Salmo 111
111
Kanta Ay Pangidayaw En Diyos
1Madaydayaw si Diyos!
Naimposoan ay man-iyamanak en sisya
sin gimong di nalinteg ay ipogaw na.
2Nakaskasdaaw din amin ay inam-amag na,
ad-adalen din amin ay maragsakan gapo en dana.
3Maipaila din dayaw ya kinangato na
sin amin ay amagena,
magay pap-eng din kinalinteg na.
4Adi na bay-an ay maliw-an din nakaskasdaaw ay inamag na,
managseg-ang sisya.
5Idawat nay kanen din mangipateg ya emegyat en sisya,
adi na linglingan din intolag na.
6Inpaila na di panakabalina sin ipogaw na,
tan din dagan di odom ay nasyon yan indawat nan daida.
7Napodno ya nalinteg sisya sin amin ay amagena,
matalek amin ay bilina
8ya komakaman si eng-enggana.
Say inamag Diyos din nalinteg ya tet-ewa
sin nangipaammoana sin bilbilin ay nay da.
9Winayawayaana din ipogaw na
yan waday intolag na ay komakaman si eng-enggana.
Nasantoan ya manakabalin sisya.
10Say panlogian di somiriban
mo si Diyos yan patgen ya egyatan.
Indawtana si panakaawat din amin ay mantongpal en sisya,
madaydayaw sisya si eng-enggana.
Currently Selected:
Salmo 111: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
