HIVA ‘O E HIVA 8
8
1TAUMAIĀ ‘oku ke hangē ha tuonga‘ane kiate au,
Ha taha na‘e huhu he huhu ‘o ‘eku fa‘ē!
Ka ne pehē, ka u ka ma‘u koe ‘i tu‘a, te u ‘uma atu.
‘O ‘ikai foki te nau manuki‘i au.
2Te u taki koe, ‘o ‘omi ki he fale ‘o ‘eku fa‘ē,
Te ke ako‘i au.
Te u fakainu koe mei he uaine fakahu‘amoa,
Mei he huhu‘a ‘o ‘eku pomikānite.
3Ko hono nima to‘ohema ē ‘oku ‘i hoku lalo ‘ulu,
Pea ko hono to‘omata‘u ‘oku ne fā‘ofua au.
4Tauange mo kimoutolu, kau ta‘ahine Selusalema,
Koe‘uma‘ā ke ue‘i, pe fafangu ‘a ‘ofa,
Kae fai ‘ene fa‘iteliha.
Ko e Hiva Hono Ono
Ko e Ta‘ahiné
5Ko hai ‘a e fefine ni ‘oku hake mei he toafa?
‘Oku ha‘u faaki ki hono ‘ofa‘anga?
Ko e Ta‘ahiné
Ko e lolo ‘āpele ko ē na‘a ku ue‘i ai ho‘o manako:
Ko e potu ko ē na‘e langā ai ho‘o fa‘ē ‘iate koe;
Ko e potu ko ē na‘a ne langā, ‘o fā‘ele‘i koe.
6‘Ai au hangē ha sila ‘i ho fatafata,
Hangē ko e sila ‘i ho nima:
He ko e ‘ofa ‘oku kaukaua hangē ko e mate;
Ta‘emaongo ‘a fua‘a ‘o hangē ko Hētesi:
Ko ‘ene ngaahi tapa ko e tapa ‘a e afi,
Ko e mātu‘aki ulo meia IAA.
7‘E ‘ikai lava ‘ani vai lahi
Ke fu‘ifu‘i ‘a ‘ofa;
Pea ‘e ‘ikai lōmekina ia
‘Eni vaitafe.
Ka ne fie ‘atu ‘e ha tangata
‘a e koloa kotoa ‘o hono fale
Ke fakatau ‘aki ‘a e ‘ofa,
Ko e manuki pē ‘e fai.
Ko e Fanga Tuonga‘ane ‘o e ta‘ahiné
8“‘Oku ai hotau tuofefine;
Ko e si‘i, pea te‘eki hunuki mai hono huhu;
Ko e hā ‘atautolu ‘e fai ki si‘otau tuofefine,
Ka a‘u ‘a e taimi ke tohia ia?
9Kapau te ne ‘ā maka,
Te tau langa ‘i hono funga ha ‘otu taua siliva:
Kapau te ne matapā,
Te tau tāpuni ‘aki ha laupapa sita.”
Ko e Ta‘ahiné
10Ne u ‘āmaka au,
Pea ko hoku ongo huhu na‘e hangē ha ongo taua;
Pea u toki hoko ‘i he vakai ‘a si‘eku tangata,
Ko e taha kuo a‘usia ‘a e alea melino.
Ko e Tamá
11Na‘e ma‘u ‘e Solomone ha ngoue vaine ‘i Peali-hāmoni:
Na‘a ne tuku ‘a e ngoue vaine ki ha kau tauhi;
Kae ‘omi takitaha koe‘uhi ko hono fua
Ha pa‘anga siliva ‘e taha afe.
12Ko e ngoue vaine ‘a‘aku
‘Oku ou fa‘iteliha ai;
‘Oku ‘a‘au, Solomone, ‘a e afe,
Kae uangeau ki he kau tauhi ‘o e fua.
13‘E na‘i lata he ngouetapu,
Ko si‘i kaungā kau ē
‘Oku fie ongo‘i ho le‘o:
Tuku ke u ongo‘i foki ‘e au.
Ko e Ta‘ahiné
14“Hola, si‘oku ‘ofa‘anga,
Pea hopo fakakaseli,
Pea hangē ha tama ‘a ha hainiti
Ki he ngaahi mo‘unga ve‘eve‘e.”
Currently Selected:
HIVA ‘O E HIVA 8: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
