1 TIMOTIUS 6

1La'ah jian kekat kelunan ripen ngerera' kivu sohoo' pengeja'au keh, dokoo' mai pu'un séé'-séé' éh omok pané ngesa'at ngaran Allah ngan ngesa'at ha' tebaraa' lu' iteu' kepéh. 2Kekat kelunan ripen éh pu'un lem nihau kelunan éh ngelan tong Tuhan, jian keh ngerera' tong réh, uban ka'ah péh pepadéé' lem Tuhan. Jian keh kereja' pelapah gahang kepéh ngan irah éh ngelan nah, uban irah éh alaa' oléé' jin kereja' keh inah, pu'un réh ngelan ngan pika Tuhan kepéh.

Tong tebaraa' éh sala' ngan tong éh mihin kelunan kaya' mu'un

3Jian ke' nebaraa' ngan petena' réh tong kekat ha' ké' iteu'. Séé'-séé' éh bara' ha' tebaraa' éh tengéé' jin inah, éh bé' pekua' ngan ha' tebaraa' Tuhan lu' Yésus Kristus, éh tengéé' jin kekat tebaraa' tong sebayang lu', 4Iah bau kenin ngan bé' jam ineu'-ineu'! Pengeloo' néh bé' barei' pohoo'. Iah keloo' pepatai ha' ngan pepaneu' tong ateng ha' ga' néh mihin pesonoh, petengéé' kenin, ngesa'at ngaran kelunan, pakai' kioo' éh sa'at, 5ngan pepaneu' éh bé' jam posot ngan kekat kelunan éh bé' jam seruh ngan bé' jam ineu' éh teneng. Irah seruh réh omok kaya' neu'.

6Hun lu' petem lem sebayang mu'un, uleu' omok kaya', bang pengekaya' nah, bé' éh jin tana' iteu', inah éh kaya' lem kejian éh jin Tuhan. Kenat péh hun lu' murip jam seruh ngan bé' juk alaa' mekum, bang sukup kenin tong éh pu'un ngan lu' awah. 7Hun lu' pelohoo' jin boré tinen lu', bé' lu' pu'un pakai ineu'-ineu' péh. Kenat péh hun lu' piso jin tana' iteu' kepéh, bé' lu' pu'un mihin ineu'-ineu' ngan lu'. 8Uban néh kenat hun lu' pu'un penguman ngan pakai sukup, jian lu' sukup kenin tong inah awah. 9Bang kelunan éh kelih juk kaya' pu'un éh teneng tong tenupat, pu'un éh barei' ka'an éh pejeu tong siang, uban pinaa' arong pengekelih néh éh suwok ngan petusah éh awah, éh pepetat éh ngan petawang éh mu'un. 10Uban neu' kelunan kelih tong rigit, inah éh nebu'un kuraa'-kuraa' arong kesa'at. Jelua' kelunan éh mekat pitah juk kaya', pu'un réh petat jin pengelan réh ngan mujah kenin neu' kuraa'-kuraa' arong penusah.

Tebaraa' ngan Timotius

11Bang ka'au' éh kivu pengeloo' Tuhan, jian ke' ngejuu' usah ko' jin kekat éh kenat. Jian ke' ngerakep dokoo' ngelayau maneu' pengeloo' Allah, murip sebayang, ngelayau ngelan tong Kristus, pika padéé lu' éh kua' pengelan, kebit kenin lem pengeketa, ngan dawai kenin. 12Jian ke' nengayet mu'un dokoo' murip tigéh lem urip Kristén ko', dokoo' ka'au' omok alaa' urip mu'un éh pelinguh, uban kenat péh jalan Allah tebai ke' hun ko' ngakun pengelan ko' tong Tuhan tong Jumen kelunan pinaa' rai. 13#Yoh. 18:37 La'ah tong jumen Allah éh purip kekat ineu'-ineu', ngan tong jumen Kristus Yésus éh ngakun pengelan néh tong jumen Pontius Pilatus, inah akeu' nyohoo' ke'. 14Jian ke' kivu kekat sohoo' Tuhan, mihau éh mu'un, mai kejeraa' ineu'-ineu' ngepaléu kenin ko' pah avéé' Dau savéé' Tuhan lu' Yésus Kristus. 15Adang Iah pu'un tuai hun avéé' tong jaka' éh kevéléé' Allah, Iah awah éh pengeja'au mu'un, Raja' éh bau kekat raja', Tuhan éh bau kekat pengeja'au. 16Iah awah éh murip pelinguh-linguh. Iah murip lem rema éh bé' omok tenavin kelunan séé' séé' péh. Bé' pu'un kelunan na'at Éh kenat péh bé' Éh omok ta'an kelunan. Tekep Iah ngelayau seneva' ngan Iah pu'un penyukat pelinguh-linguh'. Amin.

17Jian ke' bara' ngan kekat kelunan kaya' mai réh bau kenin, ngan mai réh ngelan tong pengekaya' réh uban bé' réh jam hun mah éh juk béé kepéh. Bang jian réh ngelan tong Allah éh mena' kekat ineu'-ineu' ngan lu' ngan mutaa' kepéh dokoo' néh ngejian kenin lu'. 18Jian ke' nyohoo' irah kaya' maneu' jian, ngan barei' kaya' lem kereja' réh éh jian. Jian irah petulat éh nalaa' réh ngan irah éh kari ngan jian kenin. 19Hun réh maneu' kenat, irah pu'un alaa' oléé' éh pelapah ja'au kepéh, inah éh alaa' urip éh pelinguh.

20Timotius, jian ke' mihau kekat ha' tebaraa' éh lepah benara' réh ngan ko' rai. Jian ke' petedau kekat ha' ané kelunan éh pané awah, ngan ha' kelunan éh pepané uban irah seruh réh pu'un pengejam, bang éh mu'un bé' réh pu'un pengejam. 21Uban pinaa' kelunan éh bara' réh pu'un pengejam tawang awah réh tong pengelan réh.

Jian Allah mena' pengejian ngan kekat ka'ah béé.

Currently Selected:

1 TIMOTIUS 6: PNT

Highlight

Copy

Compare