Salmo 23
23
Din Omay-ayowanan Diyos#23:1-6 1-6 Dowa di kaiarigan Diyos sin Salmo ay nay. Sin vv. 1-4, maiarig si mangay-ayowan si karnero. Sin vv. 5-6, maiarig si mangipalti si bisita na.
1Sik-a ay Diyos, omay-ayowan ka ay kaman mon karnero.#23:1 Din kanana sin Ilocano et: Ti APO ti pastorko. Din kali ay pastor et binolod da sin Espanyol. Di olog na sin Espanyol et mangay-ayowan si karnero. Ngem ed wani natken di pangawat di Ilocano ya Kankanaey sin olog di pastor tan say pangawag da sin pangolon di gimong. Isonga adi naosal din kali ay pastor sin versikulo ay nay, tan baken kosto di laydena ay ibaga.
Idawdawat mo amin ay masapol ko.
2Ipangom sak-en sin magabay ay panpaspastolan
ay say mayat si pan-illengan,
iturong mo abes sak-en sin posong ay pan-in-inoman.
3Mo madismayaak, papigsaem nemnem ko.
Itdom abe din pandanak ay kosto
ta say madaydayaw din ngadan mo.
4Olay mo wadaak sin danan ay kaeegyat ya kabolingetan,
laton ay maga di enak pan-egyatan
tan sik-a ay mismo di tomatakdo.
Din pat-om ya sokod mo di salaknib ko,#23:4 Din mangay-ayowan si karnero, osalena di pat-o ay manalaknib sin karnero na. Osalena abe di sokod ay mangitdo en daida si emeyan da.
et say pomigsaan di nemnem ko.
5Sinangailim sak-en ay kaman bisita ay nangato,
inpaltiam sak-en ay iniilan di kaibaw ko.
Din tasak et manleplepyas si bindisyon mo.
6Komakaman abe en sak-en din seg-ang ya layad mo
sin am-in ay agew di biyag ko.
Din beey mo ay Diyos et say makiteeak
si eng-enggana et say kad-ak.
Currently Selected:
Salmo 23: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
