Yh 15
15
Yesu niye mphesa ngayo–ngayo
1“Newo nine mphesa ngayo–ngayo, nipo Atata ni mulimi. 2Yeve otenda misambo iliyonse mwa newo yutwalalini vitwalo. Nipo msambo uliwonse utwala vitwalo, owutenulila kuti utwale vitwalo vinyinji kupula kale. 3Mwewo mwetuŵa kale cikomo ca malizu ŵanakuwuzyani. 4Ŵani mwa newo, nipo nane nizaŵe mwa mwewo. Ngani msambo ungatweshelini kutwala vitwalo pa weka keno ulilini pamo na cimuti cake. Namwe soti keno mukuŵalini mwa newo.
5“Newo nine mphesa, mwewo nimwe misambo. Aliyense akuŵa mwa newo, nane soti mwa yeve, niye otwala vitwalo vinyinji. Pala paliye newo mungatweshelini kucita kanthu. 6Keno munthu akuŵalini mwa newo, omutaya kunja ngani msambo wotendewa, nipo uyuma. Misambo yoteti oyitola, noyipoza pa mulilo nipo yukupya. 7Keno mukuŵa mwa newo, nipo malizu ŵangu onkhala mwa mwewo, musenge ciliconse camungapangwe, nipo muzemupokele cendi. 8Atata ocinzikiwa pamutwala vitwalo vinyinji, nipo potetyo muwonesha kuti nimwe asambili ŵangu ngawo–ngawo.
9“Ngani mwakunitemwela Atata, nane soti nukutemwani. Muwokuŵa mu cinthemwa cangu ici. 10Keno mukonkha Matetulo ŵangu, muzemuŵe mu cinthemwa cangu, ngani mwanukonkhela Matetulo ŵa Atata, nipo nunkhala mu cinthemwa cawo. 11Ivi vanalaŵila namwe, kuti cisangalalo ciŵe mwa mwewo, na kuti cisangalalo canu ciŵe cozula.
12“Tetulo yangu ni yakuti muwotemwana, ngani mwanukutemwelani. 13Paliye munthu ali na cinthemwa copula ici, cakuti angataye moyo wake kuti apulumushe ayake. 14Mwewo nimwe ayangu keno mucita vanakulamulilani. 15Nukuyitanilini soti anyanchito yayi. Nyanchito oziŵalini vakucita asikulu ŵake. Koma nukuyitani ayangu, cikomo vonse venicimvwa kwa Atata ŵangu, nikuziŵishani. 16Ni mwewolini mwinisalula yayi, koma ni newo nikusalulani mwewo. Nipo nikusalulani kuti muzetwale vitwalo–vitwalo vake vonkhalisha. Motetyo, ciliconse camungasenge Atata mu zina yangu, azeakupeni. 17Tetulo yangu ni iyi, ‘Temwanani.’”
Ŵanthu omekela va pano pansi azeatinkhane na Akristu
18“Calo cukutinkhani, kumbukani kuti citinkha newo potatika. 19Kuti mwenze na unkhalo wawo, sembe ekutemwani cikomo mwinkhala ayawo. Koma okutinkhani cikomo newo nikusalulani pakati pa ŵeve, motetyo, nimwe ayawolini. 20Kumbukani malizu ŵenekuwuzyani kuti, ‘Nyanchito opulalini asikulu ŵake.’ Keno newo enisawusha, namwe soti azeakusawusheni. Koma wosunga malizu ŵangu, azeasunge malizu ŵanu soti. 21Azeakucitileni vonse ivi cikomo ca newo, pakuti omuziŵalini enituma. 22Kuti niliyowele nolaŵila nawo, sembe aliye mlandu. Lomba aliye catiakanile mlandu wawo. 23Munthu wotinkhana na newo, otinkhana na Atata soti. 24Kuti niliyocite pakati pawo muyakine aliyense valiyovicite, sembe eciŵa na mlandu. Koma lomba aviwona cendi, koma akalutinkha newo nipo soti na Atata. 25#Ms 35:19; 69:4 Koma voteti kuti vikwanilishiwe vilembewa mu Matetulo ŵawo kuti, ‘Etinkhana nane paliye cikomo.’
26“Koma pali Nkhoswe yatinizekutumizyileni kufuma kwa Atata. Nkhoswe iyo ni Mzimu wa vyendi ofumila kwa Atata. Yeve akazowela, azeaninkhalile umboni. 27Namwe soti muzemunicitile umboni, pakuti mwaŵa nane kutatikila potatika.”
Currently Selected:
Yh 15: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.