Yh 16
16
Akristu azeasawushiwe
1“Nakuwuzyilantoni vonse ivi kuti mungazotaya cicetekelo mwa newo. 2Azeakutendeni ku mpingo. Koma soti nsita yukuza yakuti aliyense watiazekupayeni, azeayese kuti otumikila Mulungu. 3Azeacite ivi cikomo oziŵalini Atata keno newo. 4Koma nalaŵila kuti muvimvwe ivi kuti nsita ikazowela, muzemulukane kuti nikuwuzyilantoni.”
Nchito ya Mzimu Mtuŵa
“Niliyomuwuzyeni ivi potatika pala yayi, cikomo nenze namwe pamo. 5Koma lomba nukuya kwa enituma, nipo paliye na yumo kumo mwa mwewo wonikonsha kuti, ‘Mukuya kuni?’ 6Mu mitima mwanu mwazula citinthi cikomo nakuwuzyani ivi. 7Koma mphela nukuwuzyani, kuti ni ciweme kopula kwa mwewo kuti nifumepo. Pakuti keno nufumapolini, Nkhoswe yala iwelelini kwanu. Koma keno nukuya, nikayitumizye kwanu. 8Nipo yeve akayofwika, azeaŵasimikizye ŵanthu ŵa pano pansi kuti ni woyifya pa vokucimwa, pa volungama, nipo soti pa vopingula. 9Ni woyifya pa vocimwa, cikomo ocetekelalini mwa newo. 10Ni woyifya pa volungama, cikomo nukuya kwa Atata nipo muzeniziŵelini soti. 11Ni woyifya pa vopingula, cikomo Satana, mfumu ya ŵanthu wocimwa ŵa calo cino ca pansi, wapinguliwa kale.
12“Nili nawo malizu ayakine anyinji ŵakuti nikuwuzyeni, koma mungatweshelini kuŵamvwisha lombapano apa yayi. 13Koma akayowela Mzimu woziŵisha vyendi wala, azeakusambizyeni vyendi vonse. Pakuti azealaŵilelini vofumila mwa yeve yeka yayi, koma vilivonse vatiazeamuwuzye Atata, niye vatiazealaŵile. Nipo azeakuziŵisheni vinthu va ku nthangu. 14Azeanicinzike, pakuti azeatole vofumila kwa newo nakuzokuziŵishani. 15Vonse va Atata ni vangu. Ni cikomo cake nalaŵila kuti azeatole vofumila kwa newo, nakuzokuziŵishani mwewo.”
Citinthi cizeciyaluke cisangalalo
16“Pa kansita katontho muzeniwonelini soti, koma pakayopita soti kansita katontho muzeniwone.”
17Asambili ŵake ayakine etatika kukonshana kuti, “Kansi ni vinji vakutiwuzya? Olaŵila kuti, ‘Pa kansita katontho muzeniwonelini soti, koma pakayopita soti kansita katontho muzeniwone.’ Olaŵila soti kuti, ‘Cikomo nukuya kwa Atata.’ 18Kansi ni vinji vakutiwuzya kuti, ‘Kansita katontho?’ Tumvweshalini vakupangwa kulaŵila.”
19Yesu eziŵa kuti asambili ŵala enzopangwa kumukonsha. Tetyo, elaŵila kuti, “Kansi mukonshana va malizu ŵanalaŵila aŵa kuti, ‘Pa kansita katontho muzeniwonelini soti, koma pakayopita soti kansita katontho muzeniwone’? 20Nulaŵilisha cendi kuti mwewo muzelile, koma ŵanthu omekela va pano pansi azeatemwe. Mwewo muzamvwe citinthi, koma citinthi canu cizeciyaluke cisangalalo. 21Pa nsita yowona mwana, anyina ovutika cikomo nsita yawo yakwana. Koma mwana akavyalika, olingililakolini soti va kunzunzika kwala, cikomo ca cisangalalo cakuti kunja kuno kwavyalika mwana. 22Tetyo, mwewo soti muvutika lomba, koma nizenikuwoneni soti. Pamene apo mitima yanu izeitemwe, nipo paliye munthu watiazeakupokeni cisangalalo canu cala. 23Pa nsiku iyo muzemunikonshelini kanthu. Nulaŵilisha cendi kuti ciliconse catimuzemusenge kwa Atata mu zina yangu, azeakupeni. 24Mpaka lomba mukaliyosengako kanthu mu zina yangu. Sengani nipo muzemupokele, kuti cisangalalo canu ciŵe cozula.”
Yesu ecimfya calo ca pansi
25Nakuwuzyani ivi mu linganizyo. Nsita ikuza patinizenilaŵilelini namwe mu linganizyo, koma nizenikuziŵisheni momvwika va Atata. 26Nsiku iyo muzemusenge mu zina yangu, nipo nulaŵilalini kuti newo nizenikusengeleni kwa Atata yayi, 27pakuti okutemwani ni Atata ŵamene. Okutemwani cikomo munitemwa, nipo municetekela kuti nifumila kwa ŵeve. 28Nifuma cendi kwa Atata kuwela pano pansi. Lomba nufumapo soti pano pansi kuya kwa Atata.
29Asambili ŵake elaŵila kuti, “Apo ni mwamene. Lomba mulaŵila momvwika, osati soti mu nzenguluka yayi. 30Lomba taziŵa kuti muziŵa vonse, nipo mupangwalini soti munthu kukunsheni makonsho. Ni cikomo cake tucetekela kuti mwewo mufumila kwa Mulungu.”
31Yesu eŵayasuka kuti, “Kansi mwacetekelelatu lomba? 32Nsita yukuza, nipo yafwika kale, patimuzemwazyikane aliyense kuya kwawo, newo muzenisiye neka. Koma nililini neka, pakuti Atata ali na newo. 33Nakuwuzyani ivi kuti muŵe nawo mtendele pocetekela mwa newo. Mu calo ca pansi muzemuwone matamano, koma tangʼani – newo necimfya vimphamvu viyipa va pa calo ca pansi.”
Currently Selected:
Yh 16: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.