Salmo 112
112
Din Bindisyon Di Nalinteg Ay Ipogaw
1Madaydayaw din Apo!
Nagasat din mangipateg ya emegyat en sisya
ya malaydan ay mantongpal sin bilbilina.
2Mabigbig to sin daga din poli na,
din polin di nalinteg yan mabindisyonan da.
3Bomaknang to din pamilya na,
yan komakaman din kinalinteg na si eng-enggana.
4Din managseg-ang ya nalinteg di ogali na,
olay mo sin mabolinget di kad-ana,
masilawan pay dedan sisya.#112:4 Di esa abe ay kaiologan nina sin Hebreo et: Silaw sin mabolinget di kaiarigana para sin iib-a na ay nalinteg abe di ogali na, tan managseg-ang ya nalinteg sisya.
5Nagasat din managpabolod sin gagait na
ya maga di sowitik na.
6Tan din nalinteg yan maga polos di kaisokbaana,
polos ay adi malinglingan sisya.
7Adi emegyat si lawa ay maipadamag en sisya,
tan mantalek en Diyos, napigsa di pammati na.
8Adi mandanag ono emegyat sisya,
awni et ilaena din kaabakan di kalabana.
9Kaidawadawat sin nabiteg, magay pap-eng din seg-ang na,
awni et manturay ya mabigbig sisya.
10Din lawa di ogali da yan manbonget da ay mangila,
palalo di liget ya dismaya da.
Awni et mamaga da
et adi polos matongpal din namnamaen da.
Currently Selected:
Salmo 112: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
