Salmo 42
42
Din Iliw Di Ipogaw en Diyos
1Din iliw ko, Apo, ay en mandaydayaw sin Timplom
et kaman din bigaw di ogsa si man-ay-ayos ay danom.
2Palalo di iliw ko en sik-a, Diyos ay matmatago.
Pig-an pay di makaeyak ay mandayaw sin beey mo?
3Inagew ya linabi ay enak manlolowa,
adiak pay mangmangan tan dagaang ko et maga.
Kankanayon abe ay kankanan di kaibaw ko,
“Into ngin din kanam en Diyos mo?”
4Isonga palalo ay manladingitak mo manemnem ko
din nangipangpangoak sin ad-ado ay gait ko
ay en mandayaw en sik-a sin beey mo.
Naragsak kami ay nan-iyaman en sik-a, Apo,
ya nangikanta si dayaw mo.
5Apay pay laeng ay mariribok ya manladingitak?
Sik-a, Apo di pantalkak,
tan sik-a di omisalakan ya Diyos ko
et sik-a kasin di idaydayaw ko.
6Peteg di ladingit ko, isonga ninemnem kos sik-a
sin kawadak sin sakop di Jordan ay naiaddawi ay daga,
sin sag-en di dontog ay Hermon ya Mizar,
tan sina kayman di kad-ak ay lugar.
7Kaman napigsa ay dalloyon di inpaalim ay ladingit ko,
et kamanak malmalned si sakit di nemnem ko.
8Inagew ay inpapailam ed idi di komakaman ay layad mo,
ya sin labi, mapteng ay kankanta di inpanemnem mo
ay say inkarkararag ko
en sik-a ay Diyos ay poon di biyag ko.
9Diyos ay salaknib ko, enak kod damagen,
“Apay ngin ay nilinglingam sak-en?
Apay ngin ay magay saldeng di ligat ko
ay idawdawat di makedse ay kaibaw ko?”
10Kamanak natenaw si bain ko
begew sin kali da ay makainsolto.
Kankanan da, “Into ngin di Diyos mo?”
11Apay pay laeng ay mariribok ya manladingitak?
Sik-a, Apo di pantalkak,
tan sik-a di omisalakan ya Diyos ko,
et sik-a kasin di idaydayaw ko.
Currently Selected:
Salmo 42: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
