Hibriyuhanen Is Mehitenged te Surat he Para te Menge Hibriyuhanen
Is Mehitenged te Surat he Para te Menge Hibriyuhanen
Naawà is kezasig te menge tumutuu he mibpesuratan kayi he surat. Heini sikandan menge Hudiyu piru mid-engkezan dan en is neg̵imeratan dan he menge tuluuwen su iyan dan midtuuwan si Jesus. Iyan, egkereg̵enan sikandan su edsudien sikandan te zuma zan he menge Hudiyu su iyan kun mid-iniyug̵an dan is tinuuwan he iyan midtukud duen is Megbevayà.
Wazà metueni ke hentei is midsurat kayi, piru egketuusan ta he Hudiyu g̵ihapun he neketuu en ki Jesus. Mibpesuratan din sikandan su edlig-enan din is kedsarig dan ki Jesus su para kenè dan meiniyug̵i is kedtuu zan.
Diyà te nehuna he timpu, midsug̵ù te Megbevayà si Moises he penguluwi zin is menge Hudiyu, ne pinaag̵i ki Moises imbeg̵ey te Megbevayà diyà te kandan is menge sug̵ù din. Migkeg̵iyan daan sikandan te Megbevayà he mebpenilbi sikandan kandin pinaag̵i te kebpemuhat te menge ayam he edtutungen para te salè dan. Ne iyan heeyan ed-ul-ulahan te menge Hudiyu he wazè pa mekesarig ki Jesus. Piru is teg̵isurat kayi, nekag̵i zin he is langun dutun, menge alung dà te nengeulaule en diyà te ki Jesu Kristu. Ne maan is egketintal zan pa he edlikù edsarig te kenà ebpeketavang kandan, te lavew man si Jesus te langun dutun?
Umba emun ebpesipelahan sikandan tenged te kedtuu zan, kinahanglan he kenè dan iniyug̵i is kedtuu zan, kekenà, iringi zan is menge kepuun dan he si Abel, si Inuk, si Noe, wey si Abraham wey te zuma pa he nengekilala tenged te kedsarig dan te Megbevayà minsan pa te nekesag̵ad sikandan te menge kemereg̵enan.
Currently Selected:
Hibriyuhanen Is Mehitenged te Surat he Para te Menge Hibriyuhanen: mbbNT
Highlight
Copy
Compare
Share
Want to have your highlights saved across all your devices? Sign up or sign in
© 2001, Wycliffe Bible Translators, Inc., All rights reserved.