh pu'un ni'ai. 11Kelebéé' Tuhan memerah lu', tusah kenin lu' bé' lu' murung, bang la'o inah kepéh hun lu' mihau ha' tebaraa' Néh, pu'un lu' murip kivu pengeloo' Tuhan ngan alaa' pengepawah Néh.

Tong kuraa' ha' tena'

12 # Yes. 35:3 Uban néh kenat jian keh metéé' ojoo' keh éh lepah tai lemoo' ngan ngegahang lep keh éh riyet. 13Lakau keh masek jalan éh lepah pemai neu' keh, dokoo' kelunan éh paket gem bé' teguu' ke' néh omok ma'o mu'un jin kesakit néh.

14Mekat keh pitah jalan dokoo' keh omok murip ngan pawah kenin belah kekat kelunan. Kenat péh jian keh mekat pitah dokoo' kekat barék keh pu'un ni'ai, uban bé' pu'un séé'-séé' péh éh omok na'at Tuhan hun néh bé' pu'un ni'ai. 15Mavaa' keh dai pu'un kelunan bet Allah éh na' penika Néh ngan lu'. Mai pu'un séé'-séé' péh éh barei' pulah éh petuh, éh maneu' pinaa' penusah ngan éh ngesa'at kelunan palaa' katah néh. 16#Kej. 25:29-34 Mavaa' keh dai pu'un séé'-séé' petuyang ngan bet Tuhan barei' Esau bet Tuhan sahau uban néh magat juk kuman ka'an awah. Iah éh anak tuken bang bé' éh pegunah kekat penyukat ngan pengejian éh tekep ngan irah éh anak tuken, bang nelih néh awah éh uban néh kuman ka'an éh kemagat néh. 17#Kej. 27:30-40 La'o inah Esau juk alaa' penyukat ngan pengejian inah jin tamen néh, bang bé' éh omok alaa' éh kepéh; Na' péh Iah mangaa' mu'un juk pitah jalan ke' néh juk ngepaléu' ineu' éh Lepah naneu' néh nah, bang bé' éh omok.

18 # Kel. 19:16-22, 20:18-21, Ula. 4:11-12, 5:22-27 La'ah ka'ah iteu', bé' keh pu'un tai tong jah tokong éh omok ta'an keh barei' irah Israel hun réh tai tong tokong Sinai. Tokong inah barei' mahang irah tavin merem, lihep ngan kepu kasi. 19Ha' serupit ngan ha' Allah pu'un pané. Hun kelunan Israel menéng ha' inah, irah ngan mu'un-mu'un bara' réh bé' keloo' menéng ha' inah kepéh. 20#Kel. 19:12-13 Irah bara' kenat uban réh bé' putung menéng ha' sohoo' éh bara' ka', Jian péh kelunan kenat péh ka'an éh avéé' tong tokong iteu', tekep éh benateu' avéé' matai, ha' nah. 21#Ula. 9:19 Kekat éh ta'an réh nah ngedai réh mu'un, avéé' Musa péh bara', Medai mu'un ku', riyet ku' medai, ha' néh.

22-23Bang ka'ah tuai tong tokong Sinai ngan tong leboo' Allah éh murip, inah éh Yerusalem éh tong seruga pemung ngan ibu-ibu meliket Néh. Ka'ah lepah tai tavin tipun kelunan éh murung kenin, inah éh tipun kekat irah éh tenah tai tong seruga, éh pu'un ngaran senurat tong seruga. Ka'ah lepah tavin Allah éh petuneng kekat kelunan ngan sahéé' kekat kelunan éh jian éh lepah pu'un sukup mu'un. 24#Kej. 4:10 Ka'ah lepah tuai tavin Yésus, Iah éh maneu' jajii' maréng inah, ngan tavin dahaa' éh penirih éh pejajii' tong kekat éh pelapah jian jin dahaa' Habel.

25 # Kel. 20:22 Uban néh kenat mai keh bé' menéng ha' Néh Pané inah. Irah éh bé' keloo' menéng ha' Iah éh tuai tong tana' éh pesavéé' Rengah éh jin Allah, bé' omok ngelepu usah néh tengéé'. Hun lu' bet Iah éh pané jin seruga, adang lu' bé' omok ngelepu usah lu'. 26#Hag. 2:6 Hun Tuhan pané ngan réh sahau, pu'un tegen tana' tovoo' Néh pané nah, bang hun iteu' kepéh pu'un ha' Jajii' Néh ka', Jah koléé' kepéh Akeu' juk negen tana', bang bé' éh tana' awah bang avéé' seruga péh, ha' Néh. 27Neu' ha' Néh éh bara' ka', Jah koléé' kepéh, ha' nah, nojoo' ketem lo'ong tana' ngan langit éh senuai Néh juk tenegen ngan juk nebet Néh, dokoo' ineu' éh bé' omok tenegen inah éh petem pelinguh.

28Uban kenat tekep uleu' bara' jian kenin uban uleu' pu'un lem nihau Néh éh pelinguh, tekep uleu' bara' jian kenin ngan seva' Allah ngan penoo' penyeva' ngan Medai tong Néh, kivu jalan éh ngepayoo' kenin Néh. 29#Ula. 4:24 Uban Allah Iah pu'un barei' luten éh omok kebéé ineu'-ineu' péh.

Currently Selected:

IBRANI 12: PNT

Highlight

Copy

Compare