Hibriyuhanen 1

Is Anak te Megbevayà Lavew te Velinsug̵uen Din

1Dengan duen impesavut te Megbevayà diyà te menge g̵in-epuan tew pinaag̵i te menge etew he ebpeneuven din. Mezakel is menge paag̵i te kebpeneuva kandan ne mezakel zaan is impesavut din pinaag̵i kandan. 2Iyan, guntaan, duen impesavut te Megbevayà kenitew pinaag̵i te Anak din. Ne heini is Anak din, pinaag̵i kandin ne nelimbag te Megbevayà is minsan hengkey; ne midhimu sikandin te Megbevayà he Nengazen te minsan hengkey. 3Pinaag̵i kayi te Anak din ibpezayag is mekeg̵eg̵ehem he anlag te Megbevayà su neked-iring dan. Ke hengkey is Megbevayà ne iyan ded daan sikan is Anak din. Ne pinaag̵i te g̵ehem te kegkag̵i kayi te Anak ebeyveyaan din is minsan hengkey he linimbag. Ne hein nepasad din en is ked-ewaa zin te menge salè tew, mid-ulì diyà te langit ne mibpinuu ziyà te egkekewanan te Megbevayà su edhadì.

4Impaahà kenita te Megbevayà he utew lavew is Anak din, kenà is menge velinsug̵uen din diyà te langit, ne iring din ded daan, lavew is inggerar zin te Anak din, kenà is inggerar zin kandan. 5Su zuen insurat he Lalag te Megbevayà diyà te Anak din he edhenduen te,

“Iyan ka Anak ku ne egkeg̵iyen ku kenikew

he g̵untaan ibpeehè ku

he Amey a kenikew.”

Iyan, wazà belinsug̵uen din he migkeg̵iyan din te iring dutun te minsan keenu he timpu. Ne zuen pa insurat he Lalag te Megbevayà he edhenduen te,

“Egkehimu he iyan a Amey zin

ne iyan sikandin Anak ku.”

Ne kenà iyan is belinsug̵uen egkeg̵iyen din dutun. 6Ne migkag̵i zaan is Megbevayà mehitenged te kakey he Anak din dutun te timpu te kedsug̵ua zin kandin dini te kelibutan, ke sikandin te,

“Kinahanglan he ed-ezapen sikandin te langun he menge velinsug̵uen te Megbevayà.”

7Ne iyan mulà migkag̵i te Megbevayà mehitenged te menge velinsug̵uen din is:

“Menge sug̵ù ku zà sikandan,

ne egkehimu ke edhimuwen ku

sikandan he iring te keramag,

ne emun kenà, ne iring te hapuy

ke iyan egkesuatan ku.”

8Ne iyan lalag din diyà te Anak din is:

“Iyan ka Megbevayà ne wazà pidtemanan te kedhadì nu.

Metazeng is kedumala nu te g̵inhedian nu.

9Iyan egkesuatan nu

is metazeng he ulaula ne igkeepes nu is mezaat he ulaula.

Tenged kayi, siak is Megbevayà nu,

midhimu ku sikew he lavew te menge zuma nu ne imbeg̵ey ku kenikew

is utew zekelà he kelipey.”

10Ne zuen pa insurat he Lalag te Megbevayà he edlelag̵an din is Anak din he edhenduen te,

“Sikew is Nengazen,

iyan ka nenlimbag te tanà,

ne kenikew he velad is mibaal te langit.

11Ne minsan pa te egkehanew keuzemà is langit wey tanà,

kenè ka mulà egkehanew.

Iring dan te manggad he egkezeetan.

12Iring te kedlumpia te kumbalà,

edlumpien nu is langit wey tanà ne ed-ilisan nu.

Iyan, sikew,

kenè ka mulà egkehalin;

is untung nu ne wazè din pidtemanan.”

13Wazà belinsug̵uen te Megbevayà he migkeg̵iyan din te,

“Dini ke zè pa pinuu te egkekewanan ku

taman te kenè ku pa ibpeluhud

diyà te kenikew is menge kuntada nu.”

14Iyan, is menge velinsug̵uen te Megbevayà, menge sulug̵uen dà sikandan te Megbevayà. Kenè tew egkeahà, iyan, edsug̵uen din sikandan wey kiw zan metevangi is menge etew he edtulusen keuzemà.

Currently Selected:

Hibriyuhanen 1: mbbNT

Highlight

Copy

Compare