Ipisu 5

Is Kerayag wey Kerusireman

1Ne g̵eina te pinelanggè kew he menge anak te Megbevayà, kinahanglan he mekeiring kew kandin. 2Kinahanglan he ipeehè niw layun he mahal ziyà te g̵ehinawa niw is menge zuma niw iring te mahal kiw ziyà te g̵ehinawa ni Kristu. Mibpehimatey sikandin he elili kenitew wey kiw zin melibri. Nehimu heini he pemuhat he utew mehemut, he ke và dà egkeg̵iya, utew egkesuati te Megbevayà.

3Ne g̵eina te menge sakup kew te Megbevayà kinahanglan he kenè niw ul-ulaha is keleleg̵ed wey is minsan hengkey he ulaula he meremerik. Kenè niw hileveti is kenè niw esawa. Minsan is ked-isipa wey kegkeg̵iya kayi ne kenè niw ul-ulaha. 4Kenè niw g̵emita is menge meremerik, mahawag, wey wazè din pulus he menge lalag, kekenà, layun dekelà is kebpeselemati niw te Megbevayà. 5Su ibpesavut ku keniyu is utew tutuu. Is etew he meremerik is ulaula zin wey ke edhilavet te kenè din esawa, ne kenà sikandin egkehedian ni Kristu wey te Megbevayà. Ne iring din ded daan is leg̵ezen he etew su is menge vutang he igkeleg̵ezi zin, egkehimu he menge megbevayè din.

6Su tenged kayi he menge ulaula, utew egkepeuki te Megbevayà keuzemà is menge etew he kenà ebpemineg te menge sug̵ù din. Ne tenged dutun, kenè niw itug̵ut he meketuu kew te tarù he penurù te minsan hentei he etew pinaag̵i te menge ketezengan dan he kenà tutuu. 7Kenè kew mebpekid-upakat te minsan hentei he iring kayi. 8Su zengan utew merusirem is ibayè niw, iyan, guntaan neteyawan is ibayè niw su nehimu kew en he menge sakup te Nengazen. Ne tenged kayi, kinahanglan he zait is ulaula niw te ked-ikula niw te merayag he ibayà. 9Su emun neteyawan te Megbevayà is isip niw, egkeulaula niw is langun he hustu wey metazeng he vaal he ibpenurù te tutuu he tuluuwen. 10Purungi niw istudyuwi ke hengkey is menge ulaula he egkesuatan te Nengazen. 11Is menge etew he kemulu pa ziyà te kerusireman, kenè kew medtampu kandan te ed-ulaula te menge vaal he wazè din pulus, kekenà, ipeehè niw he mezaat is menge vaal zan. 12Su is menge vaal he id-eles dan, utew mekeeled-eled minsan is kebenteeni zà kayi. 13Ne pinaag̵i te kerayag, he ke và dà egkeg̵iya, is tutuu he tuluuwen, egketuenan dan ke hengkey is ed-isipen te Megbevayà dutun te menge ulaula zan, ne zutun egkehimu he egketeyawan daan is isip dan. 14Ne mehitenged kayi zuen erubasa he edhenduen te,

“Sikew is edlipezeng, gimerat kad;

sikew is minatey, ne mevanhew kad

ne egketeyawan ka ni Jesu Kristu.”

15Umba, menge suled, pekeventayi niw is menge ulaula niw su wey kew mehimu he menge metau, ne kenà menge paglung. 16Te minsan keenu, ke zuen meupiya he egkeveelan niw, beeli niw en su g̵untaan he timpu mezelag is ebaal te meupiya. 17Kenè niw ul-ulaha is wazè din pulus he ulaula, kekenà, purungi niw sevuta ke hengkey is ebpeveelan keniyu te Megbevayà.

18Kenè kew mebpelelangut te vinu su ebpekezezaat heini keniyu, kekenà, kinahanglan he egkepurung kew egkeulini te Wag̵as he Mulin-ulin. 19Emun ebpelelelag̵è kew, gemita niw is menge lalag diyà te menge Salmo wey menge kentahan he idalig te Megbevayà, wey menge kentahan he ibpinted keniyu te Wag̵as he Mulin-ulin. Kentahi niw is Megbevayà ne pinaag̵i kayi te menge kentahan wey te menge Salmo, medlipey kew is edalig te Megbevayà. 20Peselemati niw layun te Amey tew he Megbevayà is langun he tuvad din keniyu tenged te kedsundan niw te Nengazen tew he si Jesu Kristu.

21Mebpetetehuzè kew te kada sevaha tenged te kedtahud niw ki Kristu.

Is Sambag Diyà te Teleesawa

22Sikiyu is menge vahi, pesakup kew te menge esawa niw iring te nesakup kew en te Nengazen. 23Su is maama, duen din keg̵ehem te kebayàbayà te esawa zin, iring te si Kristu, duen keg̵ehem din te kebayàbayà kenitew te langun he menge tumutuu he iyan lawa zin. Midlibri kiw zin te silut is lawa zin. 24Ne iring din ded daan kinahanglan he mebpesakup mebpurung is bahi te esawa zin iring te ebpesakup kiw ki Kristu is menge tumutuu zin.

25Sikiyu is menge maama, kinahanglan he mahala niw ziyà te g̵ehinawa niw is esawa niw iring te mahal kiw is menge tumutuu ziyà te g̵ehinawa ni Kristu. Egketuenan tew heini su mibpehimatey sikandin he elili kenitew wey kiw zin melibri te silut, 26ne wey kiw mezawat te Megbevayà. Midhimu zin heini pinaag̵i te kedlumpiyuwi zin kenitew pinaag̵i te kebewtismu wey pinaag̵i te lalag din. 27Elin daan idhimuwa zin kayi su wey kiw zin mezawat he esawa zin. Ne wazè en igkesawey zin kayi te kenitew su nepurung kiw en melumpiyuwi ne utew kiw mekempet diyà te kandin. 28Ne iring din ded daan is maama, ne kinahanglan he mahala zin diyà te g̵ehinawa zin is esawa zin iring te kebmahala zin te keugelingen din he lawa. Su is kebmahala zin te esawa zin ne iyan ded daan kebmahala zin te keugelingen din he lawa, su is teleesawa, sevaha zà sikandan he lawa. 29Wazà etew he kenè din ebmahalen is keugelingen din he lawa, kekenà, ibpekaan din ne ebpurungan din iring te kebpurungi ni Kristu te keugelingen din he lawa. 30Ne iyan kiw is menge tumutuu, lawa ni Kristu. 31Tenged kayi, duen insurat he Lalag te Megbevayà he edhenduen te, “Ed-ewaan te maama is iney zin wey amey zin ne ebpengesawa, ne sikandan is dezuwa, is maama wey haazà is bahi, ne egkesevaha zà.” 32Duen impezayag te Megbevayà kenitew kayi he utew tutuu, ne sumalà is kedsevuta ku kayi ne iyan ibpesavut din si Kristu wey sikitew is menge tumutuu. 33Iyan, kenà duen dà taman su egkehimu zaan he elin egkeg̵iyen din is teleesawa. Kinahanglan he mahala te maama is esawa zin ne kinahanglan daan he tehuza te vahi is kandin he esawa.

Currently Selected:

Ipisu 5: mbbNT

Highlight

Copy

Compare