Gelasya 5

Is Kelibriyanan Pinaag̵i ki Jesu Kristu

1Pinaag̵i te kebelukasi kenitew ni Kristu, nelibri kiw en te kedtumana te kesug̵uan. Umba, kinahanglan he edsukul kiw is mibelukasan su wey kenè kiw en maan meuripen.

2Utew tutuu heini is egkeg̵iyen ku keniyu he ke iyan niw edserig̵an is kedsirkunsidara keniyu wey kew meluwas, ne kenè kew egketevangan ni Kristu. 3Ne kenà duen dà taman su tutuu iyan he ke zuen minsan hentei he kunaan din ke ebpulus kandin is kebpesirkunsidar, kinahanglan daan he ebpurungan din te edtuman is minsan hengkey he sug̵ù dutun te tivuuk he kesug̵uan. 4Is minsan hentei keniyu he kunaan din ke pinaag̵i te kedtumana te kesug̵uan is kebpeketezenga kandin te Megbevayà, nekesuwey en sikandin ki Kristu. Neewaan din en is gag̵ew te Megbevayà kandin. 5Iyan, sikami mulà, pinaag̵i te g̵ehem te Wag̵as he Mulin-ulin wey tenged te kedtuu zey kandin, iyan ebpeebuten dey is kedhimuwa kenami he metazeng te Megbevayà. 6Su emun tumutuu ki en ki Jesu Kristu, neked-iiring kiw en diyà te Megbevayà is nengesirkunsidar wey is wazà mesirkunsidar. Iyan dà duen din pulus diyà te Megbevayà is kedtuu ta kandin he egketuusan heini pinaag̵i te g̵ag̵ew ta te zuma ta.

7Mibpurungan niw zengan te ed-ikul is hustu he ibayà. Maan is idtug̵ut niw he zuen ed-eg̵en keniyu wey niw kenè en metuuwi is tutuu he tuluuwen? 8Kenà heini vaal te Megbevayà is kebpekesuwey niw su iyan mid-umbita keniyu wey kew meketuu. 9Haazà is tarù he tuluuwen he impenurù keniyu, ne iring te tapey emun ebaal ki te supas su minsan deisek dà is id-amut dutun te zekelà he midhames he erina, egketepayan gihapun is tivuuk he supas. 10Ne minsan pa zutun, dekelà is kedsarig ku te Nengazen he pinaag̵i te kedtavang din keniyu, ebpemineg̵en niw zed is hustu he impenurù ku keniyu. Iyan, haazà is etew he nekesamuk te isip niw pinaag̵i te penurù din he tarù, siguradu he edsilutan sikandin te Megbevayà.

11Menge suled, duen egkag̵i he wazè ku pa engkezi is penurù he kinahanglan he ebpesirkunsidar ki, iyan, emun tutuu heini, maan is kenà a ed-engkezan te ebpesipala te menge zuma ku he Hudiyu? Su emun ibpenurù ku he kinahanglan is kebpesirkunsidar, ne kenè dan egkepauk kediey minsan ke elin ku pa ibpenurù is kebpehimatey ni Jesus he elili kenitew. 12Ne sikan is menge etew he edsamuk keniyu pinaag̵i te tarù he penurù dan, egkesuatan ku pezem he kenà iyan dà is kebpesirkunsidar edtumanen dan, kekenà, elin daan ul-ulaha zan is kebpekapun!

13Na, menge suled, tutuu iyan he impetuu ki te Megbevayà wey ki zin melibri ne wazè en kinahanglan he ebpeuripen ki te kesug̵uan. Ne minsan pa zutun wazè ki melibri su wey iyan mebayàbayà kenita is mezaat he kebayà te lawa ta. Kinahanglan he tenged te zekelà is gag̵ew tew te menge zuma tew ne medtitinevangà is kada sevaha kenitew te menge tumutuu. 14Is tivuuk he kesug̵uan he imbilinbilin ni Moises, ne egkepurung egketuman pinaag̵i te sevaha zà he sug̵ù he iyan heini: “Kinahanglan he purungi nu is duma nu. Isipa nu sikandin he iring te kenikew en he g̵ehinawa.” 15Iyan, emun iyan niw zà ed-ul-ulahan is kebpepespesipelehey wey kebpeeg-eg̵età, ne egkepurung egkezeeti is upakat niw te menge tumutuu ki Kristu.

Is Mezaat he Suat te Lawa wey is Wag̵as he Mulin-ulin

16Iyan heini sug̵ù ku keniyu: pevayàbayè kew te Wag̵as he Mulin-ulin su emun ed-ul-ulahan niw heini, kenà egkehimu he egketuman niw is mezaat he kebayà te lawa niw. 17Kenà egkeuyun is mezaat he kebayà te lawa ta wey is egkesuatan te Wag̵as he Mulin-ulin su telekuntada heini is dezuwa, ne tenged dutun kenè ta layun egkeveelan is meupiya he egkesuatan ta. 18Iyan, ke ebpesakup ki te Wag̵as he Mulin-ulin, kenè ki egkesakup te kesug̵uan he imbilinbilin ni Moises. 19Egketuusan ta is menge mezaat he ulaula he egkehimu pinaag̵i te mezaat he kebayà te lawa su iyan is kedhilavet te kenè ta esawa, is meremerik wey mahawag he vaal, 20is ked-ezapa te kenà hustu he ed-ezapen, wey is kegemita te g̵ehem he ibeg̵ey ni Setanas. Ebpekigkuntada is menge etew; ebpekidtebek dan; egkesina zan; egkengepauk dan; iyan dà ed-isipen dan is kandan dà he egkesuatan. Ne ed-engkezan dan is kebpekidsevaha zan te menge zuma zan. 21Egkeimahan dan is menge azen te menge zuma zan. Egkengelangut dan, ne kenè dan ed-eg̵enen is menge kebayè dan he mezaat, kekenà, edtumanen dan, wey mezakel pa is ed-ul-ulahan dan he iring kayi. Ed-umanan ku te egkag̵i is migkag̵i ku he zaan he is etew he ed-ul-ulahan din is menge iring kayi, kenà sikandin ebpekeragkes te egkehedian te Megbevayà keuzemà.

22Egketuusan ta zaan is menge ulaula he egkehimu pinaag̵i te g̵ehem te Wag̵as he Mulin-ulin. Su emun ed-uwiten ki te Wag̵as he Mulin-ulin, mahal zini te g̵ehinawa ta is menge zuma ta, layun ki egkelipey, melinawen layun is gehinawa ta, mepelevayen ki, belig̵eg̵awen ki, metulanged ki, metinumanen ki, 23kenè ki mevurut, wey egkeeg̵en ta is kebayà te lawa ta. Ne emun iyan heini menge ulaula ta, kenè ta egkesupak is menge sug̵ù kenita te Megbevayà. 24Ne is minsan hentei he migaked en ni Jesu Kristu, ne iring te inransang din en te krus is mekesesalà he lawa zin, he ke và dà egkeg̵iya, mid-engkezan din en is menge mezaat he kebayè din wey egkesuatan din. 25Ne is Wag̵as he Mulin-ulin, geina te mibeg̵ayan ki zin te veg̵u en he untung, kinahanglan he ebpevayàbayè ki zaan kandin. 26Kinahanglan he kenè ki ebpelavew, kenè ki zaan ebpekidtebek te menge zuma he etew, kenè ki zaan egkesina te zuma ta.

Currently Selected:

Gelasya 5: mbbNT

Highlight

Copy

Compare