2 YOHANES 1
1
1Ngan redo éh kevéléé' Allah ngan kekat anak ko' kepéh, surat iteu' jin akeu' éh majak sidang éh murung keh mu'un. Bé' éh akeu' awah éh murung keh bang kekat kelunan éh jam tong Allah. 2Uban Allah pu'un dalem kenin lu' Iah pu'un ngan lu' pelinguh-linguh.
3Jian Allah éh Tamen ngan Yésus Kristus Anak Néh, mena' pengejian, pengasi ngan pengepawah Néh ngan lu'. Pah avéé' uleu' pu'un alaa' kekat inah ngan kenin éh pejek, pemung ngan penika.
Pengeteneng ngan penika
4La'ah jian mu'un kenin ké' menéng rengah pu'un kuraa' anak ko' éh murip dalem kekat éh teneng, pekua' éh sohoo' Allah éh Tamen lu'. 5 Uban néh kenat akeu' menyat, dokoo' uleu' pekua' pepika. Bé' akeu' bara' jah ha' sohoo' éh maréng; sohoo' iteu' lepah nena' jin bu'un uleu' ngelan tong Kristus. 6La'ah iteu' néh penika inah éh uleu' tekep kivu kekat sohoo' Allah. Barei' éh lepah nenéng keh jin sahau inah éh ka'ah tekep pekua' pepika.
7Uban pinaa' kelunan éh ngelavo' lepah tai pah tipo tana'. Bé' irah keloo' bara' Yésus Kristus pu'un tuai tong tana' ngan paléu kelunan. Kelunan éh kenat ngelavo' awah ngan ayau Kristus. 8Uban néh kenat, mavaa' keh dai kekat ha' tebaraa' éh lepah benara' mé' ngan keh rai pu'un metat awah. Jian keh ngerakep dokoo' keh omok alaa' oléé' éh penoo' mu'un jin Allah.
9Séé'-séé' éh bé' petem dalem ha' tebaraa' Kristus, bang iah pepit ha' tebaraa' éh jah, ha' tebaraa' kelunan inah bé' éh jin Allah. Bang séé'-séé' éh petem dalem ha' tebaraa' Kristus kelunan inah éh pu'un petem lem Allah Tamen ngan Anak Néh. 10Uban néh kenat hun pu'un kelunan tuai mihin ha' tebaraa' éh bé' jin Kristus, mai keh alaa' éh tong lamin keh, ngan mai keh bara' tabi' ngan néh. 11Uban kelunan séé' éh bara' tabi' ngan néh, iah péh seleket bakéh néh dalem kekat penganeu' néh éh sa'at nah.
Tong pengega' ha'
12Pinaa' keto éh juk nané, ké' bang pulang jian éh bé' jin surat. Akeu' ngelan ku' omok angai nepah keh dokoo' pané ngan usah ko' tengéé', dokoo' kemurung lu' pu'un sukup mu'un.
13La'ah kekat anak padéé' ko' éh redo éh kevéléé' Allah bara' tabi' ngan ko'.
Currently Selected:
2 YOHANES 1: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia