1 TIMOTIUS 5

Éh tekep naneu' ngan kelunan éh pekua' pengelan

1La'ah mai ke' pané nyahit ngan irah lakei' éh mukun. Bang jian ke' dawai pané ngan néh barei' ngan tamen ko' mu'un. Kenat péh hun ko' pané nebaraa' irah lakei' lemanai jian ke' pané ngan réh barei' ko' pané ngan padéé' ko' mu'un. 2Kenat péh tong redo éh mukun, jian ke' pané ngan néh barei' ko' pané ngan tinen ko' mu'un, ngan tong irah redo lemanai jian ke' pané ngan réh barei' ngan padéé' ko' mu'un dalem kekat éh ni'ai.

3Jian ke' pika irah redo baleu', éh bé' pu'un séé'-séé' nolong éh. 4Bang tong redo baleu' éh pu'un anak ngan ayam, jian irah anak ngan ayam néh pekalai nolong éh, ngan mena' oléé' ngan néh, uban kenat péh éh ngepayoo' kenin Allah. 5La'ah redo éh baleu' éh bé' pu'un séé'-séé' éh omok petubo éh bang pu'un éh ngelan Allah awah mihau éh, ngan pu'un éh sebayang siget dau ngan siget merem péh menyat pika jin Tuhan. 6Bang redo baleu' éh murip seminga' awah, na' péh éh murip keto seleket néh lepah matai tenéh. 7Tong irah redo éh kenat jian ke' nebaraa' réh dokoo' mai pu'un kelunan pesala' éh neu' barék réh pu'un sa'at. 8Hun séé'-séé' éh bé' jam petubo lua' néh, makin péh irah éh panak néh mu'un, kelunan inah seleket kelunan éh bé' ngelan tong Tuhan, iah pelapah sa'at jin kelunan éh pohoo' bé' ngelan.

9Redo baleu' éh bé' jak avéé' nem poloo' ta'un urip néh, éh omok keto kereja', mai éh ngelan penolong jin sidang awah. Tekep iah péh tutui kereja'. Bang tong redo baleu' éh bé' gahang la'ah ngan éh jian barék, éh bé' pu'un pemung sebarang ngan kuraa'-kuraa' lakei', boh sidang kepéh mena' penolong ngan néh. 10Inah kepéh hun néh redo éh pu'un ngaran éh jian uban néh pinaa' jalan nolong kelunan éh jah, éh pu'un mihau anak néh mu'un ngan éh ngelayau alaa' irah sakai tong lamin néh ngan mihau réh ngan jian kenin, éh pu'un masi ngan pika kelunan lem penusah réh, ngan éh mekat maneu' kuraa'-kuraa' arong kereja' éh jian péh, redo baleu' éh kenat jian keh nolong éh.

11Uban hun sidang nolong irah redo éh baleu' lem néh danak keto, hun avéé' jaka' irah juk pemung ngan lakei' kepéh inah maneu' irah ngelepan Kristus. 12Irah pu'un sala' uban réh bé' kivu jajii' réh ngan Kristus. 13La'ah ngan pepit-pepit leko kereja' ngan tai kasau-kasau tong lamin kelunan éh jah awah, bang bé' makat kenat awah, inah réh tosok kekat rengah éh bé' tekep ngan pekelakau ha' sa'at éh bé' tekep ngan réh, ngan kasau kenin ngan kereja' kelunan éh jah. 14Uban néh kenat inah éh pengeloo' ké', jian irah redo baleu' éh danak keto, kawin kepéh ngan pu'un anak kepéh ngan mihau lamin néh dokoo' irah éh bé' ngelan Tuhan péh bé' omok pesala' sidang. 15Uban jelua' irah redo baleu' lepah ngelepan Kristus ngan kivu Sitan. 16Bang hun pu'un redo éh ngelan tong Tuhan éh pu'un redo baleu' mokoo' tong lamin néh, jian redo inah petubo éh, dai éh pu'un tusah ngan bahat tong sidang, dokoo' sidang omok nolong irah éh baleu' mu'un, éh bé' pu'un séé'-séé' éh omok nolong réh kepéh.

17La'ah tong kelunan éh mihau sidang, éh maneu' kereja' mu'un bé' éh sala' lu' mena' pengena' mutaa' jin éh kemalai ngan réh. Makin péh ngan irah éh kereja' muruh mu'un nebaraa' ngan petena' kelunan. 18#Ula. 25:4, Mat. 10:10, Luk. 10:7 Uban pu'un jah ha' lem Surat Allah éh bara', Mai keh ngejeret ujun sapé' tovoo' néh meték. Ngan pu'un jah ha' kepéh éh bara', Kelunan éh kereja' adang néh tekep alaa' oléé' kereja' néh kepéh, kenat ha' lem Surat Tuhan. 19#Ula. 17:6, 19:15 Mai keh ulak ngelan ha' kelunan éh pesala' irah éh mihau sidang, hun néh bé' kejam keh mu'un. Jian keh petuneng éh mu'un avéé' duah-teleu' usah kelunan jam éh kenat mu'un. 20Hun pu'un mu'un sala' néh, jian ke' meta' éh tong jumen kelunan sidang, dokoo' kelunan éh jah péh medai maneu' kenat lah.

21La'ah tong jumen Allah ngan Kristus Yésus ngan kekat meliket néh éh ni'ai, akeu' nyohoo' ke' kivu kekat sohoo' ké' inah, ngan mai ke' ngevéléé'-véléé' ngan netah kenin tong kelunan. 22Mai ke' perasoh mapai ojoo' ko' tong kelunan ke' réh maneu' kereja' Tuhan. La'ah mai ke' ngebakéh kelunan éh maneu' penyala'. Mihau kenin ko' ke' néh ni'ai.

23Mai ke' mesep baa' awah, bang jian ke' mesep baa' buaa' agun si'ik awah, dai ke' sakit boré, uban ngelayau ke' sakit ngan lemoo' usah.

24La'ah penyala' jelua' kelunan pu'un éh poléng mu'un, ngan kekat kelunan jam éh. Bang penyala' jelua' kelunan temurei' éh poléng kepéh. 25Kenat péh tong penganeu' kelunan. Tong penganeu' réh éh jian, pu'un éh jelua' poléng hun iteu', ngan tong kekat éh bé' jak poléng mu'un, bé' éh omok pelim pelinguh.

Currently Selected:

1 TIMOTIUS 5: PNT

Highlight

Copy

Compare