Popular Bible Verses from Hibriyuhanen 1

Share

Pinaag̵i kayi te Anak din ibpezayag is mekeg̵eg̵ehem he anlag te Megbevayà su neked-iring dan. Ke hengkey is Megbevayà ne iyan ded daan sikan is Anak din. Ne pinaag̵i te g̵ehem te kegkag̵i kayi te Anak ebeyveyaan din is minsan hengkey he linimbag. Ne hein nepasad din en is ked-ewaa zin te menge salè tew, mid-ulì diyà te langit ne mibpinuu ziyà te egkekewanan te Megbevayà su edhadì.

Dengan duen impesavut te Megbevayà diyà te menge g̵in-epuan tew pinaag̵i te menge etew he ebpeneuven din. Mezakel is menge paag̵i te kebpeneuva kandan ne mezakel zaan is impesavut din pinaag̵i kandan. Iyan, guntaan, duen impesavut te Megbevayà kenitew pinaag̵i te Anak din. Ne heini is Anak din, pinaag̵i kandin ne nelimbag te Megbevayà is minsan hengkey; ne midhimu sikandin te Megbevayà he Nengazen te minsan hengkey.

Iyan, is menge velinsug̵uen te Megbevayà, menge sulug̵uen dà sikandan te Megbevayà. Kenè tew egkeahà, iyan, edsug̵uen din sikandan wey kiw zan metevangi is menge etew he edtulusen keuzemà.

Ne zuen pa insurat he Lalag te Megbevayà he edlelag̵an din is Anak din he edhenduen te, “Sikew is Nengazen, iyan ka nenlimbag te tanà, ne kenikew he velad is mibaal te langit. Ne minsan pa te egkehanew keuzemà is langit wey tanà, kenè ka mulà egkehanew. Iring dan te manggad he egkezeetan.